مەملەكەتتىك رامىزدەر – تۋ، ەلتاڭبا جانە ءانۇران قازاقستاننىڭ دەربەستىگى مەن تاۋەلسىزدىگىن كۇللى الەمگە جاريا ەتۋشى، ءارى مەملەكەتىمىزدىڭ وتكەنى، بۇگىنى مەن بولاشاعى اراسىنداعى ساباقتاستىقتىڭ جارقىن بەينەسى، سونىمەن قاتار حالقىمىزدىڭ رۋحىن، ۇلتتىق سالت-ساناسىن، قاھارماندىعى مەن دانالىعىن، بولاشاققا ءۇمىتىن، ارمان-تىلەگىن جەتكىزەتىن ەرەكشە قۇندى بەلگىلەر.



1992 جىلدىڭ 4 ماۋسىمى قازاقستاننىڭ رامىزدەرى بەكىتىلگەن كۇن بولىپ تاريحتا قالدى. 2007 جىلعى 4 ماۋسىمدا قازاقستاننىڭ پرەزيدەنتى ن.ءا. نازاربايەۆتىڭ قول قويىپ بەكىتكەن «قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋسيالىق زاڭى مەملەكەتتىك رامىزدەرىمىزدى پايدالانۋ ءتارتىبىن ناقتى بەلگىلەپ بەردى. مەملەكەتىمىزدىڭ ەلتاڭباسى قازاق تىلىنە اۋدارعاندا، ول «تاڭبا»، «بەلگى»، ءتىپتى «مۇرا» دەگەن ماعىنا بەرەدى. بۇل تەرمين ەجەلگى تۇركى قاعاناتى (551-630 جىلدار) كەزىنەن قولدانىلا باستاعان. قازاقستاننىڭ قازىرگى تاڭداعى ەلتاڭباسى ۇلكەن ەڭبەكتىڭ ارقاسىندا، ەكى ساۋلەتكەر جانداربەك مالىبەك پەن شوتا ءۋاليحانوۆتىڭ شىعارماشىلىق ىزدەنىستەرىنىڭ ناتيجەسىندە دۇنيەگە كەلدى.

مەملەكەتتىك رامىزدەرگە دەگەن قۇرمەت ەلىمىزدىڭ ماڭىزدى كونستيتۋسيالىق نورمالارىنا سايكەس جۇزەگە اسىرىلادى. قازاقستان رەسپۋبليكاسى پرەزيدەنتىنىڭ جارلىعىندا «قازاقستان رەسپۋبليكاسىنىڭ مەملەكەتتىك رامىزدەرى تۋرالى» بىلاي دەلىنگەن: «ەلىمىزدە تۇراتىن قازاقستان رەسپۋبليكاسىنىڭ ازاماتتارى جەكە تۇلعا رەتىندە قازاقستان رەسپۋبليكاسىنىڭ تۋىن، ەلتاڭباسىن، ءانۇرانىن مىندەتتى تۇردە قۇرمەتتەۋى كەرەك. وسى جارلىققا سايكەس ازاماتتاردىڭ ونى قۇرمەتتەۋى ءۇشىن قازاقستان رەسپۋبليكاسىنىڭ مەملەكەتتىك رامىزدەرىن الەمگە ايگىلەۋ جانە ناسيحاتتاۋ شارالار جيىنتىعى نەگىزىندە تۇراقتى تۇردە جۇزەگە اسىرسىن دەلىنگەن.

وسىعان وراي، رامىزدەر كۇنى قارساڭىندا تالدىقورعان قالاسىنىڭ تۇرعىندارى  قر-نىڭ مەملەكەتتىك ەلتاڭباسىنىڭ اۆتورى، «قۇرمەت» وردەنىنىڭ يەگەرى جانداربەك مالىبەكوۆپەن كەزدەسۋ وتكىزدى. شاراعا مادەنيەت قايراتكەرلەرى، ەڭبەك ارداگەرلەرى مەن  «نۇر وتان» پارتياسىنىڭ وكىلدەرى قاتىستى.

العاشقى ءسوزدى «نۇر وتان» پارتياسى الماتى وبلىستىق فيليالى ءتوراعاسىنىڭ ءبىرىنشى ورىنباسارى عالياسقار سارىبايەۆ الدى.

«ۇلتتىق رامىزدەرىمىز ۇلتتىڭ بىرەگەيلىگى مەن ۇلىلىعىن كورسەتەدى. تۋ، ەلتاڭبا جانە ءانۇران سىندى ۇلتتىڭ ايشىقتى تاڭبالارىنىڭ قابىلدانۋى – دۇنيەجۇزىندە قازاقستان دەيتىن مەملەكەت بار ەكەندىگىنىڭ كورىنىسى. مەملەكەتتىك رامىزدەردى قاستەرلەۋ، قاسيەتىن ءبىلۋ، ونى جۇرەككە توقۋ – وتانسۇيگىشتىكتىڭ بەلگىسى. ەلىمىزدىڭ جاستارى، وسكەلەڭ ۇرپاق پاتريوت بولسىن دەسەك، ولاردىڭ بويىنا جاستايىنان وسىنداي ۇعىمدى ءسىڭىرۋىمىز قاجەت»، – دەدى.

مەملەكەتتىك رامىزدەر ەلىمىزدىڭ كوپشىلىك ازاماتتارىن وتانسۇيگىشتىككە تاربيەلەۋدە ەرەكشە ماڭىزعا يە. وسى ماقساتتا قازىرگى تاڭدا ەلىمىزدىڭ رامىزدەرىنىڭ ءمانى مەن ماعىناسىن جانە ولاردىڭ قولدانىلۋىن، سونداي-اق مەملەكەتتىڭ قالىپتاسۋىن ءتۇسىندىرۋ جۇمىستارى قازاقستاندىق وتانسۇيگىشتىكتى جانە ازاماتتىق پوزيسيانى نىعايتۋ ۇردىسىندەگى بىردەن-بىر ماڭىزدى فاكتورعا اينالۋى كەرەك.

– «قازاقتىڭ وزىندىك مادەنيەتى، ءسالت-داستۇرى جوق، كوشپەندىلەر» دەگەن پىكىردى جوققا شىعارۋ ماقساتىندا، نامىسقا تىرىسىپ، قازاقتىڭ بار بولمىسىن وسى ەلتاڭبا ارقىلى دالەلدەگىم كەلدى، – دەيدى ەلتاڭبا اۆتورى.

– مەملەكەتتىك رامىزدەر ۇلتتىق بىرەگەيلىكتىڭ قالىپتاسۋ تىرەگى جانە ءاربىر مەملەكەتتىڭ دامۋىنىڭ اجىراماس ءبىر بولىگى بولىپ تابىلادى. ەلتاڭبا –  تولعانىستان تۋعان دۇنيە. قازاقتىڭ بار بولمىسىن وسى ەلتاڭبا ارقىلى دالەلدەگىم كەلدى. 4 ماۋسىم – قازاقستان مەملەكەتىنىڭ، حالقىنىڭ مەيرامى. تۋدىڭ مارتەبەسى ءارقاشان بيىك بولسا ەكەن، ەلدىگىمىز ماڭگى بولسا ەكەن دەپ تىلەيمىن. قازاقستاندا قالىپتاسىپ كەلە جاتقان ۇلتتىق تۇتاستىق، ءبىزدىڭ ءانۇرانىمىز بەن ەلتاڭبامىزبەن بىرگە جاساسا الار اسۋى بيىك بولماق، – دەگەن جىلى لەبىزىن ءبىلدىردى جانداربەك مالىبەكوۆ.