مالىنان ايرىلعان قۇلسارىلىقتارعا 120 ملن تەڭگەدەن استام وتەماقى تولە

Dalanews 24 مام. 2024 18:54 3488

جىلىوي اۋدانىنىڭ كاسىپكەرلىك جانە اۋىل شارۋاشىلىعى ءبولىمى تۇرعىنداردان كەلىپ تۇسكەن 101 ءوتىنىشتى تولىعىمەن قاناعاتتاندىردى، دەپ حابارلايدى  Dalanews.kz توتەنشە جاعدايلار جونىندەگى جەدەل شتابىنا سىلتەمە جاساپ. 

قوسشاعىل اۋىلدىق وكرۋگىندە ورنالاسقان "قاراعاي" شارۋا قوجالىعىنىڭ باسشىسى ايتۋار مىرزاعالييەۆتىڭ ايتۋىنشا، سۋ تاسقىنى كەزىندە ونىڭ ەكى جىلقىسى سۋعا باتىپ كەتكەن. ول ءوتىنىشىن جەرگىلىكتى كاسىپكەرلىك جانە اۋىل شارۋاشىلىعى بولىمىنە جەتكىزگەن.

بىزگە باعالاۋ كوميسسياسى كەلىپ، بارلىق قۇجاتتاردى زەردەلەدى. ءبىراز ۋاقىتتان كەيىن  زالالدى باعالاۋ ناتيجەلەرىن حابارلادى. ءبىز كەلىسىم بەرىپ، شوتىمىزعا وتەماقىمىزدى الدىق، - دەدى ايتۋار مىرزاعالييەۆ.



"ەركىنقالييەۆا" جك شارۋا قوجالىعىندا سۋ تاسقىنى كەزىندە ەكى سيىر مەن ءتورت قوشقار سۋعا باتىپ كەتكەن. زالالدىڭ جالپى سوماسى 1،2 ملن تەڭگەنى قۇرادى.

⁃ كاسىپكەرلىك جانە اۋىل شارۋاشىلىعى بولىمىنە جۇگىنگەننەن كەيىن، سۋ تاسقىنى كەزىندە جوعالعان مالىم ءۇشىن زالال كولەمى تولىعىمەن وتەلدى، - دەدى شارۋا قوجالىعىنىڭ باسشىسى ايدا ەركىنقالييەۆا.


جىلىوي اۋدانىنىڭ كاسىپكەرلىك جانە اۋىل شارۋاشىلىعى ءبولىمىنىڭ باسشىسى نۇرتاس قۋاتبايەۆتىڭ ايتۋىنشا، بۇگىندە مالىنان ايرىلعان ازاماتتاردىڭ شوتتارىنا بارلىعى 123،8 ملن تەڭگە اۋدارىلعان.

⁃ وتىنىشتەردى قابىلداۋ جالعاسۋدا، 15 جۇمىس كۇنى ىشىندە ارنايى كوميسسيا بارلىق قۇجاتتاردى قارايدى، وتەماقى مالىنان ايرىلعان ازاماتتىڭ جەكە شوتىنا اۋدارىلادى. بۇعان دەيىن قابىلدانعان وتىنىشتەر بويىنشا زالال تولىعىمەن وتەلەدى، - دەدى نۇرتاس قۋاتبايەۆ.


ەسكە سالا كەتەيىك، سۋ تاسقىنى كەزىندە قۇلسارىدا 876 باس ۇساق جانە ءىرى قارا مال زارداپ شەككەن. ونىڭ ىشىندە: 93 باس ءىرى قارا، 697 باس ۇساق مال، 55 باس جىلقى، 31 باس تۇيە، 532 قۇس بار. بۇگىندە ازاماتتاردان تۇسكەن بارلىق وتىنىشتەر بويىنشا وتەماقى تولىق تولەندى.



ۇسىنىلعان
سوڭعى جاڭالىقتار