قاسكەلەڭدەگٸ پەرزەنتحانادا شالا تۋعان ٷشەم شەتٸنەپ كەتتٸ. قارا جامىلعان وتباسى كٸنەلٸ تۇلعالاردىڭ جازاعا تارتىلۋىن تالاپ ەتٸپ وتىر, دەپ حابارلايدى كتك ارناسى.
تەلەارنا سايتىنىڭ مەلٸمەتٸنشە, 28 جاستاعى كەلٸنشەك ٶتكەن جۇمادا, جٷكتٸلٸكتٸڭ 25-اپتاسىندا سۋى كەتٸپ, قاسكەلەڭ قالاسىنداعى پەرزەنتحاناعا جەتكٸزٸلگەن. دەرٸگەرلەر ٷشەمگە اياعى اۋىر ەيەلگە تولعاق شاقىراتىن ەكپە سالىپ, تابيعي جولمەن بوساندىرۋ تۋرالى شەشٸم قابىلداعان.
"تاڭعى 7-دە كەلٸنٸم ٷشەمدٸ دٷنيەگە الىپ كەلگەن. نەگٸزٸ بٸز كەسار تٸلٸگٸمەن قالاعا بارىپ جاتۋ كەرەك ەدٸك. الايدا مىناداي شۇعىل جاعدايدا, بٸراق ۇلىم ٷشەم ەكەنٸن ايتىپ, قالاعا جٸبەرٸڭٸزدەر دەپ سۇراعان. "بوساندىرۋ قولدارىڭىزدار كەلە مە?" دەگەندە, "ٶتە كٸشكەنتاي, بٸز تابيعي جولمەن بوساندىرىپ الامىز" دەگەن. جەتٸدە بوسانعان, ەگٸزدەر بٸرٸنەن كەيٸن بٸرٸ شەتٸنەپ كەتتٸ دەپ, ەكەۋٸن عانا ايتقان", - دەيدٸ گٷلجەميلا تٶلەشوۆا.
وتباسى ٷشٸنشٸ نەرەستە امان قالدى دەپ ٷمٸتتەنگەن. بٸراق ول دا شەتٸنەپ, دەرٸگەرلەر مۇنى جاسىرىپ قالعانىن ايتادى.
تۋىستارى بەس ايعا دەيٸن كەلٸنشەكتٸڭ دەنساۋلىعىندا شاعىمى بولماعانىن اتاپ ٶتتٸ.
"كەلٸنٸمنٸڭ جٷكتٸلٸگٸ باستاپقىدا ٶتە جاقسى بولدى. سوڭعى بەس ايدان كەيٸن كٸشكەنە اۋىرلاۋ ٶتە باستادى. ساقتاپ قالۋ ٷشٸن ەمدەلۋگە جاتتىق, كەرەكتٸ ەم-دومنىڭ بەرٸن الدىق. مەنٸڭ اشۋىمدى تۋدىرعان نەرسە – بالالاردى بەرٸپ تۇرىپ, ٷشٸنشٸ بالانى جاسىرىپ قالعانى. نە ٷشٸن, نە سەبەپتٸ جاسىردى?! نەگە بار شىندىقتى ايتپايدى?! نەگە بٸزگە تٷسٸندٸرمەيدٸ, بارلىعىن, قالاي بولعانىن?! قان كەتٸپ, ٷش پەرزەنتتٸ تابيعي جولمەن بوسانۋ وڭاي ەمەس. ٶزٸ قينالىپ جاتقان اناعا نەگە مۇنداي قايعىلى حاباردى جەتكٸزەدٸ? مەنٸڭ تٷسٸنبەيتٸنٸم – وسى", - دەيدٸ گٷلجەميلا تٶلەشوۆا.
جاقىندارى شاقالاقتاردى جەر قوينىنا تاپسىرعان. دەگەنمەن, مەن-جايدى انىقتاۋ ٷشٸن ەكسگۋماتسييا جاساۋدى تالاپ ەتٸپ وتىر.
"ايدانانىڭ نەگٸزگٸ تاريحىندا, ٷشەم بولعاننان كەيٸن جوسپارلى كەسار تٸلٸگٸ جاسالۋ كەرەك بولاتىن. ولار ايدانانىڭ ٶزٸن بوساندىرىپ الادى. ەشكٸم شىعىپ, رەسمي تٷردە تيمۋرعا ەستٸرتپەگەن. بٸزگە دە ەستٸرتپەدٸ", - دەيدٸ تۋىسى جازيرا تٶلەشوۆا.
بۇل جاعدايعا قاتىستى مەديتسينا قىزمەتكەرلەرٸ بىلاي دەپ تٷسٸنٸك بەرگەن:
"جٷكتٸلٸكتٸڭ 25-شٸ اپتاسىندا ٷشەمدٸ بوسانۋ اسا اۋىر, شۇعىل مەديتسينالىق كٶمەكتٸ تالاپ ەتەتٸن كريتيكالىق جاعداي بولىپ تابىلادى. وسىعان بايلانىستى جٷكتٸ ەيەل ستاتسيونارعا جاتقىزىلدى. ساعات 7-دە نەرەستەلەر دٷنيەگە كەلدٸ. بارلىعىنىڭ تۋعان كەزدەگٸ سالماعى ٶتە تٶمەن بولدى.
500 گرامعا دەيٸنگٸ نەرەستەلەر ەكسترەمالدى تٶمەن سالماقپەن تۋعاندار ساناتىنا جاتادى. مۇنداي جاعدايدا ٶمٸرلٸك ماڭىزدى اعزالار, ەسٸرەسە ٶكپە مەن ورتالىق جٷيكە جٷيەسٸ تولىق قالىپتاسىپ ٷلگەرمەيدٸ.
قازٸرگٸ ۋاقىتتا كٶرسەتٸلگەن مەديتسينالىق كٶمەكتٸڭ ساپاسىنا ٸشكٸ اۋديت جٷرگٸزٸلٸپ جاتىر", - دەپ مەلٸمدەگەن قاراساي كلينيكالىق كٶپبەيٸندٸ ورتالىق اۋداندىق اۋرۋحاناسىنىڭ باسپاسٶز قىزمەتٸ.
ٷش سەبيٸنەن ايىرىلعان انا قازٸر پەرزەنتحانادا ەمدەلٸپ جاتىر. بۇل ونىڭ ٷشٸنشٸ جٷكتٸلٸگٸ بولعان. ەرلٸ-زايىپتىنىڭ ەكٸ پەرزەنتٸ بار. وتباسى شەتٸنەپ كەتكەن ٷشەمگە قاتىستى تەكسەرٸس جٷرگٸزٸلٸپ, كٸنەلٸلەر جاۋاپقا تارتىلعانىن قالايدى.
