بۇگىنگى تاڭدا مەملەكەتتى ساياسي جاعىنان جەتىلدىرۋ ءۇشىن پرەزيدەنتتىڭ يدەيالارى مەن ۇسىنىستارىنا ۇسىنىس-پىكىر ءبىلدىرۋ، سىن-كوزقاراس ايتۋ اسا ماڭىزدى. وسىعان وراي ق ر پرەزيدەنتى جانىنداعى قازاقستاننىڭ ستراتەگييالىق زەرتتەۋلەر ينستيتۋتىنىڭ باس ساراپشىسى ايگەرىم ابدراشيتوۆا استانادا وتكەن ءماسليحات دەپۋتاتتارىنىڭ ءىى رەسپۋبليكالىق فورۋمىندا كوتەرىلگەن ماسەلەلەرگە باعا بەرىپ، ول الداعى ۋاقىتتا قانداي ناتيجە بەرەتىنىن جانە جەرگىلىكتى باسقارۋداعى تۇيتكىلدەر تۋرالى ايتتى.
«حالىقارالىق تاجىريبە جەرگىلىكتى ءوزىن-وزى باسقارۋ جۇيەسىنىڭ تابىستى جۇمىس ىستەۋى ءۇشىن ورتالىقسىزداندىرۋ، ازاماتتاردىڭ قاتىسۋى، باسقارۋدىڭ اشىقتىعى، بارابار قارجىلاندىرۋ جانە سيفرلاندىرۋدى ەنگىزۋ قاجەت ەكەنىن كورسەتەدى.
مىسالى، شۆەسيا مەن شۆەيساريادا جەرگىلىكتى ءوزىن-وزى باسقارۋ ايتارلىقتاي اۆتونومياعا يە جانە كوپتەگەن ماسەلەلەر بويىنشا ءوز بەتىنشە شەشىم قابىلداي الادى، الەۋمەتتىك قامسىزداندىرۋدى، ءبىلىم بەرۋدى، ينفراقۇرىلىمدى جانە ازاماتتاردىڭ كۇندەلىكتى ومىرىندەگى ماسەلەلەردى باسقارۋمەن اينالىسادى.
ازاماتتاردى شەشىم قابىلداۋ پروسەسىنە قوسۋ دانيا مەن گەرمانيادا بەلسەندى قولدانىلادى، بۇل جەرگىلىكتى بيلىك ورگاندارىنا سەنىم قالىپتاستىرادى جانە قابىلداناتىن شەشىمدەردىڭ ساپاسىن جاقسارتۋعا اسەر ەتەدى»، - دەدى ساراپشى.
ايگەرىم ابدراشيتوۆانىڭ پىكىرىنشە، سايلاۋ جۇيەسىندەگى وزگەرىستەر، جەرگىلىكتى ءوزىن-وزى باسقارۋدى دامىتۋ تۇجىرىمداماسىن ازىرلەۋ ارقاسىندا ءبىز وڭ ناتيجەلەرگە قول جەتكىزدىك. ءبىراق ەلىمىزدە جەرگىلىكتى مەملەكەتتىك باسقارۋ جانە جەرگىلىكتى ءوزىن-وزى باسقارۋ تۋرالى زاڭدى جەتىلدىرۋ، ءماسليحاتتاردىڭ جۇمىسىن قامتاماسىز ەتۋگە سيفرلىق تەحنولوگيالاردى ەنگىزۋ جانە دەپۋتاتتاردىڭ بىلىكتىلىگىن ارتتىرۋ ماسەلەلەرى تۇبەگەيلى شەشىلمەگەن. اتالعان تۇيتكىلدەر بويىنشا تالاپ ەتەتىن ماسەلەلەر ءالى دە بار.
