نازاربايەۆ زياتكەرلىك مەكتەبىنىڭ باعدارلاماسىن ورىنسىز تىقپالاۋدىڭ قاجەتى قانشا؟

Dalanews 25 قاز. 2017 05:45 907

مەن نازاربايەۆ زياتكەرلىك مەكتەبىنىڭ وقۋ باعدارلاماسىن قاراپايىم مەكتەپتەردە وقىتىلۋىنا تولىقتاي قارسىمىن! ماسەلە وقۋلىقتاردا دا، ءتىپتى، ءۇش تىلدىلىك تە ەمەس…

وسىلاي كۇيىنىپ، Facebook-تەگى جەكە پاراقشاسىندا ماسەلە كوتەرگەن بۇرىنعى ءبىلىم ۆيسە-مينيسترى مۇرات ابەنوۆ ءالى كەش بولماي تۇرعاندا، نازاربايەۆ زياتكەرلىك مەكتەبىنىڭ وقۋ باعدارلاماسىن قاراپايىم مەكتەپتەرگە كوشىرۋ پروسەسىن توقتاتا تۇرۋدى سۇرايدى. ءسويتىپ، ول ءبىلىم جۇيەسىندەگى بىرنەشە قاتەلىكتەردىڭ اتىن اتاپ، ءتۇسىن تۇستەپ، بىلاي دەپ جازادى:

سونشا اكادەميالىق ءبىلىمى بار بالانى قايتپەك؟..

„بىرىنشىدەن،

نازاربايەۆ زياتكەرلىك مەكتەبىنىڭ باعدارلاماسى — اكادەميالىق، ول ەرەكشە ويلاۋ قابىلەتى بار، ءبىلىمدى يگەرۋ دەڭگەيى جوعارى، قارىمى مىقتى بالالارعا لايىقتالىپ، كۇردەلەندىرىلىپ جاسالعان.

ءبىر سوزبەن ايتقاندا، ونى ءوز بەتىمەن زەرتتەۋ جۇمىسىمەن، عىلىمي قىزمەتپەن اينالىسا الاتىن بالالار الىپ جۇرەدى. شىنىن ايتايىق — بىزدەگى بالالاردىڭ بارلىعى ونداي ەمەس قوي. ولاي بولۋى دا مىندەتتى ەمەس. سوندىقتان دا نازاربايەۆ زياتكەرلىك مەكتەبىنە قاتاڭ سۇزگىدەن وتكەن، بەلگىلى ءبىر دارەجەدەگى بالالاردى قابىلدايدى. باسقالارىن المايدى. ويتكەنى تارتپايدى، جەتپەيدى ول دەڭگەيگە. ودان كەيىن، ەكونوميكاسى شيكىزاتقا بايلانعان، تەحنولوگياسى ارەڭ دامىپ جاتقان ەلگە وسىنشا اكادەميالىق ءبىلىمى بار بالانىڭ قاجەتى قانشا ءوزى؟ ءبىز ولاردى جۇمىس ورنىمەن قامتي دا المايمىز عوي.

اعىلشىن ءتىلىن بىلەتىن مامان 70 مىڭ تەڭگەگە جۇمىس ىستەي مە؟..

ەكىنشىدەن، نازاربايەۆ زياتكەرلىك مەكتەبىنىڭ باعدارلاماسىن الىپ ءجۇرۋ ءۇشىن، وتە تالانتتى مۇعالىمدەر ىرىكتەلىپ الىنادى. ولار اعىلشىن تىلىندە ەركىن ءسويلاپ قانا قويماي، وقۋشىعا قاجەتتى ءبىلىم بەرۋگە قابىلەتتى بولۋعا ءتيىس. بۇدان بولەك، ءبىلىم بەرۋدىڭ وزىق تەحنولوگياسىن جەتىك ءبىلۋى قاجەت. ونداي مۇعالىمدەر بالانىڭ ءارقايسىسىنا جەكەلەي جول تاۋىپ، ونىڭ جاسىرىنىپ جاتقان تالانتىن اشۋدا دايىن ءبىلىمدى بەرە بەرەتىن ۇستاز عانا ەمەس، سونىمەن قاتار، جاتتىقتىرۋشىسى، تالىمگەرى بولا ءبىلۋى كەرەك. ءبارىن بولماسا دا ونداي مۇعالىمدەردى دايىنداپ شىعارۋعا بولادى.

ءبىراق ونداي مۇعالىمدەرگە جوعارى ايلىق كەرەك. وسىنداي ەرەك تالانتى بار ءمۇعالىم ەكونوميكانىڭ وزگە سالالارىندا دا سۇرانىسقا يە بولۋى مۇمكىن عوي. كىم مىقتى بىلىمىمەن 70 مىڭ تەڭگە ايلىققا جۇمىس ىستەيدى؟

ال نازاربايەۆ زياتكەرلىك مەكتەبى جاقسى ايلىقپەن قامتۋعا قابىلەتتى. قاراپايىم مەكتەپتەردىڭ وعان شاماسى جەتپەيدى. زياتكەرلىك مەكتەپتەردە ءبىر سىنىپقا ەكى ءمۇعالىم بەكىتىلەدى: بىرەۋى ءمۇعالىم، ەكىنشىسى تالىمگەر. ءار سىنىپتا 20-عا جەتەر-جەتپەس بالا. ويتكەنى ءار بالامەن جۇمىس ىستەۋگە مۇمكىندىك بولۋ كەرەك، ويتكەنى باعدارلاما كۇردەلى عوي. دەمەك، 350 مىڭ ءمۇعالىمنىڭ قاتارىنا تاعى 100 مىڭى كەرەك، سودان سوڭ، ولاردىڭ ايلىعىن نازاربايەۆ زياتكەرلىك مەكتەپتەرىندەگى ايلىقپەن تەڭەستىرەيىك. ونىڭ تۇك قيىندىعى جوق. ءقازىر سولاي ەتە سالساق تا بولادى. ءبىراق قايدام؟..

