كورشى وڭىرلەردەن اكەلىنەتىن ارپا مەن كەبەكتىڭ باعاسى قىمباتتاپ كەتكەن. شارۋالار بۇرىن 1600 تەڭگە تۇراتىن ءبىر قاپشىق كەبەكتى ءقازىر 2200 تەڭگەدەن ساتىپ الۋدا. جەم-شوپ جەپ جارىتپاعان ءالسىز مال 10 شاقىرىم جەردە تۇرعان قۇدىققا سۋ ىشۋگە جەتە الماي جولدا ارام قاتۋدا. ماسەلەن، بۇل جەردە 30-عا جۋىق مالدىڭ ولەكسەسى جاتىر. ءدال وسىلاي جالعاسا بەرسە شارۋالار كەلەسى جىلى مال قالماۋى مۇمكىن دەپ بولجام ايتىپ وتىر.
"بورجاقتى" جەرىندەگى اتا كاسىپتى جالعاپ وتىرعان 20-عا جۋىق شارۋا قوجالىعىنا بيىلعى جاز وڭايعا سوقپادى. جەم-شوپتىڭ جەتىسپەۋشىلىگىنەن شارۋالاردىڭ مالى قىناداي قىرىلۋدا. كورشى وڭىرلەردەن ساتىپ العان ارپا مەن كەبەكتىڭ ءوزىن ولشەپ بەرىپ وتىر. سەبەبى، ارتىق قور جوق.
“ءقازىر كەتىپ جاتقان مالدىڭ ەسەبى جوق. بۇل قارقىنمەن كەتە بەرسە، كەلەسى جىلعا دەيىن ماڭعىستاۋدا مال قالمايدى. ال باسقا جاقتان مال اكەلىپ ماڭعىستاۋعا بۇدان كەيىن مال وسىرە المايسىڭ. اكىمنىڭ بەرگەن 92 تەڭگەدەن بەرگەن ارپاسى 30 موشەك شارۋا باسىنا. ول 30 موشەك ون كۇنگە عانا جەتەدى”، – دەيدى شارۋا بەردىحان الەنوۆ
شارۋالار ساتىپ الايىن دەسە، ارتىق ازىق تابا المايدى. سوندىقتان العان جەمىن تورت-تۇلىگىنە ولشەپ بەرۋدە. قىستىڭ قامىن قازىردەن جاساپ، ارتىق ازىقتى كوپتەپ اكەلمەسە بولمايدى دەپ وتىر. وسىعان دەيىن ءبىر قىستان شىعۋعا 200-300 قاپشىق جەم جەتسە، بيىل ول دا ازدىق ەتۋى مۇمكىن. سەبەبى، جازدا دۇرىس جەم-شوپ جەپ قارنى مايلانباعان مال قىسقى ۋاقىتقا ەكى ەسە تالاپ ەتەدى ەكەن. ءقازىر ۇكىمەتتەن ولشەنىپ بەرىلىپ جاتقان سۋبسيديا جىرتىعىمىزدى جاماۋعا جەتپەي وتىر، دەيدى شارۋالار.
“سۋبسيديا بەرەمىز دەپ جاتىر. 9143 پا 9145 تەڭگە مە، ول ءبىر كۇندىك جەمىنە دە جەتپەيدى. ءبىز انشەيىن جەم، انشەيىن ءشوپ سۇرامايمىز، مول قىلىپ تاۋىپ بەرسە. ءقازىر كەلىپ جاتقاندار قىمبات. ءبىر موشەگى 20 كيلولىق كەبەكتى 2300 تەڭگەگە الىپ وتىرمىز. وعان دەيىن 1600 تەڭگەدەن العانبىز”، – دەيدى شارۋا سەرىك ايداروۆ.
شارۋالار كورشى وڭىرلەردەن اكەلىنەتىن مال ازىعىنىڭ جول شىعىنىن جەرگىلىكتى بيلىك وتەپ بەرسە دەيدى. سوندا ورتاداعى دەلدالدار ۇستىنە اقشا قوسپاي، جەم-شوپتى باستاپقى باعاسىمەن الار ەدىك دەپ وتىر. جاۋاپتىلار بۇل جاعىن رەتتەيمىز دەگەنگە كەلتىردى.
“العاشقى جەرگىلىكتى بيۋدجەتتەن وبلىس اكىمىنىڭ قولداۋىمەن ءبىرىنشى كەزەكتە 600 ملن تەڭگە قاراجات دايىن. كەلەسى اپتادان باستاپ وپەراتورلاردى تاعايىنداپ سولار ارقىلى ءشوپ دايىنداپ اكەلىپ بۇل ەندى قورعا دايىندىق. ءبىز ونى اكەلىپ سرازۋ حالىققا ۇسىنبايمىز. قورعا دايىندىق ءاربىر بەس اۋدانعا ءبولىپ قويامىز”، – دەدى ماڭعىستاۋ وبلىسى اۋىل شارۋاشىلىعى باسقارماسىنىڭ باسشىسى سەرىك قالدىعۇل.
جاۋاپتىلاردىڭ ايتۋىنشا، بۇدان بولەك 1،4 ملرد. تەڭگە تاعى قوسىمشا قارجى بولىنەدى. سوندا جالپى سوماسى 2 ميللياردقا قىسقا ازىق دايىندالادى. ال بۇعان دەيىن ارام قاتقان مالعا وتەماقى قاراستىرىلماعان.
