Prezident Qasym-Jomart Toqaev Qazaqstannyń halyq jazýshysy Valerii Mihailovty I dárejeli «Barys» ordenimen marapattaý týraly Jarlyqqa qol qoidy. Aqorda málimetinshe, jazýshy bul joǵary nagradaǵa otandyq ádebiettiń damýyna qosqan airyqsha úlesi úshin ie boldy, dep habarlaidy dalanews.kz.
Sonymen qatar Memleket basshysy Valerii Mihailovqa quttyqtaý jedelhatyn joldap, ony 80 jyldyq mereitoiymen quttyqtady.
Prezident jazýshynyń uzaq jyldar boiy elimizdiń bedeldi basylymdarynda eńbek etkenin, «Kazahstanskaia pravda» gazeti men «Prostor» jýrnalyn basqarǵanyn atap ótti.
«Tabiǵi talantyńyz ben eńbekqorlyǵyńyzdyń arqasynda shyǵarmashylyq jolyńyzda eren tabysqa qol jetkizdińiz. Uzaq jyldar boiy elimizdiń bedeldi basylymdarynda jemisti eńbek etip, “Kazahstanskaia pravda” gazeti men “Prostor” jýrnalyn basqardyńyz», – delingen quttyqtaý jedelhatynda.
Qasym-Jomart Toqaev Valerii Mihailovtyń birneshe býyn oqyrmanǵa jaqsy tanys shyǵarmalary Qazaqstan ádebietiniń mańyzdy bóligine ainalǵanyn da atap ótken.
Valerii Mihailov 1946 jyly 7 qyrkúiekte Qaraǵandy qalasynda dúniege kelgen. Ol Qazaq politehnikalyq institýtynyń geofizika fakýltetin támamdap, keiin respýblikalyq basylymdarda eńbek etken. 1997 jyldan «Kazahstanskaia pravda» gazetiniń bas redaktory qyzmetin atqarsa, 2003 jyldan «Prostor» jýrnalyna jetekshilik etken. Sondai-aq Qazaqstan Jazýshylar odaǵy basqarmasynyń hatshysy bolǵan.
Jazýshy qazaq qalamgerleriniń birqatar shyǵarmasyn orys tiline aýdarǵan. Onyń «Hronika velikogo djýta» derekti povesi men birneshe óleńder jinaǵy jaryq kórgen. Valerii Mihailov – Halyqaralyq «Alash» ádebi syilyǵynyń laýreaty, buǵan deiin «Parasat» ordenimen jáne medaldarmen marapattalǵan.
