ماڭعىستاۋ وبلىسى حالقىنىڭ قارقىندى ءوسىمى مەن ەكونوميكالىق دامۋى اياسىندا ماسەلەلەردىڭ ءبىرى – كوممۋنالدىق ينفراقۇرىلىمدى جاڭارتۋ جانە ونىڭ قۋاتىن ارتتىرۋ. بۇل ستراتەگيالىق باستامالار تىرشىلىكتى قامتاماسىز ەتۋ، ينجەنەرلىك جەلىلەر مەن سۋمەن جابدىقتاۋ جۇيەسىن جاڭعىرتۋعا باعىتتالعان. نازار اۋدارۋدى تالاپ ەتەتىن نەگىزگى فاكتورلاردىڭ ءبىرى - «ماەك» كاسىپورنى. كەشەننىڭ ەنەرگەتيكالىق جابدىقتارىنىڭ توزۋ دەڭگەيى 81%-دى قۇرايدى.
– وسىعان بايلانىستى مەملەكەت باسشىسىنىڭ تاپسىرماسى بويىنشا سۋ تۇششىتۋ، بۋ-گاز قوندىرعىلارى جانە تۋربواگرەگاتتار سياقتى جابدىقتاردى سالۋ جانە جاڭعىرتۋ بويىنشا بىرنەشە نەگىزگى جوبالاردى ىسكە اسىرۋدى كوزدەيتىن كاسىپورىندى جاڭعىرتۋ باعدارلاماسى ازىرلەندى. اعىمداعى جىلى كاسىپورىننىڭ ءوز قاراجاتى ەسەبىنەن تۋربواگرەگاتتارعا، قازاندىق اگرەگاتتارىنا جانە قوسالقى جابدىقتارعا كۇردەلى جوندەۋ جۇرگىزىلۋدە. ماڭعىستاۋ وبلىسى اكىمدىگىنىڭ رەزەرۆىنەن توزىعى جەتكەن جابدىقتى اۋىستىرۋعا 2،6 ملرد تەڭگە ءبولىندى. پرەمەر-مينيستردىڭ تاپسىرماسى بويىنشا جاڭا جابدىقتار مەن جيىندىقتاردى ساتىپ الۋعا ق ر ۇكىمەتىنىڭ رەزەرۆىنەن تاعى 4،9 ملرد تەڭگە ءبولىندى، – دەپ حابارلادى ءوڭىر باسشىسى
سونىمەن قاتار، اقتاۋ قالاسىنداعى وزەكتى ماسەلەلەردىڭ ءبىرى – ينجەنەرلىك جەلىلەردى قايتا جاڭارتۋ. حالىقتى ساپالى كوممۋنالدىق قىزمەتتەرمەن قامتاماسىز ەتۋ ماقساتىندا 2026 جىلعا دەيىن اقتاۋ قالاسىنىڭ 25 شاعىن اۋدانىن 5 ايماققا ءبولىپ، جالپى ۇزىندىعى 919 شاقىرىمدى قۇرايتىن ينجەنەرلىك جەلىلەردى (سۋ، كارىز، جىلۋ) جاڭعىرتۋ جوسپارلاندى.
– بۇگىنگى كۇنى 1-كەزەڭ بويىنشا – جالپى سوماسى 20،4 ملرد تەڭگە قارجىنى قۇرايتىن 19 جوبا ازىرلەندى (سۋ بويىنشا- 6 جوبا، كارىز بويىنشا – 6 جوبا، كارىز تازارتۋ ستانسيالارى – 6، جىلۋ – 1 جوبا). بيىل اقتاۋ قالاسىنىڭ 3ا، 3ب جانە 1-شاعىناۋداندارىندا جىلۋ جەلىلەرىن قايتا جاڭارتۋ جۇمىستارى جۇرگىزىلۋدە (جالپى ۇزىندىعى 10،2 كم). ول ءۇشىن رەسپۋبليكالىق بيۋدجەتتەن 3،3 ملرد تەڭگە ءبولىندى (جوبانىڭ جالپى قۇنى 11،5 ملرد.تەڭگە). سونىمەن قاتار، اقتاۋ قالاسىنىڭ 31ا شاعىن اۋدانىندا جىلۋ جەلىلەرىن جاڭارتۋ جۇمىستارى باستالدى (ۇزىندىعى – 0،7 شاقىرىم، مەردىگەرلىك ۇيىم – «تەپلوەنەرگوستروي» ج ش س، جوبانىڭ قۇنى – 240،0 ملن.تەڭگە). رەسپۋبليكالىق بيۋدجەتتەن 199 ملن. تەڭگە ءبولىندى. بۇل نىسان بيىل جەلتوقساندا اياقتالادى دەپ كۇتىلۋدە، – دەدى وكق بريفينگىندە نۇرلان نوعايەۆ.
