قازاقستاندا شەكارا ماڭىنداعى اۋىل تۇرعىندارىنىڭ جالاقىسىن كوتەرۋ ۇسىنىلدى، دەپ حابارلايدى Dalanews.kz.
ەلىمىزدىڭ شالعايداعى شەكارالىق اۋىلدارىندا ءومىر ءسۇرۋ ساپاسىن جاقسارتۋ ءۇشىن ءبىرقاتار شارالار ۇسىنىلدى. بۇل باستامانى ماجىلىستە وتكەن اۋىلدىق اۋماقتاردى دامىتۋ ماسەلەلەرى جونىندەگى دوڭگەلەك ۇستەلدە شىعىس قازاقستان وبلىسى اكىمىنىڭ ورىنباسارى دارحان ساپانوۆ كوتەردى.
ساپانوۆتىڭ ايتۋىنشا، شەكارا ماڭىنداعى ەكسترەمالدى تابيعي-كليماتتىق جاعدايلارى بار اۋىلداردا تۇراتىن تۇرعىندارعا ەڭبەكاقىعا ارنايى ۇستەمەاقى قوسۋ جانە ەڭبەك ءوتىلىن ەسەپتەۋدىڭ ەرەكشە نورمالارىن ەنگىزۋ قاجەت.
سونىمەن قاتار، ول «ديپلوممەن - اۋىلعا» باعدارلاماسى اياسىندا وسىنداي ەلدى مەكەندەرگە جۇمىسقا كەلگەن جاس ماماندارعا بەرىلەتىن كوتەرمە جاردەماقىنى ءۇش ەسە ارتتىرۋدى ۇسىندى - 2025 جىلى 100 اەك-تەن 300 اەك-كە دەيىن (393 200 تەڭگەدەن 1 179 600 تەڭگەگە دەيىن).
بالانىڭ تۋىلۋىنا بايلانىستى تولەنەتىن الەۋمەتتىك كومەكتى دە كوبەيتۋ ۇسىنىلدى:
- ءتورتىنشى بالاعا دەيىن - 38 اەك-تەن 57 اەك-كە دەيىن (149 416 تەڭگەدەن 224 124 تەڭگەگە دەيىن)؛
- ءتورتىنشى بالادان كەيىن - 63 اەك-تەن 95 اەك-كە دەيىن (247 716 تەڭگەدەن 373 540 تەڭگەگە دەيىن).
سونداي-اق، شەكارا ماڭىنداعى اۋىلداردا تۇراتىن وتباسىلارعا، ولاردىڭ مىندەتتى الەۋمەتتىك ساقتاندىرۋ جۇيەسىنە قاتىسۋ-قاتىسپاۋىنا قاراماستان، اي سايىنعى جاردەماقى تولەۋ ۇسىنىلدى.
دارحان ساپانوۆ بۇل ايماقتاردا ءومىر ءسۇرۋ ساپاسىن ارتتىرۋ ءۇشىن:
- ينۆەستيسيالىق جوبالاردى قارجىلاندىرۋعا ارنالعان جەكە بيۋدجەت باعدارلامالارىن ەنگىزۋدى؛
- شاعىن جانە ورتا بيزنەس سۋبەكتىلەرى ءۇشىن سالىقتىق جەڭىلدىكتەر مەن ارتىقشىلىقتار قاراستىرۋدى ۇسىندى.
