كەيىنگى ۋاقىتتا سەمەيدە جاعا ۇستاتارلىق جاعدايلار جيىلەپ كەتتى. جاڭا جىل قارساڭىندا جاس ءمۇعالىم شىرشا بەزەندىرەمىن دەپ بيىكتەن قۇلاپ، اۋىر جاراقات السا، كۇنى كەشە ءبىر توپ ءجاسوسپىرىم تومەنگى سىنىپ وقۋشىسىنا الىمجەتتىك كورسەتكەنى بەلگىلى بولدى. بەلگىلى ۇستاز، Qazbilim جوباسىنىڭ اۆتورى اياتجان احمەتجان ۇلى اتالعان جاعدايعا بايلانىستى پىكىر ءبىلدىرىپ، ماسەلەنىڭ ءتۇپ-تامىرى تەرەڭدە جاتقانىن ايتتى، دەپ حابارلايدى Dalanews.kz.

“مەن ول جەردەن ەشتەڭە كۇتپەدىم. سەبەبى قالا اكىمى مەن ءبىلىم ءبولىمى باسشىسىنىڭ مۇعالىمگە الىمجەتتىك جاساۋىنان ءمۇعالىم شىرشادان ۇشىپ كەتىپ، جارالاندى ەمەس پە؟ ءدال سوندايلار توقتاعاندا عانا وقۋشىلار اراسىنداعى الىمجەتتىك تە توقتاۋى مۇمكىن”، - دەيدى ول.

ونىڭ ايتۋىنشا، قوعامداعى قاتىگەزدىك پەن زورلىق-زومبىلىق ەرەسەكتەردىڭ بىر-بىرىنە كورسەتەتىن قارىم-قاتىناسىنان باستاۋ الادى.

“اۋىرلاۋ شىعار. ءبىراق اگرەسسيا اگرەسسيانى تۋدىرادى. اكىمشىلىكتىڭ مۇعالىمگە كورسەتكەن اگرەسسياسى — ءمۇعالىمنىڭ وقۋشىعا اگرەسسياسىن تۋدىرادى. ءمۇعالىم مەن اتا-انانىڭ بالاعا كورسەتكەن اگرەسسياسى — ولاردىڭ جۇرەگىن قاتايتىپ، بىر-بىرىنە اگرەسسياسىن تۋدىرادى.

ۇيىندە اتا-اناسى بالاسىنىڭ كوزىنشە بوقتىق ءسوزدى ەركىن قولدانىپ، اۋىر سوزدەر ايتاتىن بولسا، بالا ءۇشىن بۇل قالىپتى جاعدايعا اينالادى. مۇنداي ورتادا وسكەن بالا بوقتاۋدى دا، توبەلەستى دە، الىمجەتتىكتى دە قالىپتى قۇبىلىس رەتىندە قابىلدايدى. ويتكەنى بالاپان ۇيادا نە كورسە، ۇشقاندا سونى ىلەدى”، — دەپ قوستى ول.

ۇستاز بۇل وقيعانىڭ قوعامدى ءدۇر سىلكىندىرگەنىمەن، شىن مانىندە جابۋلى كۇيىندە قالىپ جاتقان جاعدايلاردىڭ الدەقايدا كوپ ەكەنىن ايتتى.

“سەمەيدەگى جاعداي جاعانى ۇستاتىپ، قوعامدى ءدۇر سىلكىندىردى. ءتىپتى وقۋشى ەمەس، كادىمگى قىلمىسكەرلەر اراسىندا دا ونداي قاتىگەزدىك بولماس. ءبىراق بۇل — اشىققا شىعىپ، جەلىگە تاراعان جاعداي. ال ەل ىشىندە ايتىلماي قالعان وقيعالار قانشاما؟

سەبەبى نەدە؟

نەگە بۇنداي وقيعالار جيىلەپ كەتتى؟

سەبەبى قوعامدا قاتىگەزدىك كوپ. وتىرىك كوپ، الاياقتىق كوپ. جەمقورلىق، ۇرلىق-قارلىق، سىبايلاستىق. وتباسىنداعى اڭگىمە دە، ادامدار ورتاسىنداعى اڭگىمە دە — وسى. ونەگەلى اڭگىمە، ۇلگى الار وقيعا تىم از، ازدىڭ ءوزىنىڭ ءناسيحاتى جوق.

ال، جاماندىقتىڭ جارناماسى كوپ، داقپىرتى قالىڭ، شۋى قاتتى.

ال ونەگەنى قالاي كورسەتەمىز؟

ءتىپتى ءقازىر ادەبيەت تە، كينو دا، ونەر دە ادام تاربيەلەۋگە ۇمتىلماۋ كەرەك. ونىڭ ميسسياسى انا-مىنا دەيتىندەر كوبەيدى. ەندى كىم، نە تاربيەلەيدى بۇل ۇرپاقتى؟

ال، تاربيەنىڭ وشاعى وتباسى مەن مەكتەپتەگى تاربيەنى ايتساق، كوزدى ءبىراز سىعىمداۋعا، اشىنىپ اھ ۇرۋعا تۋرا كەلەدى”، — دەيدى ول.

احمەتجان ۇلىنىڭ پىكىرىنشە، وقۋشىنىڭ ءۇش تىرەگى – وتباسى، مەكتەپ جانە قوعام – ۇلتتىق قۇندىلىقتارعا سۇيەنە وتىرىپ، تاربيەنى كۇشەيتۋى قاجەت.

“قوعامداعى ءار ادام وسكىندى تاربيەلەۋشى!

ۇلتتىق قۇندىلىق، ۇلتتىق تاربيە جۇيەدەن ۇلتتىق مەكتەپ كەرەك!

ايعاي سالعىم كەلەدى!”، — دەپ ءسوزىن تۇيىندەدى ول.

ايتا كەتەيىك، بۇعان دەيىن سەمەيدە ءبىر توپ ءجاسوسپىرىم 6-سىنىپ وقۋشىسىن جابىلىپ تەپكىنىڭ استىنا العان ەدى. سونىمەن قاتار ونى قورلاپ، مۇشەقاپ ۇرلەتىپ، ۆيدەوعا تۇسىرگەن.

ءقازىر پوليسيا بولعان وقيعا بويىنشا قىلمىستىق ءىس قوزعادى.

وسى جاعدايعا بايلانىستى مەكتەپ ديرەكتورى جۇمىستان بوساتىلدى.

ال الىمجەتتىك كورسەتكەن بالالار ارنايى مەكتەپتەردە وقيتىندى بولدى.

سونىمەن قاتار وتكەن جىلى جاڭا جىلدىق شىرشانى بەزەندىرۋ كەزىندە 23 جاستاعى ءمۇعالىم بيىكتەن قۇلاپ، اۋىر جاراقات العان ەدى. ول ءبىراز ۋاقىت توسەك تارتىپ جاتىپ قالدى. تەكسەرۋ بارىسىندا ەڭبەك ينسپەكسياسى جۇمىس بەرۋشىنىڭ كىناسىن تولىق دالەلدەدى. ءسويتىپ جۇمىس بەرۋشى زارداپ شەككەن پەداگوگتىڭ ەم-دوم كەزەڭىندەگى جالاقىسىن تولىق تولەۋگە جانە ەمگە جۇمساعان شىعىندارىن وتەۋگە مىندەتتەلدى.