ءبىلىم باسكەسىندە بالعىنداردىڭ ءباسى جوعارى بولۋى ءۇشىن، نۇرسۇلتان نازاربايەۆ قورى مەن ەلباسى اكادەمياسى ءتۇرلى زياتكەرلىك دودالاردى  جۇزەگە اسىرادى. سونىڭ ىشىندەگى ءىرى جوبالاردىڭ ءبىرى – «مىڭ بالا» ۇلتتىق وليپياداسى.

جارىس اۋىلدى جەرلەردەگى 5-6 سىنىپ وقۋشىلارى اراسىندا وتكىزىلەدى.  2020 جىلى اتالعان سايىس ءبىرىنشى رەت باستاۋ العان بولاتىن. وتكەن جىلى، وليمپياداعا الماتى وبلىسىنان 65 مىڭعا جۋىق وقۋشى قاتىستى.  ناتيجەسىندە 196 بالا جۇلدەگەرلەر قاتارىنان كورىنىپ، 107 جەڭىمپاز وبلىستاعى دارىندى بالالارعا ارنالعان مامانداندىرىلعان مەكەمەلەرگە ەمتيحان تاپسىرماستان قابىلدانىپ،  قازىرگى تاڭدا وقىپ جاتىر.

«جوبادا ۇزدىك شىققان ورەندەرگە، الماتى وبلىسىنداعى 9 بىردەي مامانداندىرىلعان ءبىلىم مەكەمەلەرىندە وقۋ ءۇشىن گرانت الۋعا مۇمكىندىگى بەرىلەدى.  ءبىر ەسكەرتەرلىگى، ايماقتاعى ۇزدىك وقۋ ورىندارىنا 6 سىنىپ وقۋشىلارىنىڭ اراسىنداعى دارىندىلار عانا قابىلدانادى. ال، 5 سىنىپ وقيتىن بالار اراسىندا توپ جارعاندار  ەلباسى اكادەمياسىنىڭ «بىرگە وقۋ» ونلاين-مەكتەبىندە پاندىك دايىندىقتان وتەدى»،-دەيدى الماتى وبلىسى ءبىلىم باسقارماسى باسشىسىنىڭ ورىنباسارى ايجان مامان قىزى.

اعىمداعى جىلى «مىڭ بالا» ۇلتتىق وليمپياداسىنا تىركەلۋ جۇمىستارى 24 اقپان مەن 24 ناۋرىز ارالىعىندا  جۇرگىزىلەدى. بۇگىنگى كۇنگە دەيىن، 26 مىڭ وقۋشى وليمپياداعا قاتىسۋعا ءوتىنىم بەرىپ ۇلگەرگەن.  تەستىلەۋگە  ءوتىنىم قالدىرۋ ءۇشىن https://1000bala.elbasyacademy.kz/ سايتىندا قاتىسۋشىنىڭ تىركەلۋ فورماسىن تولتىرۋ قاجەت.

وليمپيادا ەكى كەزەڭنەن تۇرادى.  ءبىرىنشى كەزەڭدە،  لوگيكالىق جانە كەڭىستىكتىك ويلاۋدى باعالاۋدى قامتيدى. رەسپۋبليكا بويىنشا ەڭ جوعارى قورىتىندى بالل جيناعان بەس مىڭ وقۋشى وليمپيادانىڭ ەكىنشى كەزەڭىنە وتەدى. وتكەن جىلدىڭ جەڭىمپازدارى دا وليمپياداعا قاتىسا الادى، ولارعا تەستىلەۋدىڭ II كەزەڭىنەن باستاپ قاتىسۋ قۇقىعى بەرىلدى.

وليمپيادانىڭ ەكىنشى كەزەڭى وبلىستىق تەستىلەۋ ورتالىقتارى بازاسىندا وفلاين وتكىزىلەدى. بۇل كەزەڭدە قاتىسۋشىلار،  «ماتەماتيكالىق ساۋاتتىلىق»،  قازاق تىلىندە وقيتىن وقۋشىلار ءۇشىن «قازاق ءتىلى»، ورىس تىلىندە وقيتىن وقۋشىلار ءۇشىن «ورىس ءتىلى»، «اعىلشىن ءتىلى»، «جاراتىلىستانۋ» پاندەرى بويىنشا اكادەميالىق بىلىمدەرىن باعالاۋ ءۇشىن كومپيۋتەرلىك تەستىلەۋدەن وتەدى.

«وليمپيادانى وتكىزۋ كەزىندە وقۋشىلاردىڭ تانىمدىق جانە اكادەميالىق داعدىلارى ونلاين جانە وفلاين رەجيمىندە كومپيۋتەرلىك تەستىلەۋ ارقىلى باعالانادى. وليمپيادا تەستىلەرىن كاسىبي مامانداردىڭ مامانداندىرىلعان جۇمىس توبى تەست سۇراقتارىن ازىرلەۋدىڭ حالىقارالىق ستاندارتتارىن ەسكەرە وتىرىپ قۇراستىردى جانە ول قازاقستان رەسپۋبليكاسىنىڭ اۋىل مەكتەپتەرىنىڭ وقۋشىلارىنا بەيىمدەلدى»،- دەپ اتاپ ءوتتى «جەتىسۋ دارىنى» كمم باسشىسى اليشەر باشاروۆ.

مامانداردىڭ ايتۋىنشا، ءبىلىم سايىسى مامىر ايىنا دەيىن ءوز مارەسىنە جەتەدى دەپ جوسپارلانعان.