ونىڭ ايتۋىندا، وتكەن جىلى قازاقستانداعى تىكەلەي شەتەلدىك ينۆەستيسيا كولەمى 30 پايىزعا تومەندەگەن.
"ىندەت پەن سونىڭ كەسىرىنەن تۋىنداعان داعدارىس مەملەكەتتەر اراسىنداعى ينۆەستيسيا تارتۋ باسەكەسىن كۇشەيتە ءتۇستى. ينۆەستور تارتۋدا ەلدەگى ينۆەستيسيالىق احۋال ماڭىزدى ءرول اتقارادى. سىرتقى ىستەر ءمينيسترىنىڭ مالىمەتىندە، بىلتىر ەل ەكونوميكاسىنا تىكەلەي شەتەلدىك ينۆەستيسيالار اعىنى 30 پايىزعا تومەندەگەن"، – دەدى نازاربايەۆا پرەمەر مامينگە جولداعان ساۋالىندا.
دەپۋتات ينۆەستكليماتتى جاقسارتۋ ءۇشىن 2018-2022 جىلدارعا ارنالعان ۇلتتىق ينۆەستيسيالىق ستراتەگيا ازىرلەنگەنىن ءمامين ۇكىمەتىنىڭ ەسىنە سالدى.
ۇكىمەت ينۆەستيسيالىق جاعدايدى تۇزەۋدە قول قۋسىرىپ وتىرعان جوق. ايتسە دە، ينۆەستيسيالىق كليماتتى جاقسارتۋ ماسەلەسى اكتۋالدى بولىپ قالا بەرمەك، دەپ اتاپ ءوتتى دەپۋتات.
وسىعان وراي نازاربايەۆا ماميننەن ىلگەرىدەگى ستراتەگيا قالاي جۇزەگە اسىپ جاتقانىن، سوڭعى ەكى جىلدىڭ ناتيجەسى بويىنشا نەگىزگى كورسەتكىشتەرگە قول جەتكىزىلدى مە، جوق پا، سونى ەگجەي-تەگجەيلى ءتۇسىندىرىپ بەرۋدى سۇرادى.
"ستراتەگيا جاڭا ينۆەستيسيا تارتۋ ءۇشىن ەڭ ءتيىمدى بولىپ تابىلاتىن "پەرسپەكتيۆالى سالالاردى" انىقتايدى. اتاپ ايتقاندا اكت، تۋريزم جانە قارجى.
ەلدىڭ وسى سالالارداعى باسەكەلەستىك پوزيسيالارى كۇشەيتىلدى مە، ستراتەگيانى ىسكە اسىرۋ جىلدارىندا قانداي نەگىزگى ينۆەستيسيالىق جوبالارعا باستاماشىلىق ەتىلدى؟
وسى ەسەپتى جىلدارى ەلدەگى قازىرگى ينۆەستورلاردى ۇستاپ قالۋ جانە قايتا ينۆەستيسيالاۋدى ىنتالاندىرۋ ءۇشىن قانداي ناقتى شارالار قابىلداندى؟"، - دەپ ساۋال جولدادى حالىق قالاۋلىسى.
سونداي-اق ول ينۆەستورلاردىڭ شاعىمدارى مەن ماسەلەلەرىن سايكەستەندىرۋ جۇيەسىنىڭ ىسكە قوسىلىپ-قوسىلماعانىن ناقتىلاۋدى ءوتىندى.
بۇدان بولەك، ينۆەستيسيالىق جوبالارعا، ەلدەگى ينۆەستيسيالىق احۋالدىڭ جاي-كۇيىنە جۇيەلى تۇردە تالداۋ جۇرگىزىلىپ جاتىر ما دەپ سۇرادى نازاربايەۆا.
...
بۇعان دەيىن Dalanews.kz cاياساتتانۋشى سەيداحمەت قۇتتىقادامنىڭ نازاربايەۆانىڭ ساياسي كارەراسىنا قاتىستى ساراپتاماسىن جاريالاعان.
"بيلىكتەگى ءبىراز ادام ساياسي امبيسياسىن شەتكە ىسىرىپ، توقايەۆقا جول اشسا، ساياسي تۇرعىدان تولىسقانىن دالەلدەر ەدى. ولار ءوزى ءۇشىن، اينالىپ كەلگەندە ەل ءۇشىن وسىنداي قادامعا بارۋعا ءتيىس.
توقايەۆتىڭ تۇسىنداعى قازاقستان كوپ ۇزاماي دامىعان ەلگە اينالارىنا سەنەمىن. ال نازاربايەۆ مۇراگەرىمەن ماقتاناتىن بولادى..."، – دەگەن ەدى قۇتتىقادام.
شۇعىل:
https://dalanews.kz/aimak/67601-kishi-taldykol-bul-araga-kariz-qaldyqt
