دەموكراتيا جولىنا ءبىر كۇندە ەمەس، كوپ جىلدان كەيىن تۇسكەن باتىس ەلدەرىنىڭ بىزگە ءجون سىلتەيتىن رەتى جوق.
ءبىز ءوز تاريحىمىزعا، داستۇرىمىزگە، ءتىلىمىز بەن دىنىمىزگە سۇيەنە وتىرىپ، دەموكراتيالىق قۇندىلىقتاردى بويىمىزعا ءسىڭىرىپ جاتىرمىز. بۇل تۋرالى پرەزيدەنت نۇرسۇلتان نازاربايەۆ «جاڭا گۋمانيتارلىق ءبىلىم. قازاق تىلىندەگى جاڭا وقۋلىق» جوباسى اياسىندا شىققان العاشقى وقۋلىقتاردىڭ تۇساۋكەسەرىندە ايتتى.
قازاق ەلىنىڭ ءوز سارا جولى بار
«اركىم ءوز تاعدىرىنا ءوزى جاۋاپتى. مەن تاۋەلسىزدىكتىڭ ءبىرىنشى كۇنىنەن باستاپ ەلدىڭ جۇگىن ارقالاپ كەلە جاتقان اداممىن. قانشا رەت باتىستان كەلىپ، «بىزدەگى سياقتى دەموكراتيا قىلىڭدار» دەپ ايتادى.
ءبىز قازاقپىز، ءبىز امەريكالىق، نەمىس، اعىلشىن ەمەسپىز. ءبىزدىڭ ءوزىمىزدىڭ تاريحىمىز، ءتىلىمىز، ءدىنىمىز، ءداستۇرىمىز بار.
ءبىز بۇكىل الەم سەكىلدى دەموكراتيا جولىمەن كەلە جاتقان حالىقپىز»، — دەدى پرەزيدەنت.
ءبىراق، مەملەكەت باسشىسىنىڭ ايتۋىنشا، ءبىر كۇننىڭ ىشىندە مىڭ جىلدىق شارۋانى اتتاپ كەتە المايمىز.
«امەريكا قۇراما شتاتتارىنا 250 جىل بولدى.
وسىدان ەلۋ جىل بۇرىن بۇل ەلدە قارا مەن اق ءبىر اۆتوبۋسقا وتىرمايتىن. ايەلدەر سايلاۋعا قاتىسپايتىن. ونى نەگە ۇمىتىپ كەتتىڭدەر.
باتىستاعىلار كاتوليكتەر عوي، ونىڭ ىشىندە پروتەستانتتار. پروتەستانت دەگەندەر وزىمە عانا جاۋاپ بەرەمىن، ىنىمە، باۋىرىما قارىزعا اقشا بەرە المايمىن، بەرسەم نەسيە رەتىندە بەرەمىن دەيتىندەر. ولاردا اعايىن-تۋىسقان دەگەن جوق، بالا 16 جاستان ۇيدەن كەتىپ، ءوزىن-وزى اسىراۋى كەرەك.
ءبىز قازاق ولاي بولا المايمىز عوي. ءوزىمىزدىڭ ءداستۇرىمىز بار.
ۇلكەندى، ايەلدى سىيلاپ، بالاسى اكەسىن، اكەسى اتاسىن قادىرلەگەن حالىقپىز.
ءبىز قازاقپىز، دەپ مەن ىلعي ولارعا ءتۇسىندىرىپ كەلەمىن»، — دەگەن نازاربايەۆ سينگاپۋردىڭ كوشباسشىسى بولعان لي كۋان يۋ-دىڭ تاعدىرىن ەسكە الدى.
«مەنىڭ جاقسى دوسىم بولعان مارقۇم لي كۋان يۋ دە سولاي الىسىپ ءوتتى. ول تۋرالى نە دەمەدى؟ ديكتاتور، اۆتوكرات دەدى. قانداي اۆتوكرات؟
«بەس جىل سايىن سايلانىپ وتىرعان ادامدى قالاي ديكتاتور، اۆتوكرات دەپ اتاۋعا بولادى؟» دەپ، ول دا دالەلدەپ ءجۇردى.
سوندىقتان ءبىزدىڭ ءوزىمىزدىڭ جولىمىز بار دەگەنىم سول. ءبىراق بۇكىل وركەنيتتەن الشاقتاپ كەتىپ، باسقا جەرگە بارامىز دەگەن ءسوز ەمەس. ءوز جولىمىزبەن باسقا وركەنيەت، وسكەن ەلدەرمەن تەڭ بولامىز دەگەن ءسوز»، — دەپ ءتۇيدى ءسوزىن پرەزيدەنت.
دەرەككوز: sputniknews.kz
