Qazaqstandyqtar zeinetaqy jinaǵynyń bir bóligin turǵyn úi jaǵdaiyn jaqsartýǵa jumsaýdy jalǵastyryp jatyr. 2026 jylǵy tamyzda osy maqsatqa berilgen birjolǵy zeinetaqy tólemderiniń kólemi 27,5 mlrd teńgege jetti, dep habarlaidy dalanews.kz.
Data Hub júrgizgen zertteýge sáikes, shildede tólengen qarajat kólemi 27,1 mlrd teńge bolǵan.
Biyl maýsymda zeinetaqy jinaǵyn alýǵa múmkindik beretin jetkiliktilik shegin esepteý tártibi ózgerdi. Sonyń saldarynan jinaǵyndaǵy artyq aqshasyn paidalana alatyn azamattar azaiǵan.
"Jańa talaptardan keiin zeinetaqy jinaǵyn paidalanýǵa múmkindigi bar adamdardyń sany qysqardy. Alaida olardyń shekten asqan qarajatynyń ortasha kólemi ósti", – dep túsindirgen BJZQ.
Soǵan qaramastan, shilde men tamyzda myńdaǵan adam zeinetaqy aqshasyn alǵan. Shildede ony paidalanǵandar sany 8,8 myń adamǵa kóbeise, tamyzda taǵy 8,8 myń adam qosylǵan.
Azamattardyń basym bóligi bul qarajatty baspana satyp alýǵa jumsaǵan. Shilde men tamyzda turǵyn úi mámilesi boiynsha tolyq esep aiyrysýǵa jalpy tólemniń 58 paiyzy baǵyttalǵan.
Sonymen birge paidalanylmaǵan aqsha BJZQ-ǵa qaitarylyp jatyr. Shildede qorǵa shamamen 10 mlrd teńge, tamyzda 4,9 mlrd teńge keri túsken. Qarajat ótinish iesi bas tartqan, qajetti qujattardy tapsyrmaǵan nemese aqshany belgilengen maqsatqa jumsamaǵan jaǵdaida qaitarylady.
