سونىمەن قاتار، جيىندا دالەلدەمەلەر مەن اكىمشىلىك ءىستىڭ وزگە دە ماتەريالدارى نازارعا الىناتىندىعى ايتىلدى. ال، كودەكس 1-شىلدەدەن باستاپ قولدانىسقا ەنگىزىلەدى.
– سوت قىزمەتىنە تىڭ سەرپىن بەرەتىن تاعى ءبىر زاڭ – بيىلعى 29-ماۋسىمدا پرەزيدەنت قول قويعان «ق ر اكىمشىلىك-راسىمدىك پروسەستىك كودەكسى». بۇل زاڭ اياسىندا سۋدياعا جاڭا وكىلەتتىكتەر مەن قۇقىقتار بەرىلىپ وتىر. ياعني، سۋديا اكىمشىلىك ءىستىڭ ناقتى جانە زاڭدى تۇستارىنا جاتاتىن قۇقىقتىق نەگىزدەمەلەر بويىنشا ءوزىنىڭ الدىن الا قۇقىقتىق پىكىرىن ايتۋعا قۇقىلى. بۇرىنعى زاڭ بويىنشا سۋدياعا مۇنداي قۇقىق بەرىلمەيتىن. سوندىقتان، سۋديا ىسكە بايلانىستى ءوز پىكىرىن ايتۋعا ءتيىس ەمەس بولاتىن، – دەدى ايانبەك بەكەجان ۇلى.
تاعى ءبىر جاڭاشىلدىق، سوت ءوز باستاماسى نەمەسە اكىمشىلىك پروسەسكە قاتىسۋشىلاردىڭ ءۋاجدى ءوتىنىشحاتى بويىنشا قوسىمشا ماتەريالدار مەن دالەلدەمەلەردى جيناي الادى. اكىمشىلىك سوت ءىسىن جۇرگىزۋ مىندەتتەرىن شەشۋگە باعىتتالعان وزگە دە ارەكەتتەردى جۇزەگە اسىرادى. تۇركىستان وبلىستىق سوتىنىڭ سۋدياسى بۇركىت بايدۋللايەۆتىڭ ايتۋىنشا، زاڭدا «تاتۋلاستىرۋ راسىمدەرى» كەڭىنەن قولدانىلادى. ەگەر تاراپتاردىڭ داۋى تاتۋلاسۋ، مەدياسيالىق جولمەن شەشىلسە، كەلىسىمى جازباشا تۇردە بولادى.
مامىلەگە كەلۋ شارتتارى زاڭعا قايشى كەلگەن جاعدايدا، سوت ونى بەكىتپەيدى. سونداي-اق، ادامداردىڭ قۇقىقتارىن، بوستاندىقتارى مەن زاڭدى مۇددەلەرىن بۇزاتىن كەلىسىمدەرگە دە جول بەرىلمەيدى. داۋلاسۋشى تاراپتار ءوزارا تاتۋلاسۋ، مەدياسيا نەمەسە داۋدى پارتيسيپاتيۆتىك راسىمگە كەلىسىم بەرمەسە نەمەسە سوت كەلىسىمنىڭ شارتتارىن بەكىتپەسە، اكىمشىلىك ءىستى تالقىلاۋ جالپى تارتىپپەن جۇرگىزىلەدى.
