Zańger ári advokat Serik Aitbaev Qazaqstanda qorǵanys ministrleri qyzmette qansha ýaqyt otyrǵany, olardyń qyzmetten ketý sebepteri týraly pikir bildirdi, dep habarlaidy dalanews.kz.
Onyń sózinshe, Qorǵanys ministrligin 34 jylda 14 adam basqarǵan. Muhtar Altynbaev bul qyzmetti eki ret atqarǵan. Ministrlerdiń qyzmettegi ortasha merzimi 2,4 jyl bolǵan. Eń uzaq qyzmet atqarǵandar - Muhtar Altynbaev (2001-2007) pen Ádilbek Jaqsybekov (2009-2014).
Serik Aitbaevtyń aitýynsha, 2014 jylǵa deiin ministrler bul qyzmette orta eseppen 3,1 jyl otyrsa, odan keiingi kezeńde bul kórsetkish 1,8 jylǵa deiin qysqarǵan.
Qorǵanys ministrleriniń qyzmetten ketý sebepteri ártúrli bolǵan. Keibiri basqa qyzmetke aýysýyna nemese kadrlyq aýys-túiiske bailanysty qyzmetten ketken. Máselen, Ádilbek Jaqsybekov 2014 jyly Memlekettik hatshy bolyp taǵaiyndalsa, Imanǵali Tasmaǵambetov Qorǵanys ministrliginen keiin vitse-premer qyzmetine aýysqan.
Birqatar ministrdiń otstavkasynyń naqty sebebi resmi túrde aitylmaǵan. Olardyń qatarynda Álibek Qasymov, Sát Toqpaqbaev pen Danial Ahmetov bar.
Kei jaǵdailarda ministrlerdiń qyzmetten ketýi áskeri saladaǵy iri oqiǵalardan keiin bolǵan. Máselen, Muhtar Altynbaevtyń alǵashqy qyzmet merzimi 1999 jyly paidalanýdan shyǵarylǵan 38 MiG-21 ushaǵynyń Soltústik Koreiaǵa satylýyna qatysty janjaldan keiin aiaqtalǵan.
Sáken Jasuzaqov 2018 jyly Qorǵanys ministrliginen keiin Ulttyq qorǵanys ýniversitetin basqardy. 2019 jyly Arystaǵy oq-dári qoimasynda jarylys bolyp, úsh adam qaza tapqannan keiin ol Qarýly kúshter qatarynan bosatyldy.
2021 jyly Jambyl oblysyndaǵy injenerlik oq-dáriler qoimasynda bolǵan órt pen jarylystan 17 adam qaza tapty. Sol kezde qorǵanys ministri bolǵan Nurlan Ermekbaev qyzmetten ketýge daiyn ekenin aityp, keiin otstavkasy qabyldandy.
Murat Bektanov 2022 jylǵy qańtar oqiǵalarynan keiin qyzmetinen bosatyldy. Keiin ol qylmystyq is boiynsha sottalyp, 2023 jyly áskeri sot ony 12 jylǵa bas bostandyǵynan aiyrdy.
Rýslan Jaqsylyqov 2025 jyly qorǵanys ministri qyzmetinen bosatyldy. Onyń qyzmetten ketý sebebi resmi túrde jariialanǵan joq.
Al Dáýren Qosanov 2026 jylǵy 27 qyrkúiekte Kaspiidegi qaiǵyly oqiǵadan úsh kún ótken soń qyzmetinen bosatyldy. 24 qyrkúiekte Mańǵystaý oblysynda oqý-jattyǵý kezinde 17 áskeri qyzmetshi teńizge túsip, úsheýi qutqarylǵan. Osy oqiǵaǵa bailanysty bes laýazymdy tulǵa ustaldy. Alaida Dáýren Qosanovty qyzmetten bosatý týraly jarlyqta naqty sebep kórsetilmegen.
Serik Aitbaev óz taldaýynda qorǵanys ministrleriniń 14 otstavkasyn birneshe topqa bóldi. Onyń esebinshe, bir ministr jasyna bailanysty qyzmetten ketken, tórteýi basqa qyzmetke aýysqan nemese kadrlyq aýys-túiis kezinde ketken. Taǵy tórt jaǵdaida otstavkanyń naqty sebebi jariialanbaǵan. Al bes ministrdiń qyzmetten ketýi janjal, apat nemese qylmystyq istermen tuspa-tus kelgen.
