باتىس قازاقستان وبلىسىنىڭ اكىمى ناريمان تورەعالييەۆتىڭ توراعالىعىمەن وبلىستىق ينۆەستيسيالىق شتابتىڭ كەزەكتى وتىرىسى ءوتتى،- دەپ حابارلايدى Dalanews.kz
جيىندا ءوڭىر ەكونوميكاسىنا وتاندىق جانە شەتەلدىك ينۆەستيسيالاردى تارتۋ ماسەلەلەرى قارالدى. وبلىس اكىمى ءوز سوزىندە مەملەكەت باسشىسى قاسىم-جومارت كەمەل ۇلى توقايەۆتىڭ بۇل باعىتتى ۇكىمەت پەن جەرگىلىكتى اتقارۋشى ورگانداردىڭ باستى باسىمدىقتارىنىڭ ءبىرى رەتىندە بەلگىلەگەنىن اتاپ ءوتتى.
«قولايلى ينۆەستيسيالىق احۋال قۇرۋ – ءوڭىر ەكونوميكاسىنىڭ ورنىقتى دامۋىنىڭ نەگىزى. بۇل جاڭا وندىرىستەردى ىسكە قوسۋعا، جۇمىس ورىندارىن كوبەيتۋگە، سالىقتىق تۇسىمدەردى ارتتىرۋعا جانە حالىقتىڭ ءومىر ءسۇرۋ ساپاسىن جاقسارتۋعا جول اشادى» – دەدى ناريمان تورەعالييەۆ.
كاسىپكەرلىك جانە يندۋستريالىق-يننوۆاسيالىق دامۋ باسقارماسىنىڭ باسشىسى نۇرجان وتەپبايەۆ بايانداماسىندا ءبىرقاتار ءىرى جوبالارعا توقتالدى. اتاپ ايتقاندا، سۇيىق مەتانول ءوندىرۋ، اقجايىق اۋدانىنداعى «ساتيمولا» كاليي تۇزى كەن ورنىن يگەرۋ جۇمىستارى جانە وزگە دە ينۆەستيسيالىق باستامالار تانىستىرىلدى. سونىمەن قاتار وبلىس دەلەگاسياسىنىڭ جۇڭگو حالىق رەسپۋبليكاسىنا جاساعان ساپارى بارىسىندا الدىن الا كەلىسىلگەن قىتايلىق ينۆەستورلاردى تارتۋ ماسەلەلەرى ايتىلدى.
جيىن قورىتىندىسى بويىنشا وبلىس اكىمى اۋدان اكىمدەرى مەن باسقارما باسشىلارىنا جەتەكشىلىك ەتەتىن سالالار بويىنشا ينۆەستورلار تارتۋ جۇمىستارىن جانداندىرىپ، ناقتى ناتيجەلەرگە قول جەتكىزۋدى تاپسىردى.
