بۇدان بىلاي امستەردامداعى قالالىق مۋزەي الەمگە اتى ءماشھۇر سۋرەتشى - كازيمير ماليەۆيچتى ۋكراين ۇلتىنىڭ ۇلى دەپ تانىستىرادى. بۇعان دەيىن مۋزەيدەگى ونەر جاۋھارلارىن تاماشالاۋعا كەلەتىن كوپشىلىككە "ماليەۆيچتىڭ ۇلتى - ورىس" دەگەن ماعلۇمات بەرىلەتىن ەدى. ايتا كەتەلىك، كييەۆ - سۋرەتشىنىڭ كىندىك قانى تامعان قالا.
بۇعان دولدانعان كرەمل پروپاگانديستەرى ايگىلى سۋرەتشىدەن "ايىرىلىپ" قالعانىنا قاپالانىپ، باتىس يدەولوگتارىن جەتى اتاسىنا جەتكىزە قارعاپ-سىلەۋدە.
"ماليەۆيچ ورىس يمپەرياسىنىڭ وكىلى. ول تۇستاعى ۋكراينا پاتشالىق رەسەيدىڭ قولاستىنداعى دارمەنسىز، ءمۇساپىر مەملەكەت ەدى. كازيمير دە، كييەۆ تە بىزدىكى..."، – دەيدى ورتا عاسىردىڭ ولشەمىمەن ويلايتىن ورىس قوعامى.
باتىس ەلدەرى ماليەۆيچتەن بولەك، ءسىز بەن ءبىز وسى كۇنگە دەيىن ورىس دەپ كەلگەن ءبىر شوعىر سۋرەتشىنىڭ ءتۇپ-تۇقيانىنا قايتا ءۇڭىلىپ، ولاردىڭ ورىس تۇقىمىنا ءۇش قايناسا دا سورپاسى قوسىلمايتىنىن انىقتاعان.
بۇدان بىلاي نيۋ-يوركتەگى مۋزەي يۆان ايۆازوۆسكيي، ارحيپ كۋيندجي مەن يليا رەپيندى ۋكراين سۋرەتشىلەرى دەپ تانيتىن بولادى. قىلقالام شەبەرلەرىنىڭ ءومىربايانىنا ءتيىستى وزگەرىس ەنگىزىلگەن.
ىلگەرىدەگى سۋرەتشىلەر ۋكراين توپىراعىندا تۋعان. ايتالىق، ارحيپ كۋيندجي ورىستار وككۋپاسيالاپ العان ماريۋپول قالاسىنىڭ تۋماسى. نيۋ-يورك مۋزەيى كۋيندجي كارتيناسىنىڭ بۇيىرىنەن پۋتين شاپقىنشىلىعىنان قيراپ قالعان ماريۋپول تۋرالى مالىمەت بەرگەن.
يليا رەپين باسقىنشىلاردىڭ بەتىن قايتارعان حاركوۆتىڭ تۇبىندەگى چۋگۋيەۆ قالاسىندا دۇنيە ەسىگىن ءاشتى. ايگىلى ايۆازوۆسكيي 2014 جىلى رەسەي وتارلاپ العان قىرىم تۇبەگىندە ومىرگە كەلدى.
ەندىگى وركەنيەتتى الەم وسىناۋ قىلقالام شەبەرلەرىن ۋكراين ۇلتىنىڭ وكىلى دەپ تانيتىن بولادى. بۇدان بولەك نيۋ-يورك مۋزەيىنىڭ تورىندەگى فرانسۋز سۋرەتشىسى ەدگار دەگتىڭ "ورىستىڭ ءبيشى قىزى" دەيتىن كارتيناسى "ۋكرايننىڭ ۇلتتىق كيىمىندەگى ءبيشى قىز" دەگەن اتاۋعا وزگەرتىلدى.
"اتى اتالعان سۋرەتشىلەر كوزى ءتىرى بولسا، وزدەرىن ورىس الەمىنىڭ وكىلى رەتىندە دارىپتەۋگە قارسى بولار ەدى. ونەر اتاۋلى زورلىق پەن زومبىلىقتى كوتەرمەيدى. رەسەيدىڭ مادەني ەكسپانسياسى بەينەلەۋ ونەرىندە ادىلەتسىزدىك ورناتىپ، وسى كۇنگە دەيىن ۇلى سۋرەتشىلەردىڭ شىعۋ تەگىن بۇرمالاپ كەلگەن"، – دەيدى باتىس يدەولوگتارى.