«بۇگىنگى تاڭدا ءماسليحاتتاردىڭ شەشىمدەر قابىلداۋدا، اسىرەسە قارجى جانە بيۋدجەت بولىگىندە وكىلەتتىكتەرى شەكتەۋلى. جەرگىلىكتى مەملەكەتتىك باسقارۋدان تاۋەلسىز دەپ ايتقانىمەن، ءماسليحاتتار ايتارلىقتاي دارەجەدە اكىمدىكتەرگە تاۋەلدى. ىقپال ەتۋ مەن باسقارۋدىڭ ناقتى تەتىكتەرىنىڭ بولماۋى ءوز كەزەگىندە حالىق تاراپىنان دەپۋتاتتاردىڭ جۇمىسىنا سەنىمسىزدىككە اكەلەدى. دەپۋتاتتاردىڭ وزدەرى شەكتەۋلى وكىلەتتىكتەردى كورىپ، كەي كەزدەرى مانداتتان باس تارتادى. سايكەس زاڭعا وزگەرىستەر ەنگىزىلىپ، دەپۋتاتتار اكىمدىكتىڭ بيۋدجەتتىك كوميسسيالارىنىڭ جۇمىسىنا قاتىسۋعا، قاجەت بولعان جاعدايدا بيۋدجەتتى ناقتىلاۋعا باستاماشىلىق جاساۋعا جانە حالىق الدىندا جىلىنا ءبىر رەتتەن ارتىق ءماسليحاتتاردىڭ جۇمىسى تۋرالى ەسەپ بەرۋگە قۇقىلى بولۋ كەرەك.
سول كەزدە پرەزيدەنت اتاپ وتكەن حالىقپەن تىكەلەي جۇمىس ىستەۋ، ازاماتتار كوتەرەتىن ماسەلەنى باقىلاۋدا ۇستاۋ، جەرگىلىكتى ەكونوميكالىق ساياساتقا ىقپال ەتۋى جۇزەگە اسىرىلادى»، - دەدى ساراپشى.
ساراپشىنىڭ پايىمداۋىنشا، تاعى ءبىر ماسەلە بار. ول - ءماسليحاتتار اپپاراتىنىڭ جۇمىسى. بۇگىنگى تاڭدا زاڭ بويىنشا مەملەكەتتىك قىزمەتشىلەردىڭ شتات سانىنىڭ ءليميتى ءتيىستى ءماسليحاتتار دەپۋتاتتارىنىڭ سانىنا قاراي ءبىر قىزمەتكەردىڭ بەس دەپۋتاتقا قاتىناسىندا بەلگىلەنەدى. بۇل جاعداي اپپاراتتىڭ ساپاسى مەن جىلدامدىعىن تومەندەتەدى. قىزمەتكەرلەر كەلىپ تۇسكەن ساۋالداردى وڭدەۋگە جانە دەپۋتاتقا اقپارات جيناۋعا كومەكتەسۋگە ۇلگەرمەيدى. سول سەبەپتى ءماسليحاتتاردىڭ تولىققاندى جۇمىس ىستەۋى ءۇشىن اپپارات شتاتىن ۇلعايتقان ءجون.
«پرەزيدەنت ءماسليحات دەپۋتاتتارىنىڭ قۇزىرەتتىلىك دەڭگەيىن جوسپارلى تۇردە ارتتىرۋ قاجەتتىگىن اتاپ ءوتتى. بۇگىنگى تاڭدا زاڭ بويىنشا ولار سايلانعان سوڭ العاشقى جىلىندا وقىتىلادى، بۇل جەتكىلىكسىز. بيۋدجەت قالاي قالىپتاسادى، زاڭدار قالاي دايىندالادى جانە قابىلدانادى - ءاربىر دەپۋتات ولاردى ءبىلۋى كەرەك. اسىرەسە، ازاماتتىق سەكتوردان تاڭدالعان دەپۋتاتتار بىلە بەرمەيتىن بازالىق ءبىلىم. ءقازىر بىردەن بىرنەشە ينستيتۋت جەرگىلىكتى ءوزىن-وزى باسقارۋ تۋرالى زاڭدى جەتىلدىرۋمەن اينالىسادى، پارلامەنتتە جاعدايدى جاقسارتۋعا قىزىعۋشىلىق تانىتۋدا. ءماسليحاتتار – حالىقتىڭ ءوزى سايلاعان دەپۋتاتتار، ولار حالىقتىڭ ءومىر ءسۇرۋ ساپاسىن ارتتىرۋ ءۇشىن جۇمىس ىستەيتىن ورىن. سوندىقتان ءماسليحاتتاردىڭ تيىمدىلىگى حالىق ءۇشىن اسا ماڭىزدى»، - دەپ وي تۇيىندەدى ايگەرىم ابدراشيتوۆا.
