Qazaqtyń, ásirese alash ardaqtylarynyń múrdesi álemniń ár túkpirinde jatyr desek artyq aitqanymyz emes. Solardyń biri, ári biregeii biyl týylǵanyna 150 jyl tolǵan Álihan Bókeihannyń beiiti Máskeýdiń Don ziraty atalatyn bozdaqtar qabirinde jerlengen. Osy ziratqa biyl kúzde estelik taqtaisha qoiylmaqshy – dep jazady BAQ.kz portaly.
Bul týraly Álihan Bókeihanovtyń 150 jyldyǵyna arnalǵan ekspeditsiiaǵa qatysýshy, filologiia ǵylymdarynyń doktory Aigúl Ysmaqova Almatyda ótken Álihan Bókeihanovtyń murasyn zertteýge arnalǵan dóńgelek ústel barysynda málimdedi.
«Qazir zirattaǵy baýyrlastar qabirinde Álihan Bókeihanov pen Nyǵmet Nurmaqovqa arnalǵan ortaq taqtaisha bar. Biz Don ziratynyń basshylyǵymen sóilesip, kelisimge qol jetkizdik. Biyl kúzge qarai, Álihan Bókeihanovqa arnap bólek taqtaisha ornatýdy josparlap otyrmyz. Ol qazaq jáne orys tilinde jazylady. Óitkeni, máskeýlikter de Álihan Bókeihanovtyń kezinde Memlekettik dýmanyń múshesi bolǵanyn bilýleri kerek», - dedi Aigúl Ysmaqova.
Sonymen qatar, onyń aitýynsha, ekspeditsiiaǵa qatysýshylar Álihan Bókeihannyń Máskeýde Úlken Kislovskii kóshesinde talai jyl turǵan úige de estelik taqta ornatýǵa kúsh salady.
«Ókinishke qarai, Qaraǵandyda, Ombyda, Semeide Álihan Bókeihanovtyń aty berilgen kóshe joq. Ol bilim alǵan ǵimarattarǵa birde-bir estelik taqtaisha qoiylmaǵan. Óitkeni, bul ǵimarattar tarihi qundylyqqa ie», - dedi ǵalym
Esterińizde bolsa buǵan deiin Álihan Bókeihanǵa arnap poshta markasy shyǵarylyp, Semeide eskertkishi qoiylyp, kóshe ataýy beriletini belgili bolǵan bolatyn.
