قازاقستاننىڭ مادەنيەت جانە اقپارات مينيسترلىگى مەملەكەتتىك ەمەس بۇقارالىق اقپارات قۇرالدارىنا ارنالعان قىسقامەرزىمدى گرانتتار بايقاۋىن جاريالادى. الايدا بايقاۋدا قاراستىرىلعان جوبالاردىڭ قارجىلاندىرۋ كولەمى اشىق كورسەتىلمەگەن، دەپ حابارلايدى Dalanews.kz.
بۇل تۋرالى قۇقىق قورعاۋشى ديانا وكرەموۆا الەۋمەتتىك جەلىدەگى پاراقشاسىندا جازدى.
ونىڭ ايتۋىنشا، كونكۋرس اياسىندا جۋرنالدار، ينتەرنەت-باسىلىمدار، گازەتتەر، تەلەارنالار مەن راديولارعا ارنالعان تاقىرىپتىق باعىتتار وتە ەگجەي-تەگجەيلى سيپاتتالعان.
اتاپ ايتقاندا، مەملەكەتتىك ساياساتتى ءتۇسىندىرۋ، جۇرگىزىلىپ جاتقان رەفورمالار، پرەزيدەنت جولداۋلارى، ءتۇرلى مەملەكەتتىك باستامالاردى ناسيحاتتاۋ، ەكونوميكا، «رۋحاني قۇندىلىقتار»، دەنساۋلىق ساقتاۋ جانە وزگە دە ونداعان باعىت قامتىلعان.
سونىمەن قاتار ءوتىنىم تاپسىرۋ تالاپتارى دا كەڭىنەن جازىلعان. بايقاۋ قۇجاتتارى تىگىلىپ، بەتتەرى نومىرلەنىپ، سوڭعى بەتى قول قويىلىپ، ءمور باسىلىپ، جابىق كونۆەرتپەن تاپسىرىلۋى ءتيىس.
ديانا وكرەموۆانىڭ سوزىنشە، بۇل تالاپتار سيفرلاندىرۋ مەن جاساندى ينتەللەكت داۋىرىندە ەرەكشە سۇراق تۋدىرادى.
«اقپاراتتاندىرۋ مەن ءىت تەحنولوگيالار دامىعان زاماندا ءالى دە تىگىلىپ، ءمور باسىلعان قاعاز تالاپ ەتىلۋى تۇسىنىكسىز»، - دەپ جازدى ول.
الايدا بايقاۋدىڭ ەڭ ماڭىزدى بولىگى - قارجىلاندىرۋ كولەمى تۋرالى اقپارات مۇلدە كورسەتىلمەگەن.
قۇجاتتا جالپى بيۋدجەت تە، ب ا ق ساناتتارى بويىنشا بولىنەتىن قاراجات مولشەرى ايتىلمايدى. وسىعان بايلانىستى كونتەنت وندىرۋشىلەر قانداي سوماعا ءوتىنىم بەرۋ كەرەگىن وزدەرى بولجاۋعا ءماجبۇر.
«ءبىر ميلليون تەڭگە مە، ءجۇز ميلليون با، الدە 100 مىڭ تەڭگە جەتكىلىكتى مە - بەلگىسىز»، - دەيدى قۇقىق قورعاۋشى.
وكرەموۆانىڭ پىكىرىنشە، مينيسترلىك بۇعان دەيىن ۋادە ەتكەن اشىقتىق پەن ءبىرىڭعاي مەديا-پلاتفورما ازىرگە ىسكە اسپاعان.
«بارىنشا اشىقتىق بولادى دەگەن ەدى. ال ءىس جۇزىندە - تىگىلىپ قويىلعان پاراقتار جانە اقشا تۋرالى ءبىر اۋىز ءسوز جوق»، - دەپ جازدى ول.
سونىمەن قاتار، كونكۋرس تالاپتارىنا سايكەس، مەملەكەتتىك اقپاراتتىق ساياساتتى مەلودراما جانرىندا جۇزەگە اسىرۋ ۇسىنىلىپ وتىرعانداي اسەر قالدىرادى.
ديانا وكرەموۆا بۇل ءتاسىل ءىس جۇزىندە بارلىق تاقىرىپقا قولدانىلاتىنىن اتاپ ءوتتى: اسكەري قىزمەتشىلەردىڭ يميدجىنەن باستاپ قۇقىقتىق سانانى قالىپتاستىرۋ، اگروونەركاسىپ كەشەنىن دامىتۋ جانە كاسىپكەرلىكتى قولداۋعا دەيىن.
«قازاقستاندىقتاردىڭ سۇيىكتى جانرى - مەلودراما بولسا كەرەك. مەملەكەتتىك اقپاراتتىق ساياساتتى ءدال وسى فورماتتا جۇرگىزۋ ۇسىنىلعان»، - دەپ جازدى ول.
