Qazaqstannyń Mádeniet jáne aqparat ministrligi memlekettik emes buqaralyq aqparat quraldaryna arnalǵan qysqamerzimdi granttar baiqaýyn jariialady. Alaida baiqaýda qarastyrylǵan jobalardyń qarjylandyrý kólemi ashyq kórsetilmegen, dep habarlaidy Dalanews.kz.
Bul týraly quqyq qorǵaýshy Diana Okremova áleýmettik jelidegi paraqshasynda jazdy.
Onyń aitýynsha, konkýrs aiasynda jýrnaldar, internet-basylymdar, gazetter, telearnalar men radiolarǵa arnalǵan taqyryptyq baǵyttar óte egjei-tegjeili sipattalǵan.
Atap aitqanda, memlekettik saiasatty túsindirý, júrgizilip jatqan reformalar, Prezident joldaýlary, túrli memlekettik bastamalardy nasihattaý, ekonomika, «rýhani qundylyqtar», densaýlyq saqtaý jáne ózge de ondaǵan baǵyt qamtylǵan.
Sonymen qatar ótinim tapsyrý talaptary da keńinen jazylǵan. Baiqaý qujattary tigilip, betteri nómirlenip, sońǵy beti qol qoiylyp, mór basylyp, jabyq konvertpen tapsyrylýy tiis.
Diana Okremovanyń sózinshe, bul talaptar tsifrlandyrý men jasandy intellekt dáýirinde erekshe suraq týdyrady.
«Aqparattandyrý men IT tehnologiialar damyǵan zamanda áli de tigilip, mór basylǵan qaǵaz talap etilýi túsiniksiz», - dep jazdy ol.
Alaida baiqaýdyń eń mańyzdy bóligi - qarjylandyrý kólemi týraly aqparat múlde kórsetilmegen.
Qujatta jalpy biýdjet te, BAQ sanattary boiynsha bólinetin qarajat mólsheri aitylmaidy. Osyǵan bailanysty kontent óndirýshiler qandai somaǵa ótinim berý keregin ózderi boljaýǵa májbúr.
«Bir million teńge me, júz million ba, álde 100 myń teńge jetkilikti me - belgisiz», - deidi quqyq qorǵaýshy.
Okremovanyń pikirinshe, ministrlik buǵan deiin ýáde etken ashyqtyq pen biryńǵai media-platforma ázirge iske aspaǵan.
«Barynsha ashyqtyq bolady degen edi. Al is júzinde - tigilip qoiylǵan paraqtar jáne aqsha týraly bir aýyz sóz joq», - dep jazdy ol.
Sonymen qatar, konkýrs talaptaryna sáikes, memlekettik aqparattyq saiasatty melodrama janrynda júzege asyrý usynylyp otyrǵandai áser qaldyrady.
Diana Okremova bul tásil is júzinde barlyq taqyrypqa qoldanylatynyn atap ótti: áskeri qyzmetshilerdiń imidjinen bastap quqyqtyq sanany qalyptastyrý, agroónerkásip keshenin damytý jáne kásipkerlikti qoldaýǵa deiin.
«Qazaqstandyqtardyń súiikti janry - melodrama bolsa kerek. Memlekettik aqparattyq saiasatty dál osy formatta júrgizý usynylǵan», - dep jazdy ol.
