تۇركىستان وبلىسىنىڭ بايدىبەك، قازىعۇرت، ورداباسى، تۇلكىباس، تولەبي، وتىرار اۋداندارى اۋماعىنداعى كيەلى جانە تۋريستىك ورىندارعا ساياحات جاساعان قوناقتار تۇركىستاننىڭ تۋريستىك الەۋەتىن وتە جوعارى باعالادى. اتاپ ايتساق، اقمەشىت ۇڭگىرى، دومالاق انا كەسەنەسى، اپپاق يشان مەشىتى، قازىعۇرت تاۋى، اقبۋرا اۋليە، عايىپ ەرەن قىرىق شىلتەن، قاجىمۇقان مۇراجايى، وتىرار قالاشىعى، ارىستان باب كەسەنەسى جانە وزگە دە تاريحي ورىنداردى ارالاپ، ءوڭىردىڭ تاڭعاجايىپ تابيعاتىنا تامساندى. ەكسپەديسيا قۇرامىندا جۇرگەن بەلگىلى قوعام قايراتكەرى، ەكونوميكا عىلىمىنىڭ كانديداتى مۇحتار تايجان تۇركىستان وبلىسىنىڭ كورىكتى ورىندارىنان ەرەكشە اسەر العانىن ايتتى.
– نۇح پايعامباردىڭ كەمەسى تۋرالى اڭىزدار قازاق جانە ارميان حالىقتارىندا بار. بۇل – وتە ەرتە زاماندى سۋرەتتەيتىن اڭىز. دەمەك، قازاق حالقى ەڭ ەجەلگى ۇلتتاردىڭ ءبىرى دەۋگە نەگىز بار. قازىعۇرت تاۋىنىڭ باۋرايىنا كەلىپ، وسى تاريحي ورىندى ءوز كوزىممەن كوردىم. ەكسپەديسيا مۇشەلەرى دە ريزاشىلىقتارىن ءبىلدىرىپ جاتىر. مەنىڭ ويىمشا وسىنداي ءىس-شارالار ارقىلى ەلدىڭ ءتۋريزمى دامىپ، جۇرتشىلىقتىڭ تۋعان ەلگە، تۋعان جەرگە دەگەن سۇيىسپەنشىلىگى ويانادى. تۇركىستان وبلىسىنىڭ تۋريستىك الەۋەتى وتە مىقتى. ەگەر وسى باعىتتا جۇمىس كۇشەيە بەرسە، تۋريزم سالاسى دا دامي بەرەدى، – دەيدى ول.
تۇركىستانداعى قوجا احمەت ياساۋي كەسەنەسىنە زيارات جاساپ، كونە جادىگەرلەرمەن، الىپ كەسەنەنىڭ تاريحىمەن تانىسقان ساياحاتشىلار ودان كەيىن ساۋران قالاشىعىنا جول تارتتى. ولار سول ماڭدا تۇنەيدى. ەرتەڭ ەكسپەديسيا مۇشەلەرىنە جانە وزگە دە ساياحاتشىلارعا ارنالىپ ۇلكەن تۋريستىك ءىس-شارالار وتەدى. ۇلتتىق سپورت تۇرلەرىنەن سايىستار ءوتىپ، فولكلورلىق انسامبلدەردىڭ كونسەرتتىك باعدارلامالارى ۇسىنىلماق.
تۇركىستان وبلىستىق وڭىرلىك كوممنۋيكاسيالار قىزمەتى
