استانادا ەكى جانە ودان دا كوپ ادام سەرۋەندەگەن كەزدە ماسكا تاعۋ مىندەت. دەگەنمەن قالا تۇرعىندارىنىڭ ۇيدەن شىعۋىنا تىيىم سالىنبايدى. اۋلاعا شىعىپ، بىرنەشە ادام بولىپ ساياباق، الاڭدارعا بارۋعا رۇقسات ەتىلەدى. ءبىراق الەۋمەتتىك اراقاشىقتىق ساقتالۋى ءتيىس. قالا تۇرعىندارى سونىمەن بىرگە ساياجايلارعا دا بارا الادى.
"قوعامدىق ورىندارعا بارعان كەزدە، قوعامدىق كولىكتەرگە مىنگەن كەزدە ماسكا تاعىپ، قولعاپ كيۋ، انتيسەپتيك قولدانۋ تالاپتارىن قاتاڭ ساقتاۋ كەرەك" دەلىنگەن پىرالييەۆانىڭ حابارلاماسىندا.
دەگەنمەن قالا تۇرعىندارىنا وتباسىلىق، ەسكە الۋ، عۇرىپتىق جانە وزگە دە شارالاردى وتكىزۋگە، توي جاساۋعا تىيىم سالىنعان. باس سانيتار دارىگەردىڭ ايتۋىنشا، قالادا 25 مامىردان باستاپ بيزنەس نىساندارى قالىپتى رەجيمگە كوشەدى، ءبىراق سانيتارلىق-دەزينفەكسيالىق ەرەجەلەردى ساقتاۋى كەرەك.
استانادا اۋلاسىندا 50-دەن استام ورىن بار ءدامحانالار مەن مەيرامحانالاردىڭ جۇمىس ىستەۋىنە رۇقسات ەتىلمەك. مەشىت، شىركەۋ جانە وزگە دە ءدىني نىساندارعا ءبىر مەزگىلدە 50-دەن استام ادام كىرۋگە بولمايدى جانە كىرۋ-شىعۋ ەسىكتەرى بولەك بولۋى كەرەك.
استانادا بۇرىنعىداي قوعامدىق شارا وتكىزۋگە تىيىم كۇشىندە قالماق. مۇندا مەكتەپ ءبىتىرۋ كەشتەرى، سوڭعى قوڭىراۋ وتپەيدى. كوشە ساۋداسىنا دا تىيىم سالىنعان. بانكەت زالدارى، تۇنگى كلۋبتار، ماسساج، سپا-سالوندار، سپورت كەشەندەرى، مەكتەپكە دەيىنگى ءبىلىم بەرۋ ورىندارى جابىق.
سوڭعى مالىمەت بويىنشا، استانادا 1598 ادامنان كوروناۆيرۋس ينفەكسياسى تابىلعان. سوڭعى تاۋلىكتە 58 ادامنان كوروناۆيرۋس تابىلعان. ەپيدەميا باستالعالى بەرى 5 ادام قايتىس بولعان.
