قازاقستاننىڭ جوعارى اۋديتورلىق پالاتاسىنىڭ (جاپ) ءتوراعاسى ءاليحان سمايىلوۆ نازاربايەۆ ۋنيۆەرسيتەتىندە 73،5 ملرد تەڭگەنىڭ ءتيىمسىز جۇمسالعانىن مالىمدەدى، دەپ حابارلايدى Dalanews.kz.

“قولدانىستاعى زاڭناما ۋنيۆەرسيتەتتى قارجىلىق ەسەپتەمەنى ۇسىنۋعا مىندەتتەمەيدى. بۇل ۋنيۆەرسيتەت جۇمىسىنىڭ اشىقتىعىنا كەرى اسەرىن تيگىزەدى. ماسەلەن، كەيبىر قاراجات ءتيىمسىز جۇمسالعان جانە قارجىعا بايلانىستى زاڭبۇزۋشىلىقتار بولعان. اۋديت بارىسىندا ۋنيۆەرسيتەتتە 73 ملرد تەڭگەگە ءتيىمسىز جوسپارلاۋ مەن ءتيىمسىز پايدالانۋ فاكتىلەرى انىقتالدى. سونداي-اق 0،5 ملرد تەڭگەگە قارجى زاڭبۇزۋشىلىقتارى تىركەلدى”، – دەدى سمايىلوۆ ءماجىلىس دالىزىندە.

ونىڭ ايتۋىنشا، جاپ اۋديت ناتيجەسىندە ءبىرقاتار كەمشىلىك پەن پروبلەمانى انىقتاعان.

“ءبىرىنشى كەمشىلىك – نازاربايەۆ ۋنيۆەرسيتەتى بيۋدجەت قاراجاتىنا ءالى دە تاۋەلدى. ۋنيۆەرسيتەتتىڭ دامۋ ستراتەگياسىندا ونى رەسپۋبليكالىق بيۋدجەتتەن تاۋەلسىز ەتۋ ءۇشىن وزگە قارجىلاندىرۋ كوزدەرىنەن قاراجات تارتۋ كوزدەلگەن. الايدا ەرەكشە مارتەبەسى مەن سالىق بويىنشا جەڭىلدىكتەرىنە قاراماستان،ۋنيۆەرسيتەت 97 پايىزعا رەسپۋبليكالىق بيۋدجەت تاراپىنان قارجىلاندىرىلىپ وتىر”، – دەدى باس اۋديتور.

سمايىلوۆتىڭ ايتۋىنشا، تاعى ءبىر ماڭىزدى ماسەلە – عىلىمي زەرتتەۋلەردى كوممەرسيالاندىرۋدىڭ جەتكىلىكسىزدىگى.

“عىلىمي زەرتتەۋلەرگە كوپ قاراجات بولىنگەنىمەن، ولاردىڭ تاجىريبەدە قولدانىلۋى نەمەسە كوممەرسيالاندىرىلۋى جوقتىڭ قاسى. وسى ماسەلەلەر بويىنشا ۋنيۆەرسيتەتتىڭ جاڭا پرەزيدەنتىمەن سويلەستىك. سونىمەن قاتار ۇسىنىستارىمىز ۋنيۆەرسيتەتكە دە، ۇكىمەتكە دە جولداندى"، – دەپ اتاپ ءوتتى سمايىلوۆ.

ونىڭ ايتۋىنشا، تەكسەرىس ءتورتىنشى توقساندا اياقتالعان.

“ەندى زاڭنامالىق باستاما ۇكىمەتكە تيەسىلى. ءبىز جاساعان قورىتىندى مەن ۇسىنىستار ۇكىمەتكە جىبەرىلدى. ەندى ۇكىمەت زاڭناماعا قانداي وزگەرىستەر ەنگىزۋ كەرەگىن شەشۋى ءتيىس”، – دەدى جاپ باسشىسى.