«تازا قازاقستان» اتتى ەكولوگيالىق اكسياسى اياسىندا اقتاۋ قالاسىنىڭ بەلسەندىلەرى «ىبىقتى-ساي» تاريحي ورنىنا تازالىق جۇمىستارىن جۇرگىزدى، – دەپ حابارلايدى Dalanews.kz ماڭعىستاۋ وبلىسى قوعامدىق كوممۋنيكاسيالار ورتالىعىنا سىلتەمە جاساپ.
بۇل اكسياعا وبلىستىق «جاستار» رەسۋرستىق ورتالىعىنىڭ وكىلدەرى جانە «Yessenov» كوللەدجىنىڭ ستۋدەنتتەرى بەلسەنە قاتىستى.
– ماڭعىستاۋ وبلىسى ەرىكتىلەرىنىڭ ۇيىمداستىرۋىمەن «ىبىقتى-ساي» شاتقالىنا سەنبىلىك وتكىزۋدى ۇيعاردىق. كيەلى ولكەنىڭ كورىكتى جەرلەرىنە ساياحاتتايتىن تۋريستەر اعىنى جىل سايىن ارتىپ كەلەدى، تابيعات-انانىڭ قىمبات قازىناسى رەتىندە مۇنداي جادىگەرلەردىڭ باستاپقى قالپىن بۇزباي، جايناپ تۇرۋى تىكەلەي بىزگە بايلانىستى. ۇرپاقتىڭ جارقىن كەلەشەگى تۋعان جەرىنە دەگەن سۇيىسپەنشىلىكتەن باستالادى، – دەيدى اقتاۋلىق ەرىكتىسى امانگۇل جامكەن
«ىبىقتى-ساي» شاتقالى اقتاۋدان 60 شاقىرىم جەردە ورنالاسقان. ول قازاقستاننىڭ ەڭ تەرەڭ ويپاتىندا – قاراقيادا ورنالاسقان.
بۇل – شاتقال تابيعاتتىڭ ەرەكشە تۋىندىسى. كوپتەگەن ادامدار ونى اشىق شاتقال دەپ اتايدى. ميلليونداعان جىلدار بويى جاڭبىر مەن جەل ءمۇجىپ، ءمىنسىز مۇسىندەلگەن شاتقالدار كوركىمەن كوز تارتادى.
تاڭعاجايىپ لابيرينتتەر مەن اركالاردىڭ الەمىنە ەنگەندەي كۇي كەشەسىز.