تومەنگى سىنىپتىڭ بالالارىنا تۇسكى اس جوق، قايداعى بەسىن؟..

ۇشىنشىدەن، نازاربايەۆ زياتكەرلىك مەكتەبى باعدارلاماسىمەن وقۋ ءۇشىن جاڭا قۇرال-جابدىقپەن جابدىقتالعان، سونى ۇلگىدەگى وقۋ عيماراتى قاجەت، ال بالالار ءبىر اۋىسىمدا عانا وقۋى ءتيىس، ويتكەنى ولار تۇستەن كەيىن العان ءبىلىمىن زەرتحانا مەن شەبەرحانالاردا سىناۋى كەرەك قوي. ءار وقۋشىمەن جەكەلەي ساباقتىڭ ءمان-ماڭىزى دا وسىندا. ولار العان ءبىلىمىن سول ارادا تاجىريبەدە سىناپ كورۋى ءتيىس. وعان قوسا، بالالار تالانتىن جەتىلدىرە ءتۇسۋ ءۇشىن ءتۇرلى ۇيىرمەلەرگە قاتىسۋى كەرەك. ال بىزدە ونداي عيماراتتار بار ما؟ بىزدەگى مەكتەپتەردىڭ تەڭ جارتىسىندا ەكى اۋىسىمدا ساباق وتەدى. تاڭەرتەڭگىلەرگە تۇستەن كەيىن كابينەت جوق.

دەمەك „تۇسكە دەيىن تەوريا، تۇستەن كەيىن تاجىريبە„ دەگەن قاعيدات جۇمىس ىستەمەيدى.

تورتىنشىدەن، بالانى ءبۇتىن ءبىر كۇن بويى مەكتەپتە ۇستاپ، باستارى جاقسى ىستەۋى ءۇشىن — ولارعا تۇستىكتەن سوڭ، بەسىن تاماق تا بەرۋ كەرەك. نازاربايەۆ زياتكەرلىك مەكتەپتەرىندە بۇل بيۋدجەت ەسەبىنەن جاسالادى.

ال قاراپايىم مەكتەپتەردە ءبىز، ءتىپتى، تومەنگى سىنىپ وقۋشىلارىن تۇستىكپەن قامسىزداندىرا الماي وتىرمىز.

كورىپ وتىرعاندارىڭىزداي، بۇل ارادا بىرنەشە جۇيەلى ماسەلە بار. ونى شەشۋ ءۇشىن كوبىرەك اقشا مەن ۋاقىت كەرەك. باعدارلامانى الىپ كەتۋ ءۇشىن دە دايىندىق قاجەت.

ۇكىمەتتەن كەيىنگە شەگەرۋدى سۇراسىن…

ۋاقىت سول باعدارلامانى وقىتا الاتىن دەڭگەيدەگى مۇعالىمدەردى دايىنداپ، ىرىكتەۋ ءۇشىن قاجەت. سول سەكىلدى ۋاقىت قالا مەن اۋىلداعى ءبىلىمنىڭ دەڭگەيىن تەڭەستىرۋ ءۇشىن دە كەرەك. ال وتە كوپ اقشا عيماراتتاردى سالۋعا، زەرتحانالار اشۋعا، ونىڭ ءىشىن قاجەتتى قۇرال-جابدىقپەن قامتاماسىز ەتۋگە، مۇعالىمدەردىڭ جالاقىسىن وسىرۋگە، جاڭا عيمارات پەن مامانداردى ۇستاۋعا قاجەت.

ارينە، تارپا باس سالىپ، ءبىلىم جانە عىلىم مينيسترلىگى باسشىلىعىن سىلكىلەۋدىڭ قاجەتى جوق. ولاردا كىنا جوق. مينيسترلىك بيۋدجەتى قاراستىرىلىپ، ۋاقىتى بەلگىلەنگەن مەملەكەتتىك باعدارلاماداعى رەفورمالاردى قولعا الىپ، جۇزەگە اسىرىپ جاتىر. ءبىراق وسى كۇيىندەگى رەفورمالار ءبارىبىر كۇتكەن ناتيجەگە تەزىرەك جەتكىزبەيتىنىن دەر ۋاقىتىندا ءتۇسىنىپ، شەشىم قابىلداۋىمىز ءتيىس.

بۇل پروسەستى توقتاتاتىن قانداي دا ءبىر مۇمكىندىك بار شىعار. ءالى كەش بولماي تۇرعاندا، سويتەيىك ەندى. بۇلتارتپاس سەبەپ جوق ەمەس، بار. ءقازىر بيۋدجەت تاپشىلىعى، اقشا جەتىسپەۋشىلىگى دەگەن ماسەلە بار.