ماجىلىستە ەۋرازيالىق ەكونوميكالىق وداق اياسىندا كەدەندىك ءترانزيتتىڭ ءبىرىڭعاي جۇيەسىنە قاتىستى زاڭ جوباسى قارالدى، دەپ حابارلايدى Dala News.
زاڭ جوباسى ۇكىمەتتىڭ قاۋلىسىمەن پارلامەنت قاراۋىنا ەنگىزىلگەن. قۇجات ەاەو مەن ءۇشىنشى تاراپتار اراسىنداعى كەدەندىك ءترانزيتتىڭ ءبىرىڭعاي جۇيەسىنىڭ نەگىزگى قاعيداتتارىن ايقىندايدى.
جاڭا كەلىسىمگە سايكەس، تاسىمالداۋ راسىمدەرىن جەڭىلدەتۋ جانە بيزنەس شىعىندارىن ازايتۋ كوزدەلگەن. اتاپ ايتقاندا، ءبىرىڭعاي ترانزيتتىك دەكلاراسيانى ەلەكتروندى فورماتتا قولدانۋ، كەدەندىك تولەمدەردى قامتاماسىز ەتۋدىڭ ورتاق تەتىگىن ەنگىزۋ جوسپارلانىپ وتىر.
سونداي-اق تاۋار قوزعالىسىن باقىلاۋ ءۇشىن ناۆيگاسيالىق پلومبالاردى پايدالانۋ جانە كەدەن ورگاندارىنىڭ شەشىمدەرىن ءوزارا تانۋ قاراستىرىلعان.
دەپۋتاتتاردىڭ ايتۋىنشا، بۇل وزگەرىستەر باقىلاۋشى ورگانداردىڭ ارالاسۋىن ازايتىپ، لوگيستيكالىق پروسەستەردى وڭتايلاندىرۋعا مۇمكىندىك بەرەدى.
سونىمەن قاتار ماجىلىستە ينۆەستيسيالىق احۋالدى جاقسارتۋعا باعىتتالعان تاعى ءبىر كەلىسىم قارالدى. قۇجات سالىقتان جالتارۋدىڭ الدىن الۋ، اقپارات الماسۋدى كۇشەيتۋ جانە مەملەكەتتەر اراسىنداعى ەكونوميكالىق ىنتىماقتاستىقتى دامىتۋعا باعىتتالعان.
ۇكىمەتتىڭ مالىمەتىنشە، زاڭ جوبالارىن ىسكە اسىرۋ ءۇشىن قوسىمشا بيۋدجەت قاراجاتى تالاپ ەتىلمەيدى.
پارلامەنت ءماجىلىسىنىڭ بارلىق كوميتەتتەرى قۇجاتتارعا وڭ قورىتىندى بەرگەن. قارجى جانە بيۋدجەت كوميتەتى زاڭ جوبالارىن قابىلداۋدى ۇسىندى.
