جەر كوميسسياسىنىڭ مۇشەلەرى شەت ەلدىڭ ازاماتتىعىن العان جەر يەلەنۋشىلەردىڭ ارەكەتىنە الاڭداپ وتىر. شەتەلدىك بانكتەرگە كەپىلگە قويىلعان اۋىل شارۋاشىلىعى جەرلەرى دە از ەمەس. 

قازاقستان فەرمەرلەر وداعىنىڭ ءتوراعاسى جيگۋلي دايرابايەۆتىڭ ايتۋىنشا، بۇگىندە اۋىل شارۋاشىلىعى جەرلەرىن كەپىلگە قويۆپ، كرەديتكە قىرۋار اقشا العان ادامدار از ەمەس. ال ولاردىڭ ىشىندە قازاقستان ازاماتتىعىنان شىعىپ كەتكەندەر دە بار.

"جەر شەتەلدىكتەرگە بەرىلمەسىن!" دەپ دابىل قاعىپ جۇرگەندە قازىرگى جەر پايدالانۋشىلاردىڭ قازاقستان رەزيدەنتتىگىنەن شىعىپ، شەتەل ازاماتتىعىن الىپ جاتقانىن بايقاماي قالدىق. وكىنىشكە قاراي، ونداي فاكتىلەر بار. جاقىن ارادا ءتيىستى ماتەريالداردى كوميسسيا نازارىنا ۇسىنامىز. ولاردىڭ قولىنداعى مىڭداعان گەكتار جەر تەلىمىن بانككە كەپىلگە قويىپ، قىرۋار قارجى الىپ، كەيىن قايتارا الماي، شەتەلگە قاشىپ كەتپەۋىنە كىم كەپىل؟"، – دەدى دايرابايەۆ جەر كوميسسياسىنىڭ ءبىرىنشى وتىرىسىندا.

قوعام قايراتكەرى مۇحتار تايجان دا كەپىلدىكتە تۇرعان جەر ماسەلەسىن كوتەردى.

ونىڭ سوزىنە قاراعاندا، شەتەلدىك بانكتەرگە سالىنعان اۋىل شارۋاشىلىعى جەرلەرى دە بار.

"وكىنىشكە قاراي، مىڭداعان، ميلليونداعان جەرلەر بانكتەردە كەپىلدە تۇر. اسىرەسە، شەتەلدىڭ بانكتەرىندە كەپىلدە تۇرعان جەرلەر ماسەلەسى – ۇلكەن پروبلەما. مەنىڭشە، ۇكىمەت وسى كەلىسىمشارتتاردى ءبىرجاقتى بۇزىپ، ول جەرلەردى مەملەكەت مەنشىگىنە قايتارۋى قاجەت"، – دەپ اتاپ كورسەتتى تايجان.

ايتا كەتەيىك، وتكەن اپتادا پرەمەر-مينيستر "جەر رەفورماسى بويىنشا كوميسسيا قۇرۋ تۋرالى" وكىمگە قول قويعان بولاتىن. قۇجاتتا كوميسسيانىڭ جالپى ەرەجەلەرى، مىندەتتەرى، كوميسسيا جۇمىسىن ۇيىمداستىرۋ جانە ونىڭ ءتارتىبى كورسەتىلگەن. كوميسسيانىڭ قۇرامى دا جاريالاندى.

دەرەككوز: sputnik.kz