الماتىدا كولىكتىڭ رولىندە كەلە جاتىپ بۇرىنعى فۋرمانوۆ كوشەسىنە جاقىنداعاندا ەكىۇداي كۇي كەشەمىن. ءتورت جىل بۇرىن وزگەرتىلگەن نازاربايەۆ داڭعىلى دەگەن جاڭا اتى تىلگە ۇيىرىلمەي-اق قويدى. قابىلداي المايمىن. كەيبىر تانىستارىم بۇل كوشەنى «اتىڭ وشكىردىڭ كوشەسى» دەپ اتاپ ءجۇر.

بۇرىن لەپسى اتانعان كوشەگە فۋرمانوۆ اتى 1956 جىلى بەرىلگەن. الماتىداعى ەڭ ورتالىق كوشە بولعاندىقتان بۇل كوشە تاۋەلسىزدىك جىلدارىندا جالپى ازاتتىق داڭعىلى اتالۋعا ابدەن لايىق ەدى.

2019 جىلى حالىقپەن، تۇرعىندارمەن ءتارتىپ بويىنشا كەلىسىلمەستەن بۇل كوشەگە بىردەن ەكس-پرەزيدەنتتىڭ اتى بەرىلىپ كەتتى. ەندى بۇل قاتەلىكتى، اسىعىس اعاتتىقتى جوندەيتىن شاق تۋدى!

ەلىمىزدە تاۋەلسىزدىك العاننان كەيىنگى 32 جىلدا جاسالۋعا ءتيىستى وتارسىزداندىرۋ (دەكولونيزاسيا)، سوۆەتسىزدەندىرۋ (دەسوۆەتيزاسيا) ۇدەرىستەرىمەن قاتار ءدال بۇگىنگى تاڭدا قولعا الىناتىن شارۋا – نۇرسىزداندىرۋ (دەنۇريزاسيا). وكىنىشكە قاراي بيلىك ترانسفورماسياسىنىڭ تولقىنى كەمەرىنەن اسىپ وتە الماي نازاربايەۆ رەجيمىنىڭ شەڭبەرىندە قالىپ قويدى. ءبىراق ءبارى ءبىر كەتكەن قاتەلىكتەر تۇزەتىلۋگە ءتيىس!  

ەكس-ەلباسى ءوزىنىڭ اتىن شىعارۋعا اسا قۇمار بولعانىن بىلەمىز. ەلوردانىڭ دا اتى ەكى-ۇش جىلداي نۇر-سۇلتان بولدى. ونىڭ اتى بەرىلگەن مەكەمەلەر قاتارىندا پرەزيدەنت ءارحيۆى مەن كىتاپحاناسى بار. ودان بولەك، ەلوردادا تۇڭعىش پرەزيدەنت مۇراجايى مەن نازاربايەۆ ۋنيۆەرسيتەتى بار. نازاربايەۆتىڭ زياتكەرلىك مەكتەپتەرى ءار وبلىس ورتالىعىندا بار.

مۇنىڭ ءبارى مەملەكەت بيۋدجەتى ەسەبىنەن قارجىلاندىرىلادى. قالاداعى تەمىر جول ۆوكزالى مەن حالىقارالىق اۋەجاي دا نازاربايەۆتىڭ اتىندا.

جەكە باسقا تابىنۋ جىلدارىندا الماتىدا دەندروپارك، باسقا وبلىس ورتالىقتارىندا ساياباقتار اشىلدى. شىعارىلعان پوشتا ماركىلەرى مەن قىزعالداق سورتتارىن ايتپاي-اق قويالىق.

2019 جىلى بيلىك ترانفورماسياسى كەزىندە قازاقستانداعى بارلىق وبلىس ورتالىقتارىنىڭ باستى كوشەلەرىنىڭ اتى نازاربايەۆ كوشەسى دەپ وزگەرتىلدى. ءتىپتى، ونىڭ ءاتى-جونى قازاقستان ءانۇرانى اۆتورلارىنىڭ ءبىرى رەتىندە كورسەتىلگەن.

جاعىمپازدار قولداۋىمەن نازاربايەۆتىڭ اتىن ماڭگى ەستە قالدىرۋ ءۇشىن نە ىستەلمەدى دەسەڭىزشى؟! 1998 جىلى ىلە الاتاۋىنىڭ كومسومول شىڭى اتاۋى «نۇرسۇلتان شىڭى» دەپ وزگەرتىلدى.

قازاقستاننىڭ سىرتقى ىستەر ۆەدومستۆوسىنىڭ ارالاسۋىمەن تۇركيا استاناسى انكارادا، شەشەنستان استاناسى گروزنىيدا، ءۇردىن ەلىنىڭ (يوردانيا) استاناسى امماندا، قىرعىزستاننىڭ شولپان اتا قالاسىندا كوشەلەرگە نۇرسۇلتان نازاربايەۆ اتى بەرىلىپ، ءتىپتى قولا مۇسىندەرى، ەسكەرتكىشتەرى  ورناتىلدى.

نۇرسۇلتان نازاربايەۆتىڭ قۇرمەتىنە «قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازاربايەۆ» وردەنى تاعايىندالعانى بار.

مەكتەپ دەيسىز بە، ينستيتۋت دەيسىز بە، پارك دەيسىز بە وسىلاي تولىپ جاتىر. ءتاتتىنى جەي بەرسە ادامنىڭ قۇسقىسى كەلەتىن سياقتى بۇل اتاۋ دا ادامداردىڭ جۇرەگىن لوقسىتىپ، نارازىلىعىن ارتتىرىپ، اشۋىن كەلتىرىپ جۇرگەنىنە تالاي جىل بولدى.

ەندى بەس جىلدان كەيىن بولسا دا، ون جىلدان كەيىن بولسا دا بۇل اتاۋدىڭ مۇلدە جويىلاتىنىنا، حالىقتىڭ جادىنان وشەتىنىنە ەش كۇمان جوق. حالىققا جاساعان جاقسىلىعى «ەكى سيىردان» اسپاعان ەكس-پرەزيدەنتتى سونشالىقتى ارداقتاۋ ەش قيسىنعا كەلمەيدى.

ىستەگەن ازدى-كوپتى پايدالى قىزمەتى بولسا ول ءۇشىن ەڭ ۇلكەن جالاقى العانى دا بەلگىلى. ول جالاقىسى شەكتەۋلى مولشەردە بولسا ونى قۇپيالاپ ۇستاماس ەدى. سونداي-اق، ونىڭ جانە وتباسىنىڭ قىزمەت بابىن، تۋىستىق جاقىندىعىن پايدالانىپ جەكەشەلەندىرىپ العان ەلدەگى، شەت ەلدەردەگى نىساندارىن، وراسان زور اكتيۆتەرىن بيۋدجەتكە قايتارۋ كۇن تارتىبىنەن تۇسپەۋى كەرەك!

بۇگىنگى بيلىك تۇتقاسىنا كورۋپسيادان الىس، جاعىمپازدىقتان جوعارى جاس تولقىن كەلىپ جاتىر. «ادىلەتتى قازاقستان» ۇرانى حالىق اراسىندا سەنىم تۋعىزۋ ءۇشىن ادىلەتسىزدىكتەرگە جول بەرگەن ديكتاتور نازاربايەۆتىڭ ءوزى دە، بيلىگى دە قوعامدىق تۇرعىدان دا، زاڭدىق تۇرعىدان دا ايىپتالۋعا ءتيىس!

مارات ءبايدىلدا ۇلى