Qaskeleńdegi perzenthanada shala týǵan úshem shetinep ketti. Qara jamylǵan otbasy kináli tulǵalardyń jazaǵa tartylýyn talap etip otyr, dep habarlaidy KTK arnasy.
Telearna saitynyń málimetinshe, 28 jastaǵy kelinshek ótken jumada, júktiliktiń 25-aptasynda sýy ketip, Qaskeleń qalasyndaǵy perzenthanaǵa jetkizilgen. Dárigerler úshemge aiaǵy aýyr áielge tolǵaq shaqyratyn ekpe salyp, tabiǵi jolmen bosandyrý týraly sheshim qabyldaǵan.
"Tańǵy 7-de kelinim úshemdi dúniege alyp kelgen. Negizi biz kesar tiligimen qalaǵa baryp jatý kerek edik. Alaida mynadai shuǵyl jaǵdaida, biraq ulym úshem ekenin aityp, qalaǵa jiberińizder dep suraǵan. "Bosandyrý qoldaryńyzdar kele me?" degende, "óte kishkentai, biz tabiǵi jolmen bosandyryp alamyz" degen. Jetide bosanǵan, egizder birinen keiin biri shetinep ketti dep, ekeýin ǵana aitqan", - deidi Gúljámila Tóleshova.
Otbasy úshinshi náreste aman qaldy dep úmittengen. Biraq ol da shetinep, dárigerler muny jasyryp qalǵanyn aitady.
Týystary bes aiǵa deiin kelinshektiń densaýlyǵynda shaǵymy bolmaǵanyn atap ótti.
"Kelinimniń júktiligi bastapqyda óte jaqsy boldy. Sońǵy bes aidan keiin kishkene aýyrlaý óte bastady. Saqtap qalý úshin emdelýge jattyq, kerekti em-domnyń bárin aldyq. Meniń ashýymdy týdyrǵan nárse – balalardy berip turyp, úshinshi balany jasyryp qalǵany. Ne úshin, ne sebepti jasyrdy?! Nege bar shyndyqty aitpaidy?! Nege bizge túsindirmeidi, barlyǵyn, qalai bolǵanyn?! Qan ketip, úsh perzentti tabiǵi jolmen bosaný ońai emes. Ózi qinalyp jatqan anaǵa nege mundai qaiǵyly habardy jetkizedi? Meniń túsinbeitinim – osy", - deidi Gúljámila Tóleshova.
Jaqyndary shaqalaqtardy jer qoinyna tapsyrǵan. Degenmen, mán-jaidy anyqtaý úshin eksgýmatsiia jasaýdy talap etip otyr.
"Aidananyń negizgi tarihynda, úshem bolǵannan keiin josparly kesar tiligi jasalý kerek bolatyn. Olar Aidananyń ózin bosandyryp alady. Eshkim shyǵyp, resmi túrde Timýrǵa estirtpegen. Bizge de estirtpedi", - deidi týysy Jazira Tóleshova.
Bul jaǵdaiǵa qatysty meditsina qyzmetkerleri bylai dep túsinik bergen:
"Júktiliktiń 25-shi aptasynda úshemdi bosaný asa aýyr, shuǵyl meditsinalyq kómekti talap etetin kritikalyq jaǵdai bolyp tabylady. Osyǵan bailanysty júkti áiel statsionarǵa jatqyzyldy. Saǵat 7-de náresteler dúniege keldi. Barlyǵynyń týǵan kezdegi salmaǵy óte tómen boldy.
500 gramǵa deiingi náresteler ekstremaldy tómen salmaqpen týǵandar sanatyna jatady. Mundai jaǵdaida ómirlik mańyzdy aǵzalar, ásirese ókpe men ortalyq júike júiesi tolyq qalyptasyp úlgermeidi.
Qazirgi ýaqytta kórsetilgen meditsinalyq kómektiń sapasyna ishki aýdit júrgizilip jatyr", - dep málimdegen Qarasai klinikalyq kópbeiindi ortalyq aýdandyq aýrýhanasynyń baspasóz qyzmeti.
Úsh sábiinen aiyrylǵan ana qazir perzenthanada emdelip jatyr. Bul onyń úshinshi júktiligi bolǵan. Erli-zaiyptynyń eki perzenti bar. Otbasy shetinep ketken úshemge qatysty tekseris júrgizilip, kináliler jaýapqa tartylǵanyn qalaidy.
