Atyraýlyq Rýslan Tólegenov Qazaqstannyń Ulttyq sport kókpar federatsiiasynyń uiymdastyrý jumysyna kóńili tolmaitynyn aityp, áleýmettik jelide jazba jariialady, dep habarlaidy dalanews.kz.
Onyń sózinshe, Atyraý oblysynyń Kókpar federatsiiasy Majarstan quramasyn atpen qamtamasyz etý úshin 12 jylqyny jetkizgen.
«Atyraý oblysynyń Kókpar federatsiiasynan Majarstan quramasyn qamtamasyz etý úshin 12 at alyp keldik. 3 myń shaqyrymnan astam jol júrdik. Bul ońai júris emes bilgenge. Atpen birge joldyń mashaqaty, shyǵyny, jaýapkershiligi bar», – dep jazdy Rýslan Tólegenov.
Alaida ol mundai eńbektiń uiymdastyrýshylar tarapynan eskerilmegenin alǵa tartty. Tólegenovtiń aitýynsha, Atyraýdan kelgen delegatsiia múshelerine beidjikter de daiyndalmaǵan. Sonymen qatar olar kókpar oiyndaryn tamashalaý úshin bilet ala almaǵan.
«Atyraýdan kelgen delegatsiiaǵa dym joq. Beidjik joq. Bilet joq. Kókpar kórýge múmkindik joq. Júzdegen qazaq ippodromnyń syrtynda qaldy», – deidi ol.
Sondai-aq jazba avtory basqa elderden kelgen delegatsiialardyń uiymshyldyǵyna nazar aýdaryp, qazaqstandyq taraptaǵy kemshilikterdi synǵa aldy.
«Eń ókinishtisi – basqa elderdiń delegatsiialaryna qarap qyzyǵasyń. Uiymshyl. Bir-birin qoldaidy. Bir komanda bolyp júr. Al bizde baiaǵy ádet. Bóliný. Óz adamyńdy ǵana oilaý. Ózara bólisý», – dep jazdy Tólegenov.
Ol Atyraý oblysynan kelgen delegatsiia eshqandai artyqshylyq suramaǵanyn, tek qurmet kórsetiledi dep kútkenin aitty.
«Atyraý oblysy Majarstan quramasyna 12 atpen, 3 myń shaqyrym jol júrip keldi. Biz eshkimnen artyqshylyq suraǵan joqpyz. Eń bolmasa, adam retinde qurmet kórsetýdi kúttik», – dedi ol.
Jazba sońynda Rýslan Tólegenov ulttyq sportty damytý eń aldymen ony sapaly uiymdastyrýdan bastalýy kerek ekenin atap ótti.
«Ulttyq sportty damytý degen ádemi kostiým kiip, beidj taǵyp, minberde sýretke túsý emes. Ulttyq sportqa shyn janashyr bolsańdar, ony eń aldymen durys uiymdastyrýdan bastańdar!» – dep túiindedi ol.
