ناۋرىز مەرەكەسى قارساڭىندا تۇركىستان قالاسىنا كەلۋشىلەر سانى كوبەيدى. بيىل تۇركى الەمىنىڭ استاناسى اتانعان كيەلى شاھارعا 17-24 ناۋرىز ارالىعىندا كەلەتىن تۋريستەر سانى 20 مىڭنان اسادى دەپ جوسپارلانۋدا. بۇل 7 تاۋلىككە جاسالعان الدىن الا مالىمەتكە نەگىزدەلگەن.

تۇركىستان قالاسىندا نومىرلىك قورى 1240 بولمەنى قۇرايتىن 59 ورنالاستىرۋ ورنى جۇمىس ىستەيدى.

ورنالاستىرۋ ورىندارىنىڭ ءبىر مەزەتتەگى تولتىرىمدىلىعى 2671 ادامدى قۇرايدى. مەرەكەلىك اپتادا تۇركىستان قالاسىنداعى ورنالاستىرۋ ورىندارى 100 پايىزعا تولىپ وتىر.

تۇركىستان قالاسىنىڭ اۋەجايىنان ءبىر اپتادا 34 اۋە رەيسى ورىندالماق. ونىڭ 10 رەيسى – حالىقارالىق. بارلىق اۋە رەيسىنىڭ جولاۋشىلار سانى 3881 ادامدى قۇرايدى. ىشكى – 2733، حالىقارالىق – 1148. اۋە رەيستەرى 85%-عا تولادى.

E-qonaq جۇيەسىنىڭ دەرەكتەرىنە سايكەس بيىلعى 2 ايدىڭ قورىتىندىسىمەن وڭىرىمىزگە 2228 شەتەلدىك تۋريست كەلگەن. اتالعان كورسەتكىش بىلتىرمەن سالىستىرعاندا 4،7 ەسە ارتقان. 2023 جىلدىڭ 2 ايىندا نەبارى 475 شەتەلدىك قوناق بولعان.

ايتا كەتەيىك، 21 ناۋرىز كۇنى ساعات 12:00-18:00 ارالىعىندا «جەڭىس» ساياباعىندا «نۇر جاۋعىزعان ءاز ناۋرىز» شاراسى وتەدى. وندا تەاترلاندىرىلعان قويىلىمدار، مەرەكەلىك كونسەرتتەر، سپورتتىق جارىستار ۇيىمداستىرىلادى.

كەشكى ساعات 19:30-دا كيەلى شاھارداعى «كونگرەسس حولل» كەشەنىندە حالىقارالىق «NAURYZ BIG FEST» فەستيۆالى وتەدى. كەشكە Turar، Aikyn، Murat Yaprak (تۇركيا)، Amalyat، Dj King Macarella (وزبەكستان) سىندى انشىلەر قاتىسادى. مەرەكەلىك شارانى عازيز ەربولات پەن اقبولات وتەباي جۇرگىزەدى. سونداي-اق Aida Kaumenova برەندىنىڭ ارنايى ءسان كورسەتىلىمى وتەدى.

22 ناۋرىزدا ساعات 11:00-دە ۇلىستىڭ ۇلى كۇنىنە وراي «كەرۋەن ساراي» كەشەنىندە «ارمىسىڭ، ءاز ناۋرىز!» مەرەكەلىك سالتاناتتى ءىس-شارا وتەدى. ءىس-شارا اياسىندا تەاترلاندىرىلعان قويىلىمدار، كونسەرتتىك باعدارلامالار، قولونەر شەبەرلەرى مەن سۋرەتشىلەر كورمەسى، ۇلتتىق تاعامداردىڭ كورمەسى، ۇلتتىق سپورتتىق ويىندار سايىسى ۇيىمداستىرىلادى.

ال كەشكى ساعات 19:30-دا «كەرۋەن ساراي» كەشەنىندە مەرەكەلىك گالا-كونسەرت وتەدى. بۇدان بولەك 22-23 ناۋرىز كۇندەرى تۇركىستان مۋزىكالىق دراما تەاترىندا «بورتە» سپەكتاكلى ساحنالانادى.