ماڭعىستاۋ وبلىسىندا «كەلەشەك مەكتەپتەرى» ۇلتتىق جوباسى اياسىندا العاشقى ءتورت مەكتەپ پايدالانۋعا بەرىلدى،- دەپ حابارلايدى Dalanews.kz
جۋىردا تاعى بىرنەشە جاڭا وقۋ ورنى ەسىگىن ايقارا اشپاق. سولاردىڭ ءبىرى — باتىر اۋىلىنداعى جاڭا مەكتەپ. زاماناۋي ءبىلىم ورداسى STEM زەرتحانالارىمەن، شىعارماشىلىق جانە سپورتتىق ايماقتارمەن، سونداي-اق ەرەكشە ءبىلىم بەرۋ قاجەتتىلىكتەرى بار بالالارعا ارنالعان ينكليۋزيۆتى كابينەتتەرمەن جابدىقتالعان. جوبا ءاربىر بالاعا قولايلى ءارى تەڭ مۇمكىندىكتى ءبىلىم بەرۋ ورتاسىن قالىپتاستىرۋدى كوزدەيدى.
بۇگىن اتالعان مەكتەپتە اشىق ەسىك كۇنى ءوتتى. بولاشاق ءبىرىنشى سىنىپ وقۋشىلارى مەن ولاردىڭ اتا-انالارى جاڭا وقۋ ورنىنىڭ ارتىقشىلىقتارىمەن تانىستى.
مۇنايلى اۋدانى ءبىلىم ءبولىمىنىڭ باسشىسى مىندەتىن اتقارۋشى ساعاتبەك جۇبانوۆتىڭ ايتۋىنشا، باتىر اۋىلىنداعى №15 جانە №13 مەكتەپتەردە ءۇش اۋىسىمدا وقۋ ءجۇرىپ جاتقاندىقتان، جاڭا ءبىلىم وشاقتارىنىڭ قاجەتتىلىگى تۋىنداپ وتىر.
– بۇل ماسەلەنى شەشۋ ماقساتىندا «كەلەشەك مەكتەپتەرى» باعدارلاماسى اياسىندا حازار جانە سامال شاعىناۋداندارىندا ءارقايسىسى 1200 وقۋشىعا ارنالعان ەكى جاڭا مەكتەپ سالىنۋدا. جالپى — 2400 ورىن. بۇل نىساندار جاڭا وقۋ جىلىنىڭ باسىندا — قىركۇيەك ايىندا پايدالانۋعا بەرىلەدى، – دەدى ول.
