Qazaqstannyń Joǵary aýditorlyq palatasynyń (JAP) tóraǵasy Álihan Smaiylov Nazarbaev ýniversitetinde 73,5 mlrd teńgeniń tiimsiz jumsalǵanyn málimdedi, dep habarlaidy Dalanews.kz.
“Qoldanystaǵy zańnama ýniversitetti qarjylyq eseptemeni usynýǵa mindettemeidi. Bul ýniversitet jumysynyń ashyqtyǵyna keri áserin tigizedi. Máselen, keibir qarajat tiimsiz jumsalǵan jáne qarjyǵa bailanysty zańbuzýshylyqtar bolǵan. Aýdit barysynda ýniversitette 73 mlrd teńgege tiimsiz josparlaý men tiimsiz paidalaný faktileri anyqtaldy. Sondai-aq 0,5 mlrd teńgege qarjy zańbuzýshylyqtary tirkeldi”, – dedi Smaiylov Májilis dálizinde.
Onyń aitýynsha, JAP aýdit nátijesinde birqatar kemshilik pen problemany anyqtaǵan.
“Birinshi kemshilik – Nazarbaev ýniversiteti biýdjet qarajatyna áli de táýeldi. Ýniversitettiń damý strategiiasynda ony respýblikalyq biýdjetten táýelsiz etý úshin ózge qarjylandyrý kózderinen qarajat tartý kózdelgen. Alaida erekshe mártebesi men salyq boiynsha jeńildikterine qaramastan,ýniversitet 97 paiyzǵa respýblikalyq biýdjet tarapynan qarjylandyrylyp otyr”, – dedi bas aýditor.
Smaiylovtyń aitýynsha, taǵy bir mańyzdy másele – ǵylymi zertteýlerdi kommertsiialandyrýdyń jetkiliksizdigi.
“Ǵylymi zertteýlerge kóp qarajat bólingenimen, olardyń tájiribede qoldanylýy nemese kommertsiialandyrylýy joqtyń qasy. Osy máseleler boiynsha ýniversitettiń jańa prezidentimen sóilestik. Sonymen qatar usynystarymyz ýniversitetke de, úkimetke de joldandy", – dep atap ótti Smaiylov.
Onyń aitýynsha, tekseris tórtinshi toqsanda aiaqtalǵan.
“Endi zańnamalyq bastama úkimetke tiesili. Biz jasaǵan qorytyndy men usynystar úkimetke jiberildi. Endi úkimet zańnamaǵa qandai ózgerister engizý keregin sheshýi tiis”, – dedi JAP basshysy.
