قارجىلىق مونيتورينگ اگەنتتىگى رۋدنىيدا 27 ورتا مەكتەپ پەن 13 اۋرۋحانا تۇتىناتىنداي ەلەكتر قۋاتىن پايدالانعان ماينيڭ فەرماسىن انىقتادى. ماينەرلەردىڭ بۇل قىلمىستىق اينالىمى شامامەن 100 ملن تەڭگەگە باعالاندى دەپ حابارلايدى Dalanews.kz ءتىلشىسى.

رۋدنىيداعى توپ Bitcoin كريپتوۆاليۋتاسىن ءتيىستى ليسەنزياسىز وندىرگەن. اگەنتتىك بيرجادا كريپتوۆاليۋتا ءتۇسىپ تۇرعان اككاۋنتتار مەن كۇدىكتىلەر اقشا شىعارىپ الىپ وتىرعان بانكتەردەگى شوتتاردى انىقتادى. ايماقتىڭ ەلەكتر جەلىلەرىنە كەلتىرىلگەن زيان سالىستىرمالى تۇردە ايتقاندا 27 مەكتەپ پەن 13 اۋرۋحانا پايدالاناتىنداي مولشەردە دەپ باعالاندى. زاڭسىز فەرمانىڭ قىزمەتى وسىلايشا جەرگىلىكتى ەلەكتر جەلىلەرىنە اجەپتاۋىر زيان تيگىزگەن.

كۇدىكتىلەردىڭ كىم ەكەنى انىقتالدى. ولاردىڭ شوتتتارى، مۇلىكتەرى مەن زاڭسىز وندىرىلگەن ديجيتال اكتيۆتەرى سوت ارقىلى تاركىلەندى. ءتىنتۋ كەزىندە قارجىلىق مونيتورينگ اگەنتتىگى 150-دەن استام ماينيڭ جابدىعىن (ASIC)، جەلدەتۋ جانە سۋىتۋ قۇرىلعىلارىن، Wi-Fi مەن روۋتەرلەر، تەلەفوندار مەن نوۋتبۋكتار تاپقان.

«الدىن-الا جاسالعان ەسەپكە سۇيەنسەك، قىلمىس جولىمەن تۇسكەن تابىس پەن اينالىم 100 000 000 تەڭگە»، — دەپ جازدى اگەنتتىك.

بيىل مامىردا اگەنتتىك اينالىمى وسى شامالاس ماينيڭ فەرماسىن شىمكەنتتە دە انىقتاعان ەدى. ولار 10 ايعا جۋىق ۋاقىت بويى كريپتوۆاليۋتانى زاڭسىز جولمەن ءوندىرىپ وتىرعان. سونىمەن بىرگە قوستاناي وبلىسىندا دا بىرنەشە ازامات 230 ملن تەڭگەلىك ماينيڭ جابدىعىن رەسەيگە زاڭسىز وتكىزۋگە تىرىسقان. سوت بارلىق جۇكتى تاركىلەگەن ەدى.