وپەك+ شىلدەدە مۇناي ءوندىرىسى كولەمىن الدىڭعى ەكى ايداعىداي بىردەي مولشەردە ۇلعايتۋ تۋرالى قابىلداعان شەشىمى "قارا التى"» باعاسىنا 1 دوللار قۇن ۇستەمەلەدى. Brent ماركالى مۇناي فيۋچەرستەرىنىڭ ءبىر باررەلى 63،97 دوللارعا، WTI ماركالى مۇنايدىڭ ءبىر باررەلى 62،09 دوللارعا دەيىن قىمباتتادى. ەكى برەندتىڭ دە مۇناي جەتكىزۋ فيۋچەرستەرى ءقازىردىڭ وزىندە ءوسىمدى جالعاستىرۋدا. سوڭعى مالىمەتتەر بويىنشا، Brent مۇنايىنىڭ قۇنى 64،31 دوللارعا جەتىپ، 2،44%-عا تاعى ءوستى، دەپ حابارلايدى Dalanews.kz.
ساۋد ارابياسى، رەسەي، يراك، ءباا، الجير، كۋۆەيت، قازاقستان جانە ومان 30 مامىردا مۇنايدىڭ تاۋلىكتىك ءوندىرىسىن 2025 جىلدىڭ شىلدەسىندە 411 000 باررەلگە ۇلعايتۋعا كەلىستى. بۇل تۋرالى وپەك سايتىندا جاريالانعان ەلدەردىڭ بىرلەسكەن مالىمدەمەسىندە ايتىلادى. نەگىزىنەن، شىلدەدە مۇناي ءوندىرىسى كولەمىن ۇلعايتۋ تۋرالى شەشىم قابىلداعان وپەك + ۇيىمىنىڭ سەگىز مۇشەسى الدىندا ءوز ەركىمەن رەسۋرستاردى ءوندىرىسىن تاۋلىگىنە 2،2 ميلليون باررەلگە قىسقارتقان بولاتىن. ساۋىردە ولار وسى شەكتى كولەمدى اقىرىنداپ بوساتا باستاۋعا كەلىسكەن.
Reuters باسىلىمىنىڭ حابارلاۋىنشا، نەگىزىنەن، تاۋلىكتىك ءوسىم كولەمى شىلدەدە بۇدان دا كوپ بولادى دەپ ەسەپتەلگەن. ەگەر باعانى تاعى تومەندەتۋ ماقساتى بولسا. ءبىراق ونداي توسىنسىي بولمادى. وعان قوسا اقش نارىعىندا بۇرعىلاۋ بەلسەندىلىگىنىڭ تومەندەۋى بايقالادى: جۇمىس ىستەپ تۇرعان قوندىرعىلاردىڭ سانى 461-گە دەيىن قىسقاردى، بۇل - 2021 جىلدىڭ قاراشاسىنان بەرگى ەڭ تومەنگى كورسەتكىش. باعالارعا قوسىمشا قولداۋ اقش-تاعى جانار-جاعارمايعا سۇرانىستىڭ ارتۋى بولدى: اپتاسىنا تاۋلىگىنە 1 ميلليون باررەلگە جۋىق، بۇل - سوڭعى ءۇش جىلداعى ەڭ ۇلكەن سەكىرىستەردىڭ ءبىرى. سونىمەن قاتار، داۋىل مەن سۋنامي بەلسەندى بولاتىن ماۋسىم جاقىنداپ كەلەدى، بۇل تاسىمالعا قاتىستى بەلگىلى ءبىر ماسەلە تۋعىزۋى مۇمكىن. وسى جاعىنان العاندا، كوتەرىلگەن مۇناي باعاسى ارى قاراي ءوز جالعاستىعىن تابۋى مۇمكىن بە؟
ەكونوميست رۋسلان سۇلتانوۆ مۇناي باعاسىنداعى قازىرگى وزگەرىس قىسقارمەرزىمدى قۇبىلىس بولعانىمەن الدا ءوسىمنىڭ تاعى ورىن الۋىن جوققا شىعارمايدى.
"مۇناي نارىعى OPEC-تءىڭ بولجامدى قادامدارىنىڭ ارقاسىندا قىسقامەرزىمدى ءوسىمدى بايقاتتى، ءبىراق ىرگەلى تاۋەكەلدەر ءالى دە ساقتالىپ وتىرعانىن ەستەن شىعارماعان ابزال. اقش-تاعى ماۋسىمدىق سۇرانىس جانە ءوندىرىستىڭ تومەندەۋى الداعى اپتالاردا باعانىڭ قۇبىلمالىلىعىنا قايتا جول اشۋى مۇمكىن"، - دەيدى ول.
بۇعان دەيىن سايتىمىزدا "قازاقستان ەۋروپاعا مۇناي تاسىمالداۋشى ءىرى ءۇش ەلدىڭ قاتارىنان كورىندى" دەگەن ماتەريال جاريالانعان بولاتىن.
