ۇلى وتان سوعىسىنىڭ ارداگەرلەرىنە قۇرمەت كورسەتۋ ءىسى قونايەۆ قالاسىنداعى داڭق مەموريالى جانىندا گۇل شوقتارىن قويۋ راسىمىنەن باستالدى، – دەپ حابارلايدى Dalanews.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
مارات سۇلتانعازييەۆ الاتاۋ قالاسىنىڭ تىل ارداگەرى، كوپبالالى انا، «التىن القا» يەگەرى بۇلىن رامازانوۆا مەن ۇزىناعاش اۋىلىنداعى ۇوس ارداگەرى فەدور كوۆاليەۆتى قۇتتىقتادى.
ارداگەرلەرمەن كەزدەسۋ بارىسىندا ءوڭىر باسشىسى ولاردىڭ ەرلىگىن ۇلىقتاپ، وبلىس تۇرعىندارىنىڭ اتىنان العىس ايتتى. سونداي-اق، مەملەكەت باسشىسى قاسىم-جومارت توقايەۆتىڭ قۇتتىقتاۋ حاتىن وقىپ، سىيلىعىن تابىستادى.
– بيىلعى جەڭىس كۇنىن بىزبەن بىرگە ءنابارى 7 مايدانگەر قارسى الىپ جاتىر. ولار: تاڭىربەرگەن تولعانبايەۆ (ىلە اۋدانى)، فەدور كوۆاليەۆ (جامبىل اۋد.)، سولتانباي جارىقباسوۆ(ەڭبەكشىقازاق اۋد.)، وكسانا بەتەبايەۆا(قونايەۆ ق.)، پاۆەل پولوۆوي (قاراساي اۋد.)، اليم كەبيروۆ (ۇيعىر اۋد.)، ۆياچەسلاۆ لەگوستايەۆ (تالعار اۋد.) سىندى اتالارىمىز بەن اپالارىمىز.
قازىرگى كۇنى 2،5 مىڭنان استام تىل ەڭبەككەرى وسكەلەڭ ۇرپاققا ونەگە بولىپ ءجۇر. بايعابىلوۆ تاستەمىر (قونايەۆ قالاسى)، ماريا مۇقانوۆا (قاراساي اۋدانى)،ساۋرانبايەۆ ناريمان (رايىمبەك اۋدانى)، گالينا لياشيەۆا (تالعار اۋدانى)، شورتانوۆا كۇلپار (كەگەن اۋدانى) سياقتى تىل ارداگەلەرى ءالى دە قوعامدىق ومىرگە ارالاسىپ، جاستارعا جول كورسەتۋدە. ۇلى وتان سوعىسىنىڭ ارداگەرلەرى مەن تىل ەڭبەككەرلەرىنىڭ ەشقايسىسى مەملەكەتتىڭ قولداۋى مەن قامقورلىعىنان، قوعامنىڭ سىي-قۇرمەتىنەن تىس قالماۋدا.
ءبىزدىڭ بۇگىنگى باستى مىندەتىمىز – وسىنداي اعا بۋىننىڭ سۇراپىل سوعىس جىلدارىنداعى ەرلىكتەرىن بارىنشا دارىپتەۋ. سەبەبى، «ەرلىك – ەلگە مۇرا، ۇرپاققا – ۇلگى»!»، – دەدى ءوڭىر باسشىسى مارات سۇلتانعازييەۆ.
جەڭىس كۇنى وبلىس اكىمىنىڭ ورىنباسارى، اۋدان جانە قالا اكىمدەرى دە ارداگەرلەردى مەرەكەمەن قۇتتىقتاپ باردى. ولار مايدانگەرلەرگە زور دەنساۋلىق پەن باقىت تىلەدى.
ايتا كەتەيىك، الماتى وبلىسىنان 40 مىڭداي ادام اسكەرگە اتتانعان.
كوزسىز باتىرلىقتىڭ جارقىن ۇلگىسىن كورسەتكەن 20 مايدانگەرىمىزگە كەڭەس وداعىنىڭ باتىرى اتاعى بەرىلسە، وبلىسىمىزدىڭ 6 تۋماسى «داڭق» وردەنىنىڭ تولىق يەگەرى اتاندى.
