Naýryz merekesi qarsańynda Túrkistan qalasyna kelýshiler sany kóbeıdi. Bıyl Túrki áleminiń astanasy atanǵan kıeli shaharǵa 17-24 naýryz aralyǵynda keletin týrıser sany 20 myńnan asady dep josparlanýda. Bul 7 táýlikke jasalǵan aldyn ala málimetke negizdelgen.
Túrkistan qalasynda nómirlik qory 1240 bólmeni quraıtyn 59 ornalastyrý orny jumys isteıdi.
Ornalastyrý oryndarynyń bir mezettegi toltyrymdylyǵy 2671 adamdy quraıdy. Merekelik aptada Túrkistan qalasyndaǵy ornalastyrý oryndary 100 paıyzǵa tolyp otyr.
Túrkistan qalasynyń áýejaıynan bir aptada 34 áýe reısi oryndalmaq. Onyń 10 reısi – halyqaralyq. Barlyq áýe reısiniń jolaýshylar sany 3881 adamdy quraıdy. İshki – 2733, halyqaralyq – 1148. Áýe reısteri 85%-ǵa tolady.
E-qonaq júıesiniń derekterine sáıkes bıylǵy 2 aıdyń qorytyndysymen óńirimizge 2228 sheteldik týrıs kelgen. Atalǵan kórsetkish byltyrmen salystyrǵanda 4,7 ese artqan. 2023 jyldyń 2 aıynda nebári 475 sheteldik qonaq bolǵan.
Aıta keteıik, 21 naýryz kúni saǵat 12:00-18:00 aralyǵynda «Jeńis» saıabaǵynda «Nur jaýǵyzǵan áz Naýryz» sharasy ótedi. Onda teatrlandyrylǵan qoıylymdar, merekelik konsertter, sporttyq jarystar uıymdastyrylady.
Keshki saǵat 19:30-da kıeli shahardaǵy «Kongres Hol» kesheninde halyqaralyq «NAURYZ BIG FEST» festıvali ótedi. Keshke Turar, Aikyn, Murat Yaprak (Túrkıa), Amalyat, Dj King Macarella (Ózbekstan) syndy ánshiler qatysady. Merekelik sharany Ǵazız Erbolat pen Aqbolat Ótebaı júrgizedi. Sondaı-aq Aida Kaumenova brendiniń arnaıy sán kórsetilimi ótedi.
22 naýryzda saǵat 11:00-de Ulystyń uly kúnine oraı «Kerýen saraı» kesheninde «Armysyń, áz Naýryz!» merekelik saltanatty is-shara ótedi. İs-shara aıasynda teatrlandyrylǵan qoıylymdar, konserttik baǵdarlamalar, qolóner sheberleri men sýretshiler kórmesi, ulttyq taǵamdardyń kórmesi, ulttyq sporttyq oıyndar saıysy uıymdastyrylady.
Al keshki saǵat 19:30-da «Kerýen saraı» kesheninde merekelik Gala-konsert ótedi. Budan bólek 22-23 naýryz kúnderi Túrkistan mýzykalyq drama teatrynda «Bórte» spektakli sahnalanady.
