Demokratıa jolyna bir kúnde emes, kóp jyldan keıin túsken batys elderiniń bizge jón silteıtin reti joq.
Biz óz tarıhymyzǵa, dástúrimizge, tilimiz ben dinimizge súıene otyryp, demokratıalyq qundylyqtardy boıymyzǵa sińirip jatyrmyz. Bul týraly prezıdent Nursultan Nazarbaev «Jańa gýmanıtarlyq bilim. Qazaq tilindegi jańa oqýlyq» jobasy aıasynda shyqqan alǵashqy oqýlyqtardyń tusaýkeserinde aıtty.
Qazaq eliniń óz sara joly bar
«Árkim óz taǵdyryna ózi jaýapty. Men táýelsizdiktiń birinshi kúninen bastap eldiń júgin arqalap kele jatqan adammyn. Qansha ret batystan kelip, «bizdegi sıaqty demokratıa qylyńdar» dep aıtady.
Biz qazaqpyz, biz amerıkalyq, nemis, aǵylshyn emespiz. Bizdiń ózimizdiń tarıhymyz, tilimiz, dinimiz, dástúrimiz bar.
Biz búkil álem sekildi demokratıa jolymen kele jatqan halyqpyz», — dedi prezıdent.
Biraq, memleket basshysynyń aıtýynsha, bir kúnniń ishinde myń jyldyq sharýany attap kete almaımyz.
«Amerıka qurama shtattaryna 250 jyl boldy.
Osydan elý jyl buryn bul elde qara men aq bir avtobýsqa otyrmaıtyn. Áıelder saılaýǵa qatyspaıtyn. Ony nege umytyp kettińder.
Batystaǵylar katolıkter ǵoı, onyń ishinde protestanttar. Protestant degender ózime ǵana jaýap beremin, inime, baýyryma qaryzǵa aqsha bere almaımyn, bersem nesıe retinde beremin deıtinder. Olarda aǵaıyn-týysqan degen joq, bala 16 jastan úıden ketip, ózin-ózi asyraýy kerek.
Biz qazaq olaı bola almaımyz ǵoı. Ózimizdiń dástúrimiz bar.
Úlkendi, áıeldi syılap, balasy ákesin, ákesi atasyn qadirlegen halyqpyz.
Biz qazaqpyz, dep men ylǵı olarǵa túsindirip kelemin», — degen Nazarbaev Sıngapýrdyń kóshbasshysy bolǵan Lı Kýan Iý-dyń taǵdyryn eske aldy.
«Meniń jaqsy dosym bolǵan marqum Lı Kýan Iý de solaı alysyp ótti. Ol týraly ne demedi? Dıktator, avtokrat dedi. Qandaı avtokrat?
«Bes jyl saıyn saılanyp otyrǵan adamdy qalaı dıktator, avtokrat dep ataýǵa bolady?» dep, ol da dáleldep júrdi.
Sondyqtan bizdiń ózimizdiń jolymyz bar degenim sol. Biraq búkil órkenıtten alshaqtap ketip, basqa jerge baramyz degen sóz emes. Óz jolymyzben basqa órkenıet, ósken eldermen teń bolamyz degen sóz», — dep túıdi sózin prezıdent.
Derekkóz: sputniknews.kz
