Qarjylyq monitoring agenttigi Rýdnyida 27 orta mektep pen 13 aýrýhana tutynatyndai elektr qýatyn paidalanǵan mainiń fermasyn anyqtady. Mainerlerdiń bul qylmystyq ainalymy shamamen 100 mln teńgege baǵalandy dep habarlaidy Dalanews.kz tilshisi.
Rýdnyidaǵy top Bitcoin kriptovaliýtasyn tiisti litsenziiasyz óndirgen. Agenttik birjada kriptovaliýta túsip turǵan akkaýnttar men kúdiktiler aqsha shyǵaryp alyp otyrǵan bankterdegi shottardy anyqtady. Aimaqtyń elektr jelilerine keltirilgen ziian salystyrmaly túrde aitqanda 27 mektep pen 13 aýrýhana paidalanatyndai mólsherde dep baǵalandy. Zańsyz fermanyń qyzmeti osylaisha jergilikti elektr jelilerine ájeptáýir ziian tigizgen.
Kúdiktilerdiń kim ekeni anyqtaldy. Olardyń shotttary, múlikteri men zańsyz óndirilgen dijital aktivteri sot arqyly tárkilendi. Tintý kezinde Qarjylyq monitoring agenttigi 150-den astam mainiń jabdyǵyn (ASIC), jeldetý jáne sýytý qurylǵylaryn, Wi-Fi men roýterler, telefondar men noýtbýktar tapqan.
«Aldyn-ala jasalǵan esepke súiensek, qylmys jolymen túsken tabys pen ainalym 100 000 000 teńge», — dep jazdy Agenttik.
Biyl mamyrda agenttik ainalymy osy shamalas mainiń fermasyn Shymkentte de anyqtaǵan edi. Olar 10 aiǵa jýyq ýaqyt boiy kriptovaliýtany zańsyz jolmen óndirip otyrǵan. Sonymen birge Qostanai oblysynda da birneshe azamat 230 mln teńgelik mainiń jabdyǵyn Reseige zańsyz ótkizýge tyrysqan. Sot barlyq júkti tárkilegen edi.
