زاڭگەر ەرٸ ادۆوكات سەرٸك ايتباەۆ قازاقستاندا قورعانىس مينيسترلەرٸ قىزمەتتە قانشا ۋاقىت وتىرعانى, ولاردىڭ قىزمەتتەن كەتۋ سەبەپتەرٸ تۋرالى پٸكٸر بٸلدٸردٸ, دەپ حابارلايدى dalanews.kz.
ونىڭ سٶزٸنشە, قورعانىس مينيسترلٸگٸن 34 جىلدا 14 ادام باسقارعان. مۇحتار التىنباەۆ بۇل قىزمەتتٸ ەكٸ رەت اتقارعان. مينيسترلەردٸڭ قىزمەتتەگٸ ورتاشا مەرزٸمٸ 2,4 جىل بولعان. ەڭ ۇزاق قىزمەت اتقارعاندار - مۇحتار التىنباەۆ (2001-2007) پەن ەدٸلبەك جاقسىبەكوۆ (2009-2014).
سەرٸك ايتباەۆتىڭ ايتۋىنشا, 2014 جىلعا دەيٸن مينيسترلەر بۇل قىزمەتتە ورتا ەسەپپەن 3,1 جىل وتىرسا, ودان كەيٸنگٸ كەزەڭدە بۇل كٶرسەتكٸش 1,8 جىلعا دەيٸن قىسقارعان.
قورعانىس مينيسترلەرٸنٸڭ قىزمەتتەن كەتۋ سەبەپتەرٸ ەرتٷرلٸ بولعان. كەيبٸرٸ باسقا قىزمەتكە اۋىسۋىنا نەمەسە كادرلىق اۋىس-تٷيٸسكە بايلانىستى قىزمەتتەن كەتكەن. مەسەلەن, ەدٸلبەك جاقسىبەكوۆ 2014 جىلى مەملەكەتتٸك حاتشى بولىپ تاعايىندالسا, يمانعالي تاسماعامبەتوۆ قورعانىس مينيسترلٸگٸنەن كەيٸن ۆيتسە-پرەمەر قىزمەتٸنە اۋىسقان.
بٸرقاتار مينيستردٸڭ وتستاۆكاسىنىڭ ناقتى سەبەبٸ رەسمي تٷردە ايتىلماعان. ولاردىڭ قاتارىندا ەلٸبەك قاسىموۆ, سەت توقپاقباەۆ پەن دانيال احمەتوۆ بار.
كەي جاعدايلاردا مينيسترلەردٸڭ قىزمەتتەن كەتۋٸ ەسكەري سالاداعى ٸرٸ وقيعالاردان كەيٸن بولعان. مەسەلەن, مۇحتار التىنباەۆتىڭ العاشقى قىزمەت مەرزٸمٸ 1999 جىلى پايدالانۋدان شىعارىلعان 38 ميگ-21 ۇشاعىنىڭ سولتٷستٸك كورەياعا ساتىلۋىنا قاتىستى جانجالدان كەيٸن اياقتالعان.
سەكەن جاسۇزاقوۆ 2018 جىلى قورعانىس مينيسترلٸگٸنەن كەيٸن ۇلتتىق قورعانىس ۋنيۆەرسيتەتٸن باسقاردى. 2019 جىلى ارىستاعى وق-دەرٸ قويماسىندا جارىلىس بولىپ, ٷش ادام قازا تاپقاننان كەيٸن ول قارۋلى كٷشتەر قاتارىنان بوساتىلدى.
2021 جىلى جامبىل وبلىسىنداعى ينجەنەرلٸك وق-دەرٸلەر قويماسىندا بولعان ٶرت پەن جارىلىستان 17 ادام قازا تاپتى. سول كەزدە قورعانىس مينيسترٸ بولعان نۇرلان ەرمەكباەۆ قىزمەتتەن كەتۋگە دايىن ەكەنٸن ايتىپ, كەيٸن وتستاۆكاسى قابىلداندى.
مۇرات بەكتانوۆ 2022 جىلعى قاڭتار وقيعالارىنان كەيٸن قىزمەتٸنەن بوساتىلدى. كەيٸن ول قىلمىستىق ٸس بويىنشا سوتتالىپ, 2023 جىلى ەسكەري سوت ونى 12 جىلعا باس بوستاندىعىنان ايىردى.
رۋسلان جاقسىلىقوۆ 2025 جىلى قورعانىس مينيسترٸ قىزمەتٸنەن بوساتىلدى. ونىڭ قىزمەتتەن كەتۋ سەبەبٸ رەسمي تٷردە جارييالانعان جوق.
ال دەۋرەن قوسانوۆ 2026 جىلعى 27 قىركٷيەكتە كاسپييدەگٸ قايعىلى وقيعادان ٷش كٷن ٶتكەن سوڭ قىزمەتٸنەن بوساتىلدى. 24 قىركٷيەكتە ماڭعىستاۋ وبلىسىندا وقۋ-جاتتىعۋ كەزٸندە 17 ەسكەري قىزمەتشٸ تەڭٸزگە تٷسٸپ, ٷشەۋٸ قۇتقارىلعان. وسى وقيعاعا بايلانىستى بەس لاۋازىمدى تۇلعا ۇستالدى. الايدا دەۋرەن قوسانوۆتى قىزمەتتەن بوساتۋ تۋرالى جارلىقتا ناقتى سەبەپ كٶرسەتٸلمەگەن.
سەرٸك ايتباەۆ ٶز تالداۋىندا قورعانىس مينيسترلەرٸنٸڭ 14 وتستاۆكاسىن بٸرنەشە توپقا بٶلدٸ. ونىڭ ەسەبٸنشە, بٸر مينيستر جاسىنا بايلانىستى قىزمەتتەن كەتكەن, تٶرتەۋٸ باسقا قىزمەتكە اۋىسقان نەمەسە كادرلىق اۋىس-تٷيٸس كەزٸندە كەتكەن. تاعى تٶرت جاعدايدا وتستاۆكانىڭ ناقتى سەبەبٸ جارييالانباعان. ال بەس مينيستردٸڭ قىزمەتتەن كەتۋٸ جانجال, اپات نەمەسە قىلمىستىق ٸستەرمەن تۇسپا-تۇس كەلگەن.
