قازاقتىڭ، اسىرەسە الاش ارداقتىلارىنىڭ مۇردەسى الەمنىڭ ءار تۇكپىرىندە جاتىر دەسەك ارتىق ايتقانىمىز ەمەس. سولاردىڭ ءبىرى، ءارى بىرەگەيى بيىل تۋىلعانىنا 150 جىل تولعان ءاليحان بوكەيحاننىڭ بەيىتى ماسكەۋدىڭ دون زيراتى اتالاتىن بوزداقتار قابىرىندە جەرلەنگەن. وسى زيراتقا بيىل كۇزدە ەستەلىك تاقتايشا قويىلماقشى – دەپ جازادى BAQ.kz پورتالى.
بۇل تۋرالى ءاليحان بوكەيحانوۆتىڭ 150 جىلدىعىنا ارنالعان ەكسپەديسياعا قاتىسۋشى، فيلولوگيا عىلىمدارىنىڭ دوكتورى ايگۇل ىسماقوۆا الماتىدا وتكەن ءاليحان بوكەيحانوۆتىڭ مۇراسىن زەرتتەۋگە ارنالعان دوڭگەلەك ۇستەل بارىسىندا مالىمدەدى.
«ءقازىر زيراتتاعى باۋىرلاستار قابىرىندە ءاليحان بوكەيحانوۆ پەن نىعمەت نۇرماقوۆقا ارنالعان ورتاق تاقتايشا بار. ءبىز دون زيراتىنىڭ باسشىلىعىمەن سويلەسىپ، كەلىسىمگە قول جەتكىزدىك. بيىل كۇزگە قاراي، ءاليحان بوكەيحانوۆقا ارناپ بولەك تاقتايشا ورناتۋدى جوسپارلاپ وتىرمىز. ول قازاق جانە ورىس تىلىندە جازىلادى. ويتكەنى، ماسكەۋلىكتەر دە ءاليحان بوكەيحانوۆتىڭ كەزىندە مەملەكەتتىك دۋمانىڭ مۇشەسى بولعانىن بىلۋلەرى كەرەك»، - دەدى ايگۇل ىسماقوۆا.
سونىمەن قاتار، ونىڭ ايتۋىنشا، ەكسپەديسياعا قاتىسۋشىلار ءاليحان بوكەيحاننىڭ ماسكەۋدە ۇلكەن كيسلوۆسكيي كوشەسىندە تالاي جىل تۇرعان ۇيگە دە ەستەلىك تاقتا ورناتۋعا كۇش سالادى.
«وكىنىشكە قاراي، قاراعاندىدا، ومبىدا، سەمەيدە ءاليحان بوكەيحانوۆتىڭ اتى بەرىلگەن كوشە جوق. ول ءبىلىم العان عيماراتتارعا بىردە-بىر ەستەلىك تاقتايشا قويىلماعان. ويتكەنى، بۇل عيماراتتار تاريحي قۇندىلىققا يە»، - دەدى عالىم
ەستەرىڭىزدە بولسا بۇعان دەيىن ءاليحان بوكەيحانعا ارناپ پوشتا ماركاسى شىعارىلىپ، سەمەيدە ەسكەرتكىشى قويىلىپ، كوشە اتاۋى بەرىلەتىنى بەلگىلى بولعان بولاتىن.
