قازاقستاندا ۇلتتىق جول قاۋىپسىزدىگى ستراتەگياسى ازىرلەنىپ جاتىر، دەپ حابارلايدى Dalanews.kz.
“قازاقستاندا ەل تاريحىندا العاش رەت جول قاۋىپسىزدىگى ستراتەگياسىن ازىرلەۋ جۇمىستارى باستالدى. ماقسات – الداعى بەس جىل ىشىندە جول-كولىك وقيعالارىنان بولاتىن ءولىم-جىتىمدى كەمىندە 30 پايىزعا ازايتۋ”، – دەلىنگەن “قازجولعزي” اق باسپا ءسوز قىزمەتى تاراتقان حابارلامادا.
جوبا قازاقستان رەسپۋبليكاسى كولىك مينيسترلىگىنە قاراستى اۆتوموبيل جولدارى كوميتەتىنىڭ تاپسىرماسى بويىنشا “قازاقستان جول عىلىمي-زەرتتەۋ ينستيتۋتى” اكسيونەرلىك قوعامى تاراپىنان ازىرلەنۋدە. قۇجات ەلدەگى جول-كولىك وقيعالارىنىڭ ارتۋىنا قارسى كۇرەستەگى نەگىزگى قۇرالعا اينالادى دەپ كۇتىلۋدە.
قازاقستان رەسپۋبليكاسى باس پروكۋراتۋراسىنىڭ قۇقىقتىق ستاتيستيكا كوميتەتىنىڭ رەسمي دەرەكتەرىنە سۇيەنسەك، 2024 جىلى ەلدە 31 مىڭنان استام جول اپاتى تىركەلگەن. بۇل وتكەن جىلمەن سالىستىرعاندا شامامەن ەكى ەسە كوپ. ۆەدومستۆو مالىمەتىنشە، جول اپاتتارىنىڭ سالدارىنان 43 مىڭنان استام ادام زارداپ شەككەن، 2 421 ادام قازا تاپقان.
جوباعا سايكەس، جول قاۋىپسىزدىگى ستراتەگياسى ءاربىر مەملەكەتتىك ورگانعا ارنالعان جەكە ءىس-قيمىل جوسپارىن قامتيدى. وندا حالىقارالىق تاجىريبەلەر ەسكەرىلەدى. سونداي-اق، قۇجاتتا قازاقستان زاڭناماسىنا وزگەرىستەر ەنگىزۋ؛ اۆتوجولداردىڭ بۇكىل ومىرلىك سيكلىندا – جوبالاۋدان باستاپ پايدالانۋعا بەرىلگەنگە دەيىن – قوزعالىس قاۋىپسىزدىگىن مىندەتتى اۋديتتەن جانە ينسپەكسيادان وتكىزۋ قاراستىرىلعان.
