– اكىم – ءىستىڭ ادامى. اۋىل اكىمى حالىقپەن ەتەنە ارالاسۋعا مىندەتتى. اۋىل اكىمدەرىنىڭ قىزمەتى ءاربىر تۇرعىننىڭ كۇندەلىكتى تىنىس تىرشىلىگىندە تۋىندايتىن قاجەتتىلىكتەرمەن تىكەلەي بايلانىستى. سوندىقتان دا بۇل – وتە ابىرويلى دا جاۋاپتى جول. ەڭ الدىمەن، وزەكتى ماسەلەلەرگە تالداۋ جۇرگىزىپ، پروبلەمالار كارتاسىن جاساۋ كەرەك. ونىڭ ىشىندە باسىمدىققا يە جوبالاردى ناقتىلاپ، شەشۋ جولدارى بويىنشا ۇسىنىستار ەنگىزۋ قاجەت.
ەڭ باستىسى – الەۋمەتتىك ماسەلە. جاڭا جۇمىس ورىندارىن اشىپ، تۇرعىنداردى جۇمىسپەن قامتۋعا كۇش سالۋ، جاڭا كاسىپورىندار اشىپ، ينۆەستيسيا تارتۋ كەرەك. تازالىق، كوگالداندىرۋ، اباتتاندىرۋ جۇمىستارىن ارتتىرۋ، قوقىس پوليگوندارىنىڭ سانيتارلىق جاعدايىن رەتكە كەلتىرىپ، قالىپتى جۇمىس جاساۋىن قامتاماسىز ەتۋ كەرەك، – دەدى ءومىرزاق شوكەيەۆ.
سونداي-اق، وبلىس اكىمى زاڭ اياسىندا، پايدالانىلماي جاتقان جەرلەردى مەملەكەتتىك مەنشىككە قايتارۋ بويىنشا جۇمىستاردى جۇرگىزۋدى جۇكتەدى. تۇرعىنداردىڭ سۇرانىستارىن ەسكەرە وتىرىپ، جەكە تۇرعىن ءۇي سالۋعا، شارۋا قوجالىقتارىنىڭ جۇمىسىنا جەرلەر ءبولۋ، ورتاق جايىلىمدىق جەرلەر ماسەلەلەلەرىن شەشۋدى تاپسىردى.
اۋىلشارۋاشىلىعى سالاسىندا جاڭا تەحنولوگيالاردى ەنگىزۋ، تامشىلاتىپ سۋارۋ، جىلىنا 2-3 ءونىم الۋ ءادىسىن پايدالانۋ، اعىن سۋمەن قامتاماسىز ەتۋ ماقساتىندا توعاندار سالۋ مۇمكىندىكتەرىن زەردەلەپ، ۇسىنىستار ەنگىزۋدى مىندەتتەدى. مال باسىن اسىلداندىرۋ، ۆەتەريناريالىق قاۋىپسىزدىك جۇمىستارىنا ەرەكشە نازار اۋدارۋدى تاپسىردى.
سايلاۋ قورىتىندىسىمەن، تۇركىستان وبلىسىندا 60 اكىم سايلاندى. 32-اكىم (53%) جاڭادان سايلاندى.
