وكىنىشكە قاراي، كەيىنگى كەزدەرى الەۋمەتتىك جەلىلەر مەن كەيبىر سايتتاردا قازاقستان مۇسىلماندارى ءدىني باسقارماسىن، باس ءمۇفتي باستاعان ءدىن قىزمەتكەرلەرىن قارالاعان، اقيقاتتان الىس، نەگىزسىز جازبالار جاريالانىپ جاتىر.
مۇنى ءمۇفتياتقا قارسى جاسالىپ جاتقان اشىق كيبەربۋللينگ دەۋگە بولادى.
كۇيە جاعۋشىلار مەنى دە اينالىپ وتپەپتى. Kznews.kz دەگەن پورتالدا تۇراربەك قۇسايىنوۆ ەسىمدى ادام «ول ەگيپەتتە وقىپ جۇرگەن كەزدە حاباشيتتەر دەيتىن شافييت ءمازحابىنداعى سوپىلىق باعىتتى ۇستاناتىن اعىم وكىلدەرىنىڭ ىقپالىنا ءتۇسىپ كەتكەن.
حاباشيت اعىمىنىڭ نەگىزىن قالاعان ابدوللا ءال-حاراريدى ءپىر تۇتقان» دەپ مەنى نەگىزسىز ايىپتاپ، ار-نامىسىما تيەتىن جازبا جاريالادى.
بۇل ماعان جابىلعان جالا ەكەنىن مالىمدەيمىن. مەنىڭ حاباشيتتەرگە دە، ول اعىمنىڭ نەگىزىن قالاعان ابدوللا ال-حاراريگە دە ەشقانداي قاتىسىم جوق. ول ادامدى ءپىر تۇتقان دا ەمەسپىن. جالپى بىرەۋدى ءپىر تۇتىپ، پىرگە قول تاپسىرعان جان ەمەسپىن. حاباشيتتەردىڭ ىقپالىنا تۇسپەدىم، ولاردى قولداعان ەمەسپىن جانە قولدامايمىن دا. سەبەبى تاكفيرلىك (بىرەۋدى كۇپىرلىككە شىعارۋ) يدەياعا نەگىزدەلگەن حاباشيتتىك اعىم ەلىمىز ءۇشىن جات. ول اعىمدى ەشقاشان ناسيحاتتاعان ەمەسپىن.
يسلامتانۋشى، تەولوگ رەتىندە كوپتەگەن ءدىني اعىمدى زەرتتەپ، ساراپتاپ، تالداپ جۇرگەنىمدى كوپشىلىگىڭىز بىلەسىزدەر. زەرتتەۋ ماقساتىمەن كوپتەگەن لەكسيالارعا قاتىسىپ، ءتۇرلى اۆتورلاردىڭ كىتاپتارىن وقىدىم.
قازىرگى ۋاقىتتا دا ءتۇرلى كىتاپتاردى وقۋعا تۋرا كەلەدى. سەبەبى ول مەنىڭ يسلامتانۋشى رەتىندەگى مىندەتىم. سونداي كىتاپتاردى زەرتتەۋ ارقىلى ساراپتامالىق-تالداۋ جاساپ، بىلىكتىلىگىمدى ارتتىرىپ كەلەمىن.
ەگەر قانداي دا ءبىر جات اعىم وكىلىنىڭ لەكسياسىن تىڭداماساڭ نەمەسە كىتابىن وقىماساڭ، ول اعىمنىڭ جات، قاتە ءىلىم ەكەنىنە قالاي كوز جەتكىزۋگە بولادى؟ مىسالى، تاقيۋددين ءان-ناباھانيدىڭ «ءاش-شاحسياتۋ ءال-يسلاميا» كىتابىن وقىماسام، «حيزبۋت-تاحرير» (ق ر اۋماعىندا تىيىم سالىنعان) اعىمى يدەولوگياسىنىڭ تەرىس تۇستارىن قايدان بىلەمىن؟
سول سياقتى حاباشيت اعىمىنىڭ ەلىمىزگە جات ەكەنىن ءبىلۋ ءۇشىن سول اعىمنىڭ نەگىزىن قالاۋشى ابدوللا ءال-حاراريدىڭ ەڭبەكتەرىن وقۋىما، ونىڭ ارتىنان ەرگەن يدەولوگتارىنىڭ لەكسيالارىن تىڭداۋىما تۋرا كەلەدى. سونى العا تارتىپ مەنى حاباشيتتەردىڭ ىقپالىنا ءتۇستى دەپ ايىپتاۋ نەگىزسىز.
جوعارىداعى جازبادا مەنىڭ ءدىني ءبىلىم دەڭگەيىم مەن ديپلومدارىمدى سىنعا العان ەكەن. ديپلومدارىمنىڭ بارلىعى ءتيىستى زاڭدى تەكسەرىلۋدەن تولىق وتكەن. ال ءدىني ءبىلىمىمنىڭ دەڭگەيىنە ەلىمىزدىڭ بەدەلدى عالىمدارى مەن ارىپتەستەرىم كۋا.
وفوق كل ذي علم عليم
اللا تاعالا قۇراننىڭ «ءجۇسىپ» سۇرەسىنىڭ 76-اياتىندا: «ءاربىر ءبىلىم يەسىنەن دە اسقان عالىم (اللا) بار» دەي كەلىپ، ءوزىم ءبىلىمدىمىن دەپ ماقتانعان ادامنان اسقان باسقا ءبىر ءبىلىمدى تابىلاتىنىن جانە ءوزىنىڭ شەكسىز، ءازالي ءبىلىم يەسى ەكەنىن ەسكەرتەدى.
اللا تاعالا ەلىمىزدىڭ سىرتىن جاۋدان، ءىشىن داۋدان ساقتاعاي. ءاۋمين!
