سالتانات نۇكەنوۆانىڭ اعاسى ايتبەك امانگەلدى قارىنداسى جايلى تاعى ءبىر جاڭا مالىمەتپەن ءبولىستى. بۇل تۋرالى ول “چتو سكاجەتە؟” ارناسىنا بەرگەن سۇقباتىندا جەتكىزدى، دەپ حابارلايدى Dalanews.kz.

اعاسىنىڭ ايتۋىنشا، سالتانات بيشىمبايەۆپەن كونسۋلتاسيا كەزىندە تانىسقان. 

“سالتانات ەر ادامداردى قابىلدامايتىن. سەبەبى ولار ارتىق ويىن ءبىلدىرىپ، مازاسىن الاتىن بولعان. ءبىراق بيشىمبايەۆ سالتاناتتىڭ سۋرەتىن كورىپ، وعان ينستاگرام ارقىلى جازا باستايدى. كەيىن كونسۋلتاسيا وتكىزۋىن سۇراعان. بيشىمبايەۆ باستاپقىدا ونلاين كەيىن وفلاين كونسۋلتاسياعا كەلىسكەن. سوسىن سالتاناتقا كوڭىلىن بىلدىرە باستاعان. ءبىز سالتانات ەكەۋىمىز جاقىن ەدىك. ءبىراق ونىڭ تۇرمىسقا شىعامىن دەگەنى مەنى تاڭقالدىردى. ءبىرىنشى وتباسىمەن، مەنىمەن تانىستىرۋ كەرەك قوي دەپ ءبىرتۇرلى بولىپ قالعانمىن. ويتكەنى سالتانات بۇلاي جىلدام شەشىم قابىلدامايتىن. بيشىمبايەۆ ەكى ايدان كەيىن ۇيلەنۋگە ۇسىنىس جاسادى. ءبىز جاي عانا كوڭىل ءبىلدىرىپ جۇرگەن شىعار دەپ قاتتى ءمان بەرمەدىك. كۇيەۋى بولادى دەپ مۇلدەم ويلامادىق. سالتانات وعان عاشىق بولعاندىقتان، ءوز بەتىنشە شەشىم قابىلدادى” – دەيدى ايتبەك امانگەلدى.

وكىنىشكە قاراي سالتانات تۇرمىس قۇراعاننان كەيىن بارلىعىنان الىستاپ كەتكەن. اعاسىنىڭ مالىمەتىنشە، قارىنداسىنىڭ ءۇيى جاقىن جەردە ورنالاسقانىمەن، ولار وتە سيرەك كەزدەسكەن.

“سالتاناتتىڭ ۇنەمى ۋاقىتى بولمايتىن. بۇعان قاتتى ءمان بەرمەگەن ەدىم. وسىلايشا ول وتباسىنان، تۋعاندارى مەن جاقىندارىنان الشاقتاتا باستادى. مەن وتباسىمىنىڭ بارلىق مۇشەلەرى ءۇشىن گەولوكاسيا قوسىپ قويعانمىن. ءبىراق سالتاناتتىڭ گەولوكاسياسىن سوڭعى ءبىر جىلدا ۇنەمى باقىلاپ وتىراتىنمىن” – دەيدى اعاسى.

سالتانات نۇكەنوۆا مەن بيشىمبايەۆپەن ەكى جاققا كەتۋگە بەل بايلاپ، كەيىن قايتا قوسىلعان. ءتىپتى ءوزى بولەك پاتەرگە شىعىپ، قايتادان جاڭا ءومىرىن باستايمىن دەپ شەشىم قابىلداعان ەكەن.

“بارلىعى جاقسى بولدى. ءبىراق 26 قازان كۇنى سالتانات قوسىلدىق، نەكەمىزدى تاعى قيدىق دەپ سۋرەت جىبەردى. ءبىز قاتتى تاڭقالدىق. سالتانات تاعى ءبىر رەت مۇمكىندىك بەرەمىن دەپ شەشىپتى. قۋاندىقتىڭ وتباسىندا قولداۋ جوق، بىر-بىرىنە جاقىن ەمەس دەپ سالتانات ونى اياپ جۇرەتىن. ونى مەن عانا تۇسىنەمىن، ايايمىن، قولدايمىن دەيتىن. كەتىپ قالسام، مەنسىز نە ىستەيدى دەپ ويلايتىن” – دەيدى ول.

ايتبەك امانگەلدى بيشىمبايەۆتىڭ بۇل ارەكەتىنىڭ كەزدەيسوق بولماعانىن ايتتى.

“بيشىمبايەۆ سالتاناتتى جاقىندارىنان الشاقتاتىپ، ادامدارمەن ارالاسۋىنا رۇقسات بەرمەيتىن. بۇل كەزدەيسوق جاعداي دەپ ويلامايمىن. مەن بيشىمبايەۆتان قاندايدا ءبىر اۋىتقۋ بايقامادىم. تەرگەۋ كەزىندە، وقيعا بارىسىندا ول ەسىن ءبىلدى. تاماق تاپسىرىس بەرىپ، جان-جاقتا بولىپ جاتقاننىڭ بارلىعىن باقىلاپ وتىرعان. مەن پسيحولوگ ەمەسپىن، ءبىراق ول ەسىن ءبىلىپ، بارلىعىن سانالى تۇردە جاساعان دەپ ويلايمىن” – دەيدى ايتبەك امانگەلدى.