بۇل تۋرالى قالا اكىمدىگىنىڭ رەسمي سايتىنا سىلتەپ Dalanews.kz حابارلايدى.
جىل سايىن جوعارى جانە جوعارى وقۋ ورنىنان كەيىنگى ءبىلىمى بار كادرلاردى دايارلاۋعا ءبولىنىپ كەلە جاتقان گرانتتاردىڭ ارقاسىندا ەلوردالىق ءبىرقاتار جاستار جۇمىسقا ورنالاسقان.
ماسەلەن، 2022 جىلدان باستاپ قالا اكىمدىگىنىڭ گرانتى بويىنشا وقىتىلعان 338 پەداگوگ جۇمىسقا قابىلدانعان.
س.سەيفۋللين اتىنداعى №80 مەكتەپ-گيمنازياسىنىڭ ءمۇعالىمى جانار وسپانوۆا: «2018 جىلى پاۆلودار پەداگوگيكالىق ۋنيۆەرسيتەتىنە بيولوگ ماماندىعى بويىنشا وقۋعا ءتۇستىم. اكىم گرانتى ءبىزدى ماماندىعىمىز بويىنشا وقۋعا ءتۇسىپ، ءوزىمىزدى مامان رەتىندە قالىپتاستىرۋدا الدىمىزعا ۇلكەن جول اشتى. ءقازىر س.سەيفۋللين اتىنداعى №80 مەكتەپ-گيمنازياسىندا ۇستاز بولىپ ەڭبەك ەتىپ ءجۇرمىن. وسى جولدا ءبىلىم الىپ، ەڭبەكتەنۋىمىزگە مۇمكىندىك بەرگەنى ءۇشىن العىسىم شەكسىز! ۇستازدار قاۋىمىن كەلە جاتقان كاسىبي مەرەكەمىزبەن قۇتتىقتايمىن!» - دەيدى.
تانىمال ەكونوميست ايبار ولجاي ءوزىنىڭ فەيسبۋك جەلىسىندەگى پاراقشاسىندا: «2023 جىلدان باستاپ مۇعالىمدەردىڭ ايلىعى تاعى 25 پايىزعا كوتەرىلدى. ەڭ جاس مامان 319 500 تەڭگە الادى. ال ءوتىلى، ساناتى بار پەداگوگتارعا ۇستىنەن ەلەۋلى ۇستەمە قوسىلعان. قولىنا 800 مىڭ الاتىن مۇعالىمدەردى بىلەمىن» - دەپ جازعان.
«ءبىراق وسى جوعارى جالاقى ۋاقىتىلى تولەنە مە دەگەن سۇراقتار تۋىنداپ جاتادى. قازىرگى تاڭدا تەك ساناۋلى وڭىردە بيۋروكراتيالىق قيىندىقتاردان مۇنداي ماسەلە تۋىنداعانى بولماسا، ءىرى قالالاردا ول پروبلەما اتىمەن شەشىلگەن» - دەگەن ا.ولجاي ماسەلەن، استانا قالاسىندا جالاقىنى ۋاقىتىلى تولەۋ ماسەلەسى جوعارى دەڭگەيدە جولعا قويىلعان دەسە بولادى. قازىرگى تاڭدا وسى باعىتتاعى بارلىق پروبلەمالار ءوز شەشىمىن تاپتى – دەيدى.
ايتا كەتەيىك، استانا قالاسىنىڭ ءبىلىم سالاسىنا بولىنگەن بيۋدجەتى بيىل 20 پايىزعا ءوسىپ، 209،8 ميلليارد تەڭگەگە جەتكەن. ونىڭ ىشىندە، وسى جىلى ورتا بىلىمگە 108،6 ميلليارد تەڭگە قاراستىرىلعان. ەلوردادا 98 ورتا مەكتەپ بار ەكەن.
