مينيستر تەگىن دارى-دارمەك الۋ جۇيەسى بۇرىن تەك كوممەرسيالىق ءدارىحانالاردا جۇمىس ىستەگەنىن العا تارتتى.
– ولار (كوممەرسيالىق ءدارىحانالار) اقشا سۇرادى. ءسويتىپ، 2015 جىلعا دەيىن دارى-دارمەك قۇنىنىڭ 25% كولەمىندەگى ۇستەماقى تولەنىپ كەلدى. مەنىڭ ويىمشا، بۇل قوماقتى سوما. ەندى وسى 25%ء-تى بىرەۋگە بەرگەنشە، ادام ەمحاناعا كەلىپ، رەسەپت بويىنشا دارى-دارمەك العانى ءتيىمدى دەپ سانايمىز. بولاشاقتا ءبىز ادامداردىڭ كەز كەلگەن ءدارىحانادان وزىنە قاجەتتى ءدارىنى تەگىن الاتىن جۇيەگە ورالعىمىز كەلەدى، – دەدى ءبىرتانوۆ.
بۇدان بىلاي ءدارىحانالار اراسىندا تەندەر وتكىزىلمەيدى. ەگەر ادامنىڭ قولىندا رەسەپ بولسا، بارلىق ءدارىحانالار تەگىن ءدارى بەرەدى.
– ول ءۇشىن ءبىز بۇكىل جۇيەنى سيفرلاندىرۋ ارقىلى بۋحگالتەرلىك ەسەپتى كورىپ وتىرۋىمىز كەرەك. مىسالى، ءبىر ادام تەگىن دارى-دارمەك الۋعا كەلسە، ءدارىحانا ساتۋشىلارى «بىزدە تولەم جوق» دەۋى مۇمكىن. وسىنداي ارەكەتتىڭ الدىن الۋ ءۇشىن تەگىن ەلەكتروندى رەسەپتتەر جۇيەسىن جاسادىق. ءقازىر بۇل جۇيە جەكە ءدارىحانالاردا سىناقتان ءوتىپ جاتىر. سىناق ەكى جىلعا سوزىلادى، – دەدى مينيستر.
بۇگىنگى تاڭدا ادامدار تەگىن دارى-دارمەك الۋ ءۇشىن ەمحانالارعا بارۋعا ءماجبۇر.
"كوپ جاعدايدا تەگىن دارىلەر الدىن الا بەكىتىلگەن جوسپار بويىنشا سوزىلمالى اۋرۋلارعا عانا (جۇقپالى اۋرۋلارعا ەمەس) بەرىلەدى، - دەپ ءتۇسىندىردى ءبىرتانوۆ.
ال ەندى ۇيگە شاقىرىلاتىن دارىگەرلەر ءۇشىن دەنە قىزۋىن تومەندەتەتىن پرەپارات الۋ پروبلەماسى دا ماڭىزدى.
– بۇل ماسەلەدەن حابارىمىز بار جانە ونىڭ شەشىمىن جاقىن ارادا تابامىز دەپ ويلايمىن. سول سياقتى ادامنىڭ جەكە سايكەستەندىرۋ نومىرىنە رەسەپتىنى تىركەۋ ارقىلى تاۋلىك بويى ىستەيتىن كەز-كەلگەن ءدارىحانادان دارى-دارمەك الاتىن جۇيەنى ىسكە قوسامىز، – دەدى مينيستر.
قازاقستاندا قانداي دارى-دارمەكتەر تەگىن بەرىلۋى مۇمكىن
ەلىمىزدە 1 قاڭتاردان باستاپ الەۋمەتتىك ماڭىزدى اۋرۋ ساناتىنداعى 32 توپتىڭ بىرىندە تىركەلگەن پاسيەنتتەر مەملەكەت ەسەبىنەن دارى-دارمەكتەرمەن قامتاماسىز ەتىلەدى. ولاردىڭ قاتارىندا ونكولوگيا، تۋبەركۋلەز، ۆيچ، قانت ديابەتى، ۆ جانە س ۆيرۋستىق گەپاتيتى، ارتەريالىق گيپەرتەنزيا سياقتى سىرقات تۇرلەرى بار.
ال مىندەتتى الەۋمەتتىك مەديسينالىق ساقتاندىرۋ قاتىسۋشىلارى ءۇشىن دارى-دارمەكتىڭ 41 توبىنىڭ بىرىنە تىركەلگەندەرگە قولجەتىمدى بولدى. مينيسترلىك وكىلدەرىنىڭ ايتۋىنشا، بۇل شامامەن 300-گە جۋىق دياگنوز ءتۇرى. اۋرۋ مەن دارى-دارمەكتەردىڭ ءتىزىمىن مىنا سىلتەمەدەن قاراۋعا بولادى.