قالعان شاعىن اۋدانداردى جاڭارتۋ بويىنشا جۇمىستار كەزەڭ-كەزەڭىمەنىسكە اسىرىلادى. ينفراقۇرىلىمدى جاڭارتۋدىڭ ماڭىزدى اسپەكتىسى رەتىندە ايماقتى اۋىز سۋمەن تولىق قامتاماسىز ەتۋ ماڭىزى ايرىقشا. جاز ماۋسىمىندا وبلىستا سۋ تاپشىلىعى تاۋلىگىنە 77،2 مىڭ تەكشە مەتر سۋدى قۇرايدى. جىل سايىن سۋعا سۇرانىستىڭ ءوسىمىن ەسكەرە وتىرىپ، 2025 جىلعا قاراي جالپى قۋاتتىلىعى تاۋلىگىنە 136 مىڭ تەكشە مەتر سۋدى تۇشىتاتىن التى جوبانى ىسكە اسىرۋ جوسپارلانۋدا.
سونىمەن قاتار، ءوڭىردىڭ ءار تۇسىندا جاڭا تۇزسىزداندىرۋ زاۋىتتارىنىڭ قۇرىلىسى بەلسەندى جۇرگىزىلۋدە، اتالعان جوبالار سۋ تاپشىلىعىن جويۋعا ىقپالداسادى.«كاسپيي» سۋ تۇشىتۋ زاۋىتى قۋاتىن تاۋلىگىنە 40 مىڭ تەكشە مەترگە جەتكىزۋدىڭ 2-كەزەڭى بويىنشا جۇمىس جالعاسۋدا. 2022 جىلدىڭ جازعى كەزەڭىندە تاۋلىگىنە 5 مىڭ تەكشە مەتر سۋدى تۇشىتاتىن قوندىرعى پايدالانۋعا بەرىلدى. 2024 جىلدىڭ ساۋىرىنە دەيىن بۇل جۇمىستاردى تولىق اياقتاۋ جوسپارلانۋدا.
سونىمەن قاتار، اقتاۋ قالاسىندا ينۆەستوردىڭ جەكە قاراجاتى ەسەبىنەن قۋاتى تاۋلىگىنە 20 000 تەكشە مەتر سۋدى تۇشىتۋ زاۋىتىن سالۋ جۇمىستارى جۇرگىزىلۋدە. جوبانىڭ قۇنى-4،0 ملرد. تەڭگە. جوبا كەزەڭ-كەزەڭىمەن جۇزەگە اسىرىلۋدا. قازىرگى ۋاقىتتا زاۋىتتىڭ بەلگىلەنگەن قۋاتى تاۋلىگىنە 3600 تەكشە مەتردى قۇرايدى. جىل سوڭىنا قاراي قۋاتتىلىقتى 2 ەسەگە ارتتىرىپ، تاۋلىگىنە 7200 تەكشە مەترگە دەيىن جەتكىزۋ جوسپارلانۋدا.
بيىل فورت-شيەۆچەنكو قالاسىندا تاۋلىگىنە 5 مىڭ تەكشە مەتر (رب – 4،2 ملرد.تەڭگە) جانە كەندىرلى اۋىلىندا تاۋلىگىنە 50 مىڭ تەكشە مەتر سۋ تۇشىتاتىن قوندىرعىلاردى سالۋ جۇمىستارى باستالدى.
