بٷگٸن مەجٸلٸستەگٸ وتىرىستا دەپۋتات ماقسات تولىقباي عىلىم جەنە جوعارى بٸلٸم مينيسترٸ ساياسات نۇربەككە جەنە ەدٸلەت مينيسترلٸگٸنٸڭ ٶكٸلٸنە ەنداۋمەنت-قورلاردى قۇرۋعا قاتىستى ماڭىزدى ساۋال قويدى. دەپۋتات قور قۇرىلتايشىلارىنىڭ ادالدىعىنا كٷمەن تۋدىرماۋ قاجەتتٸگٸن العا تارتىپ, بۇرىن سىبايلاس جەمقورلىق, اۋىر نەمەسە اسا اۋىر قىلمىس ٷشٸن سوتتالعان تۇلعالارعا شەكتەۋ ەنگٸزۋ مەسەلەسٸن كٶتەردٸ, دەپ حابارلايدى Dalanews.kz.
“ساياسات نۇربەك مىرزا, ٶز سٶزٸڭٸزدە ەنداۋمەنت-قور — بۇل قوعامدىق سەنٸمگە نەگٸزدەلگەن قايىرىمدىلىق قۇرالى دەپ ايتتىڭىز. ەندٸ بٸر مورالدىق ەتيكالىق تۇرعىدان العاندا وسىنداي قورلاردىڭ قۇرىلتايشىلارىنىڭ ادالدىعى, قوعام الدىنداعى بەدەلٸ زور ماڭىزعا يە بولۋى كەرەك سەكٸلدٸ كٶرٸنەدٸ. وسى تۇرعىدان كەلگەندە سٸزدٸڭ پوزيتسيياڭىز قالاي? سوندا بۇرىن جەمقورلىق, اۋىر قىلمىس جاساعاندارعا ەشقانداي شەكتەۋلەر بولماي ما? كەز كەلگەنٸ فوند قۇرا بەرە مە?“ — دەدٸ ماقسات تولىقباي.
ساياسات نۇربەك ەنداۋمەنت-قورلاردىڭ قۇرىلتايشىلارى مەن قامقورشىلىق كەڭەسٸنە تەك تازا ازاماتتار كٸرۋٸ كەرەك ەكەنٸن اتاپ ٶتتٸ.
“بۇل مەسەلە بۇعان دەيٸن دە ۇسىنىلعان, بٸز ونى قازٸر قاراپ, تيٸستٸ تٷزەتۋلەر ەنگٸزەمٸز. بٸزدٸڭ ۇستانىمىمىز وسى باعىتتا”, — دەپ جاۋاپ بەردٸ مينيستر.
كەيٸن سٶز العان ەدٸلەت مينيسترٸنٸڭ ورىنباسارى لاۋرا قاناتقىزى قولدانىستاعى زاڭنامادا مۇنداي قور قۇرىلتايشىلارىنا ناقتى شەكتەۋلەر قاراستىرىلماعانىن ايتتى. الايدا بۇل مەسەلە الداعى ۋاقىتتا كونستيتۋتسييا تالاپتارى مەن كونستيتۋتسييالىق سوتتىڭ قۇقىقتىق پوزيتسييالارىن ەسكەرە وتىرىپ, تالقىلانۋى مٷمكٸن ەكەنٸن جەتكٸزدٸ.
“سٸز ايتقان مەسەلە ٶتە ماڭىزدى. سوندىقتان نىسانالى كاپيتال قۇرىلتايشىسىنا شەكتەۋ قويۋ مٷمكٸندٸگٸن قاراستىراتىن بولامىز”, — دەدٸ ۆيتسە-مينيستر.
وسىلايشا, قوعام تاراپىنان جيٸ سىنعا ۇشىرايتىن ەنداۋمەنت-قورلار مەسەلەسٸ ەندٸ پارلامەنت دەڭگەيٸندە قايتا قارالىپ, زاڭنامالىق تۇرعىدا ناقتىلاۋعا باعىت الۋى مٷمكٸن.
