"سارىارقا" حوككەي كلۋبى 170 ملن تەڭگە قارىزعا باتتى. بۇل تۋرالى Nege.Aqsha ارناسى جازدى،- دەپ حابارلايدى Dalanews.kz.
ارنا مالىمەتىنشە، قاراعاندىنىڭ «سارىارقا» حوككەي كلۋبى 2021 جىلدان بەرى نەسيە بەرەشەگى كوبەيۋى مەن بيۋدجەتتىك قارجىلاندىرۋ قىسقارۋىنا بايلانىستى قارجىلىق قيىندىقتارعا تاپ بولعان.
"قىزمەتكەرلەردىڭ ۋاقىتشا جۇمىستى توقتاتۋىنىڭ ەكونوميكالىق سەبەپتەرى ءىس ماتەريالدارىمەن راستالادى: "UHY SAPA Consulting" ج ش س اۋديتورلىق تەكسەرىسىنىڭ قورىتىندىلارى، نەسيە بەرۋشىلەردىڭ تالاپتارى، نەسيە بەرەشەگىن ءوندىرۋ تۋرالى سوت اكتىلەرى جانە بۋحگالتەرلىك قۇجاتتار. 2023 جىلدىڭ ءبىرىنشى توقسانىنداعى مالىمەتكە سايكەس 31 ناۋرىزداعى جاعداي بويىنشا كلۋبتىڭ جالپى قارىزى، ونىڭ ىشىندە قىزمەتكەرلەردىڭ جالاقىسى مەن مىندەتتى اۋدارىمدارى 170 433 141،77 تەڭگە بولدى»، – دەپ جازىلعان 2025 جىلعى 27 اقپانداعى قاراعاندى وبلىستىق سوتىنىڭ ازاماتتىق ىستەر جونىندەگى سوت القاسىنىڭ قاۋلىسىندا.
"دياديا ۆانيا" ارناسى «سارىارقانىڭ» قارجىلىق جاعدايىنىڭ ناشارلاۋىن 2022 جىلى نۇرلان ءنىعماتۋليننىڭ ءماجىلىس ءتوراعاسى قىزمەتىنەن كەتۋىمەن بايلانىستىرادى.
باس پروكۋراتۋرا «سارىارقانىڭ» بۇرىنعى ديرەكتورى ارعىن ءنىعماتۋليندى ىزدەستىرىپ جاتىر.
نىعماتۋلينگە قاتىستى ءىس
ءقازىر ارعىن نىعماتۋلينگە جانە قاراعاندى وبلىسىندا حوككەيدى دامىتۋعا بولىنگەن بيۋدجەت قاراجاتىن جىمقىردى دەگەن كۇدىككە ىلىنگەن باسقا دا ادامدارعا قاتىستى قىلمىستىق ءىس تەرگەلىپ جاتىر.
ال بۇعان دەيىن سىبايلاس جەمقورلىققا قارسى قىزمەت نۇرلان ءنىعماتۋليننىڭ اعاسى ارعىن ءنىعماتۋليندى ىزدەپ جاتقانى حابارلاندى.
بۇل ءىس بيىل 3 ناۋرىزدا استانادا تىركەلدى. ىزدەۋگە باستاما جاساعان - پروكۋراتۋرا.
اشىق دەرەككوز مالىمەتىنشە، ارعىن نىعماتۋلين - ءماجىلىستىڭ بۇرىنعى ءتوراعاسى نۇرلان ءنىعماتۋليننىڭ جانە ەكس-دەپۋتات ەرلان ءنىعماتۋليننىڭ اعاسى.
ول 1955 جىلى 28 ماۋسىمدا دۇنيەگە كەلگەن. 2007 جىلى ساۋىردەن 2018 جىلعا دەيىن «سارىارقا» حوككەي كلۋبى» ج ش س ديرەكتورى قىزمەتىن اتقاردى. قاراعاندى وبلىستىق ءماسليحاتىنىڭ دەپۋتاتى بولدى.
