«شيەۆرون» كومپانياسىنىڭ مۇرىندىق بولۋىمەن وتكىزىلەتىن «مەنىڭ بولاشاقتاعى ماماندىعىم» جوباسى كوپتەگەن تالانتتى جاستارعا ومىردەن ءوز ورنىن تابۋعا سەپتەسىپ وتىر.
مىنە، كۇنى كەشە عانا اتالعان جوبانىڭ قورىتىندىسى جاسالىپ، الماتى قالاسى ەستۋ قابىلەتى تومەن بالالارعا ارنالعان №5 مەكتەپ-ينتەرناتى جانە الماتى وبلىسى №1 بالالار ءۇيىنىڭ تاربيەلەنۋشىلەرى مەن وقىتۋشىلارى جوبا اياسىندا العان اسەرلەرىمەن ءبولىستى. بالالار ءوز كەزەگىندە ارنايى ءان شاشۋ دايىنداپ، جوبانىڭ دەمەۋشىسى تاراپىنان سىيلىقتار مەن ديپلومدارعا يە بولدى.
باعدارلاما وسىدان 10 جىل بۇرىن «شيەۆرون» كومپانياسىنىڭ «جاستار جەتىستىگى» قورىمەن بىرلەسە وتىرىپ باستاۋ العان بولاتىن. جوبا الماتى قالاسى ءبىلىم باسقارماسىنىڭ ينتەرنات مەكەمەلەرىن قامقورعا الۋ ءبولىمى مەن بالالار قۇقىعىن قورعاۋ دەپارتامەنتىنىڭ قولداۋىمەن جۇزەگە اسىرىلدى. جوبانى ىسكە اسىرۋ كەزىندەگى مەرزىمنىڭ ىشىندە الەۋمەتتىك توپتان شىققان 850 بالا قوعامعا قاجەتتى ماماندىق تۇرلەرىمەن تانىسىپ قانا قويماي، سونىمەن قاتار ومىرگە قاجەتتى پايدالى ىستەردى دە مەڭگەردى.
«ماماندىقتى دۇرىس تاڭداۋ – كەز-كەلگەن ادامنىڭ ومىردەگى جەتىستىكتەرىن ايقىندايتىن ماڭىزدى جايت. بالالاردى كوپتەگەن ماماندىقتارعا باعىتتاي وتىرىپ، ءبىز ولارعا ومىردەن ءوز ورنىن تابۋعا، دارىنىن اشۋعا جانە ءوزىنىڭ مۇمكىندىكتەرىن ىسكە اسىرۋعا كومەكتەسەمىز. ءبىزدىڭ باعدارلاما اياسىندا العان بىلىمدەرى جاستارعا تاڭداعان ماماندىعى بويىنشا جەتىستىككە جەتىپ، جارقىن بولاشاعىن قامتاماسىز ەتۋگە كومەكتەسەدى»، – دەدى بۇل رەتتە شاراعا قاتىسقان «شيەۆرون» كومپانياسىنىڭ وكىلدەرى.
وسى جىلى «مەنىڭ بولاشاقتاعى ماماندىعىم» جوباسى بالالارعا كاسىپكەرلىكپەن اينالىسۋعا مۇمكىندىك بەردى. اتاپ ايتقاندا، بالالار – مەيرامحانا كاسىبىن ۇيىمداستىرۋ، اسحانالار جەلىسىن قۇرۋ باعىتتارى بويىنشا ب ا ق سىنادى. بۇل سالا قوناقجاي قازاقستان ءۇشىن اسا ماڭىزدى سالانىڭ ءبىرى. سەبەبى، ءبىزدىڭ ەل ورتا ازياداعى تۋريستىك ورتالىقتىڭ ءبىرى دەپ سانالادى.
ايتا كەتەلىك، «مەنىڭ بولاشاقتاعى ماماندىعىم» جوباسى الماتى تۋريزم جانە قوناقجايلىلىق يندۋسترياسى كوللەدجىمەن بىرگە ىسكە اسىرىلادى. شارا بارىسىندا №5 مەكتەپ-ينتەرناتىنىڭ وقۋ ءىسى جونىندەگى ورىنباسارى ناتاليا گريگوريەۆا: «ءبىزدىڭ بالالارىمىز جوباعا قاتىسا وتىرىپ جان-جاقتى ءبىلىم الدى، ەڭ باستىسى اشىلدى، وز-وزىنە دەگەن سەنىمدەرى ءوستى. كوپشىلىگى جوبا اياسىندا تانىسقان ماماندىق بويىنشا ءبىلىم العىسى كەلەتىنىن ايتتى»، – دەپ اعىنان جارىلدى.
دۋمان تاناباسوۆ
